Azərbaycanın çəltiklə özünü təminetmə səviyyəsi təqribən 74 faizdir

Bakı:

21 °C

58 %

3 m/s

Əlaqə

AZ RU EN

Ana səhifə / Sosial / Azərbaycanın çəltiklə özünü təminetmə səviyyəsi təqribən 74 faizdir

Azərbaycanın çəltiklə özünü təminetmə səviyyəsi təqribən 74 faizdir

09.10.2018 [08:42]

Oktyabrın 8-də Bakıda Mərkəzi və Qərbi Asiya Çəltik Mərkəzinin (CWARice) Texniki İdarəetmə Komitəsinin (TİK) altıncı iclası keçirilib.
AZƏRTAC xəbər verir ki, iclasda çıxış edən kənd təsərrüfatı nazirinin müavini Seyfəddin Talıbov kənd təsərrüfatı sahəsinin əsas məhsullarından olan çəltiyin ərzaq təhlükəsizliyində rolu, çəltikçilik sahəsində həyata keçirilən fəaliyyətlər, ölkəmizdə çəltikçiliyə göstərilən dövlət dəstəyi, habelə “Azərbaycan Respublikasında çəltikçiliyin inkişafına dair 2018-2025-ci illər üçün Dövlət Proqramı” barədə məlumat verib. Bildirib ki, bununla əlaqədar ölkədə 2020-2025-ci illərdə təqribən 10 min hektar sahədə 40 min ton çəltiyin istehsalı planlaşdırılır. Hazırda isə Azərbaycanın çəltiklə özünü təminetmə səviyyəsi təqribən 74 faizdir.
Nazir müavini qeyd edib ki, ölkəmizdə aqrar elmin inkişafı istiqamətində yeni dövlət proqramı hazırlanır. Həmçinin bu sahədə fermerlərin bilik və bacarıqlarının artırılması məqsədilə tədbirlər həyata keçirilir.
Aqrar Elm və İnnovasiya Mərkəzinin baş direktoru Vüqar Babayev, genetik materialların mübadiləsi, EMERGE (Çəltiyin Genetik Yaxşılaşdırılması üçün Çoxməkanlı Qiymətləndirməsi və Tədqiqat Şəbəkəsinin Yaradılması) layihəsi çərçivəsində görülən işlərdən söhbət açıb.
CWARice-ın rəhbəri Abbas Şahdi çıxışında bölgədə çəltik istehlakının artması, qlobal çağırışların əməkdaşlıq yolu ilə həlli və fəaliyyətlərin maliyyələşməsi məsələlərinə toxunaraq, diqqəti iclasda müzakirə ediləcək vacib məqamlara yönəldib.
Tədbirdə baş idarəsi Filippində yerləşən Beynəlxalq Çəltik Tədqiqatı İnstitutunun direktorunun toplantı iştirakçılarına müraciəti oxunub.
Həmçinin CWARice-ın yaradılması və fəaliyyətini əks etdirən qısa film nümayiş etdirilib.
Texniki idarəetmə komitəsinin üzvləri gündəlikdəki digər məsələlərin müzakirəsi ilə iclasın işini davam etdiriblər.
Mərkəzi və Qərbi Asiya bölgəsində çəltik sektorunun potensialını artırmaq, mövcud imkanları inkişaf etdirmək, bu sahədə təşəbbüsləri dəstəkləmək məqsədilə CWARice və Beynəlxalq Çəltik Tədqiqat İnstitutu (İRRİ) ilə birgə hazırlanmış 5-illik fəaliyyət proqramı gündəlikdəki əsas müzakirə mövzusuna çevrilib.
Texniki İdarəetmə Komitəsinin (TİK) 6-cı iclasının oktyabrın 9-10-da Lənkəran rayonunda davam etdirilməsi nəzərdə tutulub. Toplantı iştirakçıları Lənkəran rayonunda yeni yaradılmış çəltik emal müəssisəsi, həmçinin çəltikçiliyin inkişafı üçün yaradılmış infrastrukturla tanış olacaqlar.
İclasın sonunda növbəti müddət üçün TİK-in sədri seçiləcək və növbəti iclasının yeri və vaxtı müəyyən olunacaq.
Qeyd edək ki, toplantıda TİK-in Türkiyədən, İrandan, Azərbaycandan, Qazaxıstandan, Özbəkistandan, Qırğızıstandan, Əfqanıstandan və İraqdan olan üzvləri, Kənd Təsərrüfatı tədqiqatı, təhsil və yayım təşkilatının (AREEO) baş direktoru, İran parlamentinin Məşvərət Şurasının Təhsil və Tədqiqat Komitəsinin vitse-prezidenti (parlamentin üzvü), Gilan vilayətinin planlaşdırma və büdcə təşkilatının rəhbəri, İran Astarasının qubernatoru, CWARice-ın əməkdaşları, İran İslam Respublikasında çəltikçilik sahəsində fəaliyyət göstərən özəl şirkətlərin təmsilçiləri iştirak ediblər.

Paylaş:

Baxılıb: 554 dəfə