Milli Qurtuluş Gününə həsr olunmuş “Xilaskar” adlı konfrans təşkil edilib

Bakı:

26 °C

83 %

3 m/s

Əlaqə

AZ RU EN

Ana səhifə / Sosial / Milli Qurtuluş Gününə həsr olunmuş “Xilaskar” adlı konfrans təşkil edilib

Milli Qurtuluş Gününə həsr olunmuş “Xilaskar” adlı konfrans təşkil edilib

15.06.2019 [10:30]

İyunun 14-də Bakıda Mənəvi Dəyərlərin Təbliği Fondunun təşkilatçılığı ilə 15 iyun - Milli Qurtuluş Günü münasibətilə “Xilaskar” adlı konfrans keçirilib.
AZƏRTAC xəbər verir ki, konfransı açan Fondun icraçı direktoru Mehman İsmayılov qeyd edib ki, tariximizə Milli Qurtuluş Günü kimi daxil olmuş 15 iyun xalqımız üçün böyük əhəmiyyətə malik bir gündür. Ümummilli Lider Heydər Əliyevin 1993-cü il iyunun 15-də yenidən hakimiyyətə qayıtması xalqımızın çoxəsrlik tarixinə mühüm siyasi hadisə kimi daxil oldu. 1993-cü ildə xalqın təkidli tələbi ilə Heydər Əliyevin hakimiyyətə yenidən qayıtmasından sonra ölkədə baş vermiş sosial-iqtisadi və siyasi inkişaf dövlətimizin möhkəmləndirilməsində, sivil dünyaya sıx inteqrasiya prosesinə qoşulmasında və xalqımızın strateji mənafelərini təmin edən modern cəmiyyətin qurulmasında həlledici rol oynayıb.
Daha sonra Mənəvi Dəyərlərin Təbliği Fondunun sifarişi ilə hazırlanmış “Heydər Əliyev və azərbaycançılıq” adlı sənədli film nümayiş etdirilib.
Dini Qurumlarla İş üzrə Dövlət Komitəsinin sədri Mübariz Qurbanlı çıxış edərək bildirib ki, xalqın təkidli tələbi ilə ikinci dəfə hakimiyyətə qayıdan Heydər Əliyev 1993-cü il iyunun 15-də Azərbaycan Ali Sovetinin Sədri seçildi. Ulu Öndər böyük risklərə baxmayaraq, xalqın qurtuluşu missiyasını cəsarətlə öz üzərinə götürdü. Bununla da ölkədə uzun illər davam edən gərginlik və qarşıdurma səngidi, respublikamız vətəndaş müharibəsindən və parçalanma təhlükəsindən xilas oldu. Beləliklə, bu mühüm tarixi gün xalqımızın yaddaşına Milli Qurtuluş Günü kimi həkk olundu və 1997-ci ildən etibarən parlamentin qərarı ilə rəsmi bayram kimi qeyd olunur.
Milli Məclisin deputatı, Azərbaycan Yazıçılar Birliyinin üzvü Musa Quliyev vurğulayıb ki, Heydər Əliyevin Azərbaycan rəhbərliyinə qayıdışı ilə başlıca qayəsini müstəqillik, azərbaycançılıq, dövlətçilik, ədalətlilik, demokratiya, milli tərəqqi, dünyəvilik kimi ümumbəşəri dəyərlər təşkil edən yeni bir ideologiyanın əsası qoyuldu. Heydər Əliyevin apardığı daxili siyasət Azərbaycanın hər bir vətəndaşına azad, sərbəst yaşamaq hüquqlarını təmin etmək və öz rifahını yaxşılaşdırmaq imkanları yaratmaqdan ibarət olub. Heydər Əliyevin rəhbərliyi altında Azərbaycan dövlətinin xarici siyasəti, dünyanın aparıcı dövlətləri və beynəlxalq təşkilatları ilə əlaqələri milli maraqlara və uzaqgörən siyasi perspektivlərə əsaslanan xətlə inkişaf etməyə başlayıb.
Dövlət Komitəsinin sədr müavini Səyavuş Heydərov qeyd edib ki, Ümummilli Lider Heydər Əliyev hələ sovet dönəmində milli-mənəvi dəyərlərin, milli ruhun qorunması, kadrların milliləşdirilməsi, azərbaycançılıq ideologiyasının sistem halına salınması istiqamətində bir sıra mühüm tədbirlər həyata keçirib. Əgər Ulu Öndərin respublikamıza birinci rəhbərliyi dövründə Azərbaycanın sosial-iqtisadi, mədəni yüksəlişi üçün həyata keçirilən tədbirlər, milli şüurun oyanışı istiqamətində istər açıq, istərsə də gizli şəraitdə görülən işlər olmasaydı, bu gün Azərbaycanın müstəqil xəttə malik suveren dövlət kimi mövcudluğundan danışmaq çətin olardı.
Daha sonra çıxış edən Azərbaycan İlahiyyat İnstitutunun rektoru Ceyhun Məmmədov, Bakı Beynəlxalq Multikulturalizm Mərkəzinin icraçı direktoru Rəvan Həsənov, “İki sahil” qəzetinin baş redaktoru Vüqar Rəhimzadə Heydər Əliyevin siyasi, iqtisadi, ictimai və mədəni həyatın bütün sahələrində həyata keçirdiyi planların artıq Azərbaycanın gerçəkliyinə çevrildiyini, Ulu Öndərin fəaliyyətinin və şəxsiyyətinin Azərbaycan tarixinin ayrılmaz bir hissəsini təşkil etdiyini diqqətə çatdırıblar. Qeyd edilib ki, hər bir azərbaycanlının taleyində Heydər Əliyev dühasının bir zərrəsi var.

Paylaş:

Baxılıb: 651 dəfə