Azərbaycan Dillər Universitetində Macar Dili və Mədəniyyəti Mərkəzi açılıb

Bakı:

25 °C

39 %

4 m/s

Əlaqə

AZ RU EN

Ana səhifə / Sosial / Azərbaycan Dillər Universitetində Macar Dili və Mədəniyyəti Mərkəzi açılıb

Azərbaycan Dillər Universitetində Macar Dili və Mədəniyyəti Mərkəzi açılıb

30.03.2019 [09:19]

Macarıstanın xarici işlər və ticarət naziri Peter Siyarto və rektor Kamal Abdulla razılaşma sənədi imzalayıblar
Martın 29-da Macarıstanın xarici işlər və ticarət naziri Peter Siyarto ölkəmizə səfəri çərçivəsində Azərbaycan Dillər Universitetində (ADU) olub.
AZƏRTAC xəbər verir ki, ADU-nun rektoru, akademik Kamal Abdulla nazir Peter Siyartonu universitetdə görməkdən şad olduğunu deyib. Rektor nazirin Azərbaycana səfərinin iki xalq arasında dostluq və qardaşlıq əlaqələrinin inkişafı üçün faydalı olduğunu söyləyib. Kamal Abdulla nazirin şəxsən iştirakı ilə universitetdə Macar Dili və Mədəniyyəti Mərkəzinin açılmasının əlamətdar hal olduğunu diqqətə çatdırıb. Akademik mərkəzin açılışı üçün hazırlıqların tamamlandığını qeyd edib. Mərkəzin açılışının qarşılıqlı əlaqələrin möhkəmlənməsinə xidmət göstərəcəyini bildirən rektor Azərbaycan mədəniyyətini, dilini, ədəbiyyatını, tarixini təbliğ etmək üçün Macarıstan universitetlərindən birində güzgü effekti olaraq Azərbaycan Dili və Mədəniyyəti Mərkəzi yaradılmasında nazirin dəstəyini əsirgəməyəcəyinə ümidvar olduğunu deyib. O, universitetdə Macar Dili və Mədəniyyəti Mərkəzinin açılışı ilə yanaşı, gələcək əlaqələrin inkişafı üçün macar dilinin və mədəniyyətinin tədrisi ilə bağlı əməkdaşlıq sənədinin də imzalanmasını yüksək qiymətləndirib.
Nazir Peter Siyarto ADU-da olmaqdan məmnunluğunu ifadə edib, əməkdaşlığın inkişafında yaradılan şəraitə görə universitet rəhbərinə təşəkkürünü bildirib. İki ölkə arasında inkişafda olan əlaqələrdən söz açan Peter Siyarto ADU-da Macar Dili və Mədəniyyəti Mərkəzinin yaradılmasını yüksək qiymətləndirib. O, hər il xarici tələbələr üçün Macarıstan universitetlərində geniş imkanlar yaradıldığını bildirib və tələbələrə bu imkanlardan yararlanmağı tövsiyə edib.
Tərəflər arasında macar dilinin və mədəniyyətinin tədrisini həyata keçirmək məqsədilə razılaşma sənədi imzalanıb. Əldə olunmuş razılaşmaya əsasən, təhsil, elm və mədəniyyət sahəsində 2018-ci il 29 iyun tarixli əməkdaşlıq razılaşmasının yenilənməsi, ADU-da macar dili və mədəniyyətinin tədrisinin təmin edilməsi məqsədilə əməkdaşlıq edilməsi, yaxın vaxtlarda Macarıstan universitetlərinin birində Azərbaycan Dili və Mədəniyyəti Mərkəzinin yaradılmasını dəstəkləmək üçün birgə səy göstərilməsi və digər məsələlər nəzərdə tutulub.
Daha sonra tədbir iştirakçıları Macar Dili və Mədəniyyəti Mərkəzi ilə tanış olublar.

Paylaş:

Baxılıb: 534 dəfə