Nərimanov rayonunda cari ilin birinci rübünün yekunları və qarşıda duran vəzifələr müzakirə olunub

Bakı:

14 °C

88 %

3 m/s

AZ RU EN

Ana səhifə / Sosial / Nərimanov rayonunda cari ilin birinci rübünün yekunları və qarşıda duran vəzifələr müzakirə olunub

Nərimanov rayonunda cari ilin birinci rübünün yekunları və qarşıda duran vəzifələr müzakirə olunub

17.04.2015 [10:05]

Aprelin 16-da Nərimanov rayonunda cari ilin birinci rübünün sosial-iqtisadi inkişafının yekunları və qarşıda duran vəzifələr müzakirə edilib.
AZƏRTAC xəbər verir ki, əvvəlcə tədbir iştirakçıları rayon İcra Hakimiyyətinin inzibati binasının foyesində Ümummilli lider Heydər Əliyevin büstü önünə tər gül dəstələri düzərək, Ulu öndərin xatirəsini ehtiramla yad ediblər.
Tədbiri Nərimanov rayon İcra Hakimiyyətinin başçısı Abdin Fərzəliyev açaraq, cari il aprelin 10-da Azərbaycan Prezidenti İlham Əliyevin Sədrliyi ilə Nazirlər Kabinetinin 2015-ci ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunmuş iclasında dövlətimizin başçısının nitqindən irəli gələn vəzifələri diqqətə çatdırıb.
A.Fərzəliyev respublikada aparılan uğurlu sosial-iqtisadi siyasətdən danışaraq, Bakı şəhərinin aparıcı rayonlarından olan Nərimanov rayonunun da hərtərəfli inkişafı üçün böyük işlər görüldüyünü vurğulayıb.
Daha sonra rayon İcra Hakimiyyəti başçısının birinci müavini Şahmar İbadov hesabat məruzəsi ilə çıxış edib. Bildirilib ki, üç ayda rayonda xidmətlər də daxil olmaqla, 573,1 milyon manatlıq məhsul istehsal olunub. İstehlakçılara 550,9 milyon manatlıq və ya bütün sənaye məhsulunun 99,9 faizi qədər sənaye məhsulu göndərilib, həmçinin istehsal olunmuş sənaye məhsulunun həcmində dövlət sektorunun xüsusi çəkisi 84,7 faiz təşkil edib.
Birinci Avropa Oyunlarının keçirilməsinə hazırlıqla əlaqədar qarşıya qoyulan vəzifələrin icrası istiqamətində işlərin təxirə salınmadan həyata keçirildiyini xüsusi vurğulayan Ş.İbadov təsdiq olunmuş Tədbirlər Planına əsasən Nərimanov rayonu ərazisində bu istiqamətdə görülən tədbirlərin davam etdirildiyini diqqətə çatdırıb. Bildirilib ki, yeni inşa olunan Olimpiya Stadionunun Nərimanov rayonu ərazisinə düşən hissəsində geniş abadlıq və quruculuq işləri böyük sürətlə və yüksək keyfiyyətlə həyata keçirilir. İlk növbədə artıq şəhərimizin ən gözəl prospektlərindən birinə çevrilən Ziya Bünyadov prospektinin 15 kilometrlik hissəsində yaşayış və qeyri-yaşayış binalarının fasadları və dam örtükləri yenidən qurulub, digər hissələrdə isə hasarlar tikilərək müasir üzlük tavanlarla bəzədilib.
Eyni zamanda vurğulanıb ki, metronun “Gənclik” stansiyasının ətrafında yerləşən binaların milli memarlıq üslubunda yenidən qurulması və yeni yeraltı piyada keçidlərinin inşası, Ziya Bünyadov prospektinin yenidən qurulması, Olimpiya Stadionunun tikintisi ilə əlaqədar yeni yol qovşaqlarının və yeraltı yol ötürücülərinin salınması, şəhərin baş planına uyğun olaraq digər infrastruktur layihələrin həyata keçirilməsi uğurla yerinə yetirilib və son tamamlama işləri aparılır.
Bakı şəhərinin giriş qapısı sayılan Heydər Əliyev prospektinin yenidən qurulması layihəsinə uyğun olaraq istismar müddətini keçmiş və sökülmüş 8 yaşayış binasının yerində müasir milli memarlıq üslubunda 4 yaşayış binasının tikintisi sürətlə və yüksək keyfiyyətlə davam etdirilir. Həmin binaların yaxın müddətdə sakinlərin istifadəsinə verilməsi nəzərdə tutulub.
Milli Məclisin deputatı Adil Əliyev və digər çıxış edənlər rayonda geniş vüsət alan abadlıq-quruculuq işləri barədə öz fikirlərini bildirərək, rayon sakinlərinin problemlərinin həlli istiqamətində görülən işlərdən məmnunluq ifadə ediblər. Çıxışlarda dövlətimizin başçısının rəhbərliyi ilə ölkə həyatının bütün sahələrində əldə edilmiş nailiyyətlər diqqətə çatdırılıb və Nərimanov rayonunda hesabat dövründə görülən işlərin bundan sonra da uğurla davam etdiriləcəyinə əminlik ifadə olunub.
Sonda rayonun sosial-iqtisadi və ictimai-mədəni həyatında fərqlənən şəxslərə rayon icra hakimiyyətinin fəxri fərman və hədiyyələri təqdim olunub.

Paylaş:

Baxılıb: 1049 dəfə