Tərtərdə milli mətbuatımızın 141-ci ildönümü münasibətilə konfrans keçirilib

Bakı:

25 °C

65 %

12 m/s

Əlaqə

AZ RU EN

Ana səhifə / Sosial / Tərtərdə milli mətbuatımızın 141-ci ildönümü münasibətilə konfrans keçirilib

Tərtərdə milli mətbuatımızın 141-ci ildönümü münasibətilə konfrans keçirilib

16.07.2016 [09:37]

İyulun 15-də Tərtərdə Azərbaycan milli mətbuatının 141 illiyinə həsr olunmuş konfrans keçirilib. Azərbaycan Mətbuat Şurasının Tərtər rayon İcra Hakimiyyəti ilə birgə keçirdiyi konfransın iştirakçıları əvvəlcə Ulu öndər Heydər Əliyevin şəhərin mərkəzində ucaldılmış abidəsini ziyarət ediblər.
Şuradan AZƏRTAC-a bildiriblər ki, tədbiri giriş sözü ilə açan rayon İcra Hakimiyyətinin başçısı Müstəqim Məmmədov rayonda həyata keçirilən quruculuq işlərindən söz açıb. Tərtərin ölkəmizin ictimai fikir tarixində oynadığı rolu diqqətə çatdıran M.Məmmədov cəbhəyanı zonada yerləşən rayonda baş verən proseslərin ölkə ictimaiyyətinə doğru-dürüst çatdırılmasının əhəmiyyətini xüsusi vurğulayıb. Belə obyektiv rəyin formalaşması isə əsası Həsən bəy Zərdabinin “Əkinçi” qəzeti ilə qoyulmuş milli mətbuatımızın ənənələrinə sadiqliklə mümkündür. Çünki Həsən bəy jurnalistlik fəaliyyəti göstərməklə yanaşı, həm də böyük vətənpərvər ziyalı idi. Bu gün onun varisləri olan jurnalistlər də vətənpərvərlik dəst-xəttini qoruyub yaşatmalıdırlar.
Azərbaycan Mətbuat Şurasının sədri, Milli Məclisin deputatı Əflatun Amaşov bildirib ki, yaradılmasının 141 ilini geridə qoyan mətbuatımız ötən müddətdə şərəfli tarixi yol keçib. “Əkinçi” qəzetinin fəaliyyətə başlaması o dövrdə Azərbaycanın həyatında olduqca mühüm hadisə idi. Məhz onun təsiri nəticəsində XX əsrin əvvəllərində yeni xüsusi dəst-xəttə malik nəşrlər meydana çıxıb. Həmin nəşrlər “Əkinçi”nin daha çox məişətlə bağlı fikirlərinə ictimai-siyasi məzmun gətirirdilər. Yekun nəticə olaraq mətbuat Azərbaycanın XX əsrdə qazandığı ilk dövlət müstəqilliyinin katalizatoruna çevrildi.
Qeyd edilib ki, Azərbaycan Xalq Cümhuriyyəti dövründə 1875-ci il 22 iyuldan başlanan yol yeni inkişaf mərhələsinə qədəm qoydu. Bu isə Rusiya imperiyası daxilindəki eybəcərliklərə adekvat yanaşma baxımından əhəmiyyətli idi. Sovet dövründə Azərbaycan mətbuatı bütün məhrumiyyətlərə baxmayaraq, Həsən bəy Zərdabi ənənələrinə sadiqlik nümayiş etdirib. Ə.Amaşov ənənələrə sadiqlik ruhunun XX əsrdə ikinci dəfə qovuşduğumuz dövlət müstəqilliyinin əldə edilməsində misilsiz payının olduğunu diqqətə çatdırıb.
Şura sədrinin müavini, Beynəlxalq Avrasiya Mətbuat Fondunun rəhbəri Umud Rəhimoğlu mətbuatımızın xalqın milli şüur və düşüncəsinin oyanışındakı xidmətlərindən söz açıb. O bildirib ki, “Əkinçi”ni min bir əziyyətlə ərsəyə gətirən Həsən bəyin əməyi misilsiz fədakarlıq, əsl vətənpərvərlik nümunəsidir. Bu nümunə aktuallığını hər zaman saxlamaqdadır.
Mətbuat Şurasının idarə heyətinin üzvü, “İki sahil” qəzetinin baş redaktoru Vüqar Rəhimzadə Azərbaycanda media sahəsində aparılan dövlət siyasətində vətənpərvərliyin mühüm yer tutduğunu vurğulayıb. Hazırda mətbuatın Prezident İlham Əliyev tərəfindən diqqət və qayğı ilə əhatə olunduğunu diqqətə çatdıran V.Rəhimzadə görülən işlərin konkret qanunvericilik bazası ilə tənzimləndiyini bildirib. O bu baxımdan “Azərbaycan Respublikasında kütləvi informasiya vasitələrinin inkişafına dövlət dəstəyi Konsepsiyası”nın qəbulunu və sənədə uyğun olaraq, Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun yaradılmasını vacib məqam kimi önə çəkib.
Tədbirdə çıxış edənlərdən “Yeni Tərtər” qəzetinin baş redaktoru Tofiq Yusif, “Qızıl qələm” mükafatı laureatı Svetlana Əzizova, Tərtər Rayon Ağsaqqallar Şurasının sədri Qədir Allahverdiyev mətbuatın hər zaman mühüm səfərbəredici missiya daşıdığını, katalizator rolunu oynadığını vurğulayıblar. Onlar Azərbaycanda demokratik dövlət quruculuğu prosesinin dərinləşməsində, ədalət prinsiplərinin qorunmasında jurnalistikanın rolunu qeyd ediblər.
Çıxışlardan sonra qarşıya çıxan problemlər, perspektiv vəzifələr ətrafında geniş fikir mübadiləsi aparılıb. Müzakirələr nəticəsində milli vətənpərvərlik mövzusunun işıqlandırılmasında medianın fəallığını artırmaq üçün Mətbuat Şurası və Tərtər rayon İcra Hakimiyyəti tərəfindən jurnalistlər arasında müsabiqənin elan edilməsi qərara alınıb.

Paylaş:

Baxılıb: 707 dəfə