“Bakı-2015” birinci Avropa Oyunlarına dəstək” sosial dostluq qrupu “dəyirmi masa” keçirib

Bakı:

9 °C

93 %

3 m/s

Əlaqə

AZ RU EN

Ana səhifə / Sosial / “Bakı-2015” birinci Avropa Oyunlarına dəstək” sosial dostluq qrupu “dəyirmi masa” keçirib

“Bakı-2015” birinci Avropa Oyunlarına dəstək” sosial dostluq qrupu “dəyirmi masa” keçirib

06.05.2015 [10:02]

Dünən Beynəlxalq Mətbuat Mərkəzində “Bakı-2015” birinci Avropa Oyunlarına dəstək” sosial dostluq qrupu “dəyirmi masa” keçirib. Tədbirdə millət vəkili Fəzail Ağamalı, fəal gənclər, sosial qrupun üzvləri və media nümayəndələri iştirak ediblər.
Tədbirdə çıxış edən Ana Vətən Partiyasının sədri, Milli Məclisin deputatı Fəzail Ağamalı bildirib ki, böyük bir idman bayramına çevriləcək “Bakı-2015” birinci Avropa Oyunlarına az müddət qalıb. Millət vəkili deyib ki, Azərbaycan dövlətinin ilk dəfə keçiriləcək Avropa Oyunlarına ev sahibliyi etməsindən hər birimiz qürur duyuruq: “Bu da bəllidir ki, uğurumuzu istəməyən bəzi qüvvələr Azərbaycana qarşı “qara piar” kampaniyası aparır. Bunların qarşısını almaq üçün, dövlətimizin ev sahibliyi edəcəyi bu böyük idman yarışının fəal təbliğatçısına çevrilmək üçün biz aprelin 25-də sosial şəbəkədə “birinci Avropa Oyunlarına dəstək” dostluq qrupunu yaratdıq. Niyyətimiz Oyunlara dəstək vermək və bu istiqamətdə dövlətimizin yanında olmaqdır. Bütün imkanlardan istifadə edərək, sosial şəbəkələrdə Oyunların əleyhinə olan qüvvələrə qarşı mübarizə aparmalıyıq. Qrupumuzun artıq 10 mindən çox üzvü və izləyicisi var”.
Millət vəkili “qara piar” aparan qüvvələrin əsas hədəfinin ölkəmizdəki əmin-amanlıq və sabitliyin olduğunu diqqətə çatdırıb və vurğulayıb ki, dünyada Azərbaycanın imicini zədələmək, ölkəmizə qarşı mətbuatda şər və böhtan dolu məlumatlar yaymaq üçün fəaliyyət aparan məhz erməni lobbisi, həmçinin, onun nəzarətindəki qüvvələrdir: “Azərbaycanın daxilində olan bəzi qüvvələr də bu ermənipərəst dairələrə qoşulurlar. Onların arasında partiyalar, QHT-lər və hətta qəzetlər də var. Biz buna qarşı qətiyyətli mövqe nümayiş etdirməliyik. Onların bu fəaliyyəti bizim milli maraqlarımıza ziddir və biz buna qarşı öz iradəmizi qoymalıyıq. Sosial şəbəkələrdə müxtəlif dillərdə birinci Avropa Oyunlarını təbliğ etməli, dövlətimizin yanında olmalıyıq. Bütün imkan və potensialımızı bu istiqamətə cəmləyərək, dövlətimizə xidmət göstərməliyik, Prezidentimizin ətrafında sıx birləşməliyik”.
Layihənin koordinatoru Nicat Müslümov isə qeyd edib ki, qrupun izləyicilərinin sayı günü-gündən artır. Əsasən xarici ölkələrdə yaşayan azərbaycanlı gənclərin bu işdə fəallıq nümayiş etdirdiyini önə çəkən N.Müslümov onu da vurğulayıb ki, Azərbaycan gəncliyi hər zaman öz dövlətinin yanındadır: “Bütün soydaşlarımızı qrupda aktiv fəaliyyətə çağırıram. Müxtəlif dillərdə statuslar yazaraq, ilk Avropa Oyunlarını, Azərbaycanı təbliğ etməliyik. Düşünürəm ki, bu Oyunların keçirilməsi həm Azərbaycanın inkişafı, turizm potensialı baxımından təbliğinə, həm də Dağlıq Qarabağ probleminin həlli istiqamətində mühüm töhfələri ilə yadda qalacaq”.
Daha sonra çıxış edən BDU-nun Hüquq fakültəsinin həmkarlar təşkilatının sədri Yavər Məmmədova, AZTV-nin əməkdaşı Ruslan Həsənov, BDU-nun müəllimi İradə Əliyeva, Əməkdar məşqçi Dilarə Əhmədova, Azərbaycan Dillər Universitetinin doktorantı Ülfan Əliyeva və başqaları birinci Avropa Oyunlarının Azərbaycan üçün əhəmiyyətini qeyd edərək, anti-Azərbaycan kampaniyasına qarşı ölkə vətəndaşlarını birgə mübarizəyə çağırıblar. Tədbir iştirakçıları Azərbaycan dövlətinin birinci Avropa Oyunlarına uğurla ev sahibliyi edəcəyinə əminliklərini ifadə ediblər.
Pərviz SADAYOĞLU

Paylaş:

Baxılıb: 831 dəfə