Zəfərin mübarək, əsgər!

Bakı:

19 °C

94 %

5 m/s

Əlaqə

AZ RU EN

Ana səhifə / Sosial / Zəfərin mübarək, əsgər!

Zəfərin mübarək, əsgər!

30.10.2021 [10:03]

Sumqayıt Şəhidlər Xiyabanında “Zəfər çalmış əsgər” heykəli ucaldılıb. Uca boyu, məğrur duruşu, başının üstündə Vətən bayrağı dalğalanan, sağ əlində bütün düşmənlərə qarşı hazır silahı, yuxarı qaldırdığı sol əlində sülhə, vicdana, haqqa-ədalətə çağırış olan Azərbaycan əsgərinin əbədiləşmiş obrazı.

Qalib əsgər, Zəfər çalmış əsgər!

Gözümüzü sevindirən, könlümüzə rahatlıq gətirən obraz.

Bundan əvvəlki otuz ilin ərzində görmədiyimiz, həsrət qaldığımız, intizarında olduğumuz qalib əsgər obrazı.

Heçmi görməmişdik qalib əsgər heykəli?

Görmüşdük.

1941-45-ci illərdə faşizmə qarşı müharibəyə qatılıb yer üzünü bu bəladan xilas edən qalib sovet əsgəri obrazı idi o. Minlərlə azərbaycanlının da siması olan heykəllər bütün imperiya boyu, hətta xarici ölkələrdə də bizə qələbəni xatırlatmışdı.

Sonra...

Sonra düz otuz il biz başqa heykəllərlə ovunmuşduq.

Fəryad edən ana heykəlləri ilə...

Parklarımızı, xiyabanlarımızı “bəzəmişdi” o ağrı dolu susqun ana obrazının naləsi.

Hər birimizin anası idi o heykəllər.

Xocalılıların anası, Füzulililərin anası, Şuşalıların anası... hamımızın.

Çünki Azərbaycanın obrazı idi. Anamızın.

Qan ağlayan ruhu ilə gah boynunu büküb çarəsiz dayanırdı, gah əllərini açıb göylərə yalvarırdı, gah öldürülmüş körpəsini başı üstünə qaldırıb nalə çəkirdi...

Biz də işğal altındakı torpaqlarımızın anım günlərində başımızı aşağı salıb, gözlərimizi yerdən qaldıra bilmədən al qırmızı qərənfillər aparırdıq o ana üçün.

İllərdir ki, fəryad edən ananın qarşısına hər dəfə şəhid qanına bələnmiş qərənfilləri düzürdük.

Gözümüzün qarşısında isə dünyaya yeni nəsil uşaqlar gəlirdi, elə gözümüzün qarşısında da bizim hər xatırlayanda bağrımıza dağ çəkilən torpaqların işğal tarixlərini əzbərləyirdilər onlar. Sonra böyüyürdülər... elə qorxurduq ki, onların bu torpaqları unudacaqlarından, biz dünyadan köçəndən sonra sakitcə həyatlarına davam edəcəklərindən... Elə qorxurduq ki, Vətən müharibəsinin bir də heç vaxt ola bilməyəcəyindən, bu yeni nəsil uşaqların geyimləri, oxuduqları kitabları, baxdıqları filmlər, dinlədikləri mahnılar, başlarını qatdıqları oyunlar bizimki kimi deyil deyə... Elə bilirdik, onlar Vətən nədir bilməzlər bəlkə də. Amma yanılmışdıq!

Gözümüzün qarşısındaca alov dilimləri kimi boy atıb cəmi qırx dörd göz qırpımındaca düşməni yerin dibinə çökdürdülər. Aldılar torpaqlarımızı qəsbkarlardan. Yaralandılar, şəhid oldular, amma qalib gəldilər!

Bizə Zəfər gətirdilər ovuclarında.

Su gətirdilər, torpaq gətirdilər, xarıbülbül gətirdilər...

Onlar bizə əsl Azərbaycan kişisi obrazını qaytardılar.

O kişi məğrurdur, başının üstündə Vətən bayrağı dalğalanır, sağ əlində düşmənlərə qarşı daim hazır silahı, yuxarı qaldırdığı sol əlində sülhə, vicdana, haqqa-ədalətə çağırış... Zəfər çalmış əsgər kimi!

Cavi Dan

Paylaş:

Baxılıb: 860 dəfə