Azərbaycanın yaratdığı yeni reallıqlar ölkəmizin gələcək inkişafı baxımından mühüm əhəmiyyət daşıyır

Bakı:

26 °C

62 %

1 m/s

AZ RU EN

Ana səhifə / Sosial / Azərbaycanın yaratdığı yeni reallıqlar ölkəmizin gələcək inkişafı baxımından mühüm əhəmiyyət daşıyır

Azərbaycanın yaratdığı yeni reallıqlar ölkəmizin gələcək inkişafı baxımından mühüm əhəmiyyət daşıyır

27.02.2021 [15:01]

44 günlük Vətən müharibəsində Müzəffər Ali Baş Komandan İlham Əliyevin rəhbərliyi ilə şanlı Azərbaycan Ordusu düşməni darmadağın edərək həm tarixi qələbəyə imza atdı, həm də yeni reallıqlar yaratdı. Artıq həm Azərbaycan, həm də bütövlükdə region üçün yeni perspektivlər açılıb.

Qürurverici haldır ki, artıq torpaqlarını işğaldan azad edən Azərbaycan həmin ərazilərdə bərpa-quruculuq işlərinə başlayıb. Məlumdur ki, erməni vandalları bu illər ərzində işğal altında saxladıqları rayon və şəhərlərdə daş üstündə daş buraxmamışdılar. Nəinki yaşayış obyektlərini, Azərbaycanın tarixi keçmişini özündə əks etdirən muzeyləri, mədəniyyət ocaqlarını, tarixi tikililəri, hətta məscidləri belə yerlə-yeksan etmişdilər. Şübhə yoxdur ki, qüdrətli Azərbaycan dövləti xalq-iqtidar birliyi, milli həmrəylik sayəsində işğaldan azad etdiyi torpaqlara yeni nəfəs verəcək.

Qeyd etdiyimiz kimi, Azərbaycan Respublikasının Prezidenti İlham Əliyevin müvafiq tapşırıqları əsasında aparılan bərpa işləri planlı şəkildə və ən yüksək səviyyədə baş tutacaq. Ən vacib məqamlardan biri işğaldan azad edilmiş torpaqlarımızın "yaşıl enerji" zonasına çevrilməsi, həmçinin"ağıllı şəhər" və "ağıllı kənd" konsepsiyasının həyata keçirilməsi ilə bağlıdır. Bu, yeni texnologiyalar əsasında regional inkişafın təmin olunması baxımından olduqca mühüm əhəmiyyətə malikdir.

Digər mühüm məqamlardan biri regionda nəqliyyat kommunikasiyalarının bərpası və Naxçıvanla ölkəmizin əsas hissəsini birləşdirən dəmir yolu xəttinin inşasıdır. Həqiqətən də, bu dəhlizin yaradılmasının çox böyük strateji əhəmiyyəti vardır. Dövlət başçımızın iştirakı ilə təməli qoyulan Horadiz-Ağbənd dəmir yolu xətti, ilk növbədə, respublikamız üçün böyük önəm daşıyır. Yeni nəqliyyat bağlantısı işğaldan azad edilmiş ərazilərə ölkənin digər bölgələrindən vətəndaşların gediş-gəlişini asanlaşdıracaq. Eyni zamanda, bərpa və ondan sonrakı dövrdə bu ərazilərə yüklərin tez və ucuz çatdırılmasına yeni imkanlar yaradacaq. Bütün bunlar Azərbaycanın tranzit imkanlarının daha da genişlənməsi üçün də əhəmiyyətlidir.

Bütövlükdə, Azərbaycanın yaratdığı reallıqlar ölkəmizin gələcək inkişafı, beynəlxalq mövqeyinin daha da möhkəmlənməsi baxımından müstəsna əhəmiyyət daşıyır.

Əfəndi İbrahimli

Yeni Azərbaycan Partiyası Səbail rayon təşkilatının baş məsləhətçisi

Paylaş:

Baxılıb: 702 dəfə