Səhiyyə sisteminin daha bir uğuru

Bakı:

24 °C

66 %

3 m/s

Əlaqə

AZ RU EN

Ana səhifə / Sosial / Səhiyyə sisteminin daha bir uğuru

Səhiyyə sisteminin daha bir uğuru

11.08.2022 [10:11]

Orqan Donorluğu və Transplantasiya üzrə

Koordinasiya Mərkəzi necə fəaliyyət göstərəcək?

Nicat DİLQƏMLİ

Ölkəmizdə hər bir sahədə olduğu kimi, səhiyyə sistemində də uğurlu islahatlar həyata keçirilməkdədir. Prezident İlham Əliyev tərəfindən müəyyən edilən uzunmüddətli inkişaf strategiyasının mühüm istiqamətlərindən biri də səhiyyənin inkişafıdır. Məhz bunun nəticəsidir ki, bu gün Azərbaycanın səhiyyə sistemi dünyanın bir sıra qabaqcıl ölkələri ilə müqayisə edilə biləcək səviyyəyə çatıb. Bütün dünyanı bürüyən koronavirusla effektiv mübarizə və müalicə tədbirlərinin görülməsi, beləliklə on minlərlə insanın bu xəstəlikdən müalicə edilərək sağalması da səhiyyə sisteminin inkişafının ən bariz nümunələrindən biri kimi dəyərləndirilə bilər. Elə buna görədir ki, səhiyyə sistemində əldə olunan nailiyyətlər nüfuzlu beynəlxalq səhiyyə təşkilatları tərəfindən də yüksək qiymətləndirilir.

İki gün öncə Azərbaycan səhiyyəsində daha bir uğura imza atılıb. Belə ki, Səhiyyə Nazirliyinin tabeliyində “Orqan Donorluğu və Transplantasiya üzrə Koordinasiya Mərkəzi” publik hüquqi şəxs yaradılıb. Baş nazir Əli Əsədov bununla bağlı qərar imzalayıb. Qərara əsasən, Orqan Donorluğu və Transplantasiya üzrə Koordinasiya Mərkəzinin Nizamnaməsi və strukturu təsdiq edilib.

Orqan Donorluğu və Transplantasiya üzrə Koordinasiya Mərkəzinin işçilərinin say həddi 30 ştat vahidi müəyyən edilib.

Eyni zamanda, müəyyən edilib ki, Koordinasiya Mərkəzinin Nizamnamə Fondu 300 000 manat təşkil edir və qurumun əsas vəsaiti hesabına formalaşır.

İmzalanan yeni qərarın əhəmiyyəti barədə danışan Milli Məclisin Səhiyyə Komitəsinin üzvü Müşfiq Məmmədli “Yeni Azərbaycan”a açıqlamasında bildirib ki, məqsəd bu istiqamətdə yeni kooperativ idarəetmə modelinin formalaşması və daha çevik, daha dolğun idarəetmənin həyata keçirilməsidir: “Orqan və toxumaların transplantasiyasını tənzimləmək üçün Azərbaycan Respublikasında əhalinin sağlamlığının qorunması haqqında qanunda müddəalar nəzərdə tutulmaqla yanaşı, “İnsan orqan və toxumalarının donorluğu və transplantasiyası haqqında” qanun da müzakirə olundu və bu, müvafiq qanunvericilik aktı ilə tənzimlənir. Mərkəz yeni kooperativ idarəetmə modelinə uyğun şəkildə publik hüquqi şəxs formasında Nazirlər Kabinetinin qərarı ilə təsdiq edilib. Həm büdcə vəsaitlərindən yönəldilmələrin uyğun olaraq istifadəsinin mümkün olması, həm də digər sahələrdən olan vəsaitlərin prosesə cəlb olunması publik hüquqi şəxs idarəetmə modelində qarşılıqlı həyata keçirilə bilir”.

“Eyni zamanda, büdcə vəsaitləri və digər vəsaitlərdən istifadədə şəffaflığın da böyük önəmi vardır. Bu baxımdan, haqqında danışdığımız publik hüquqi şəxsin yaradılması və Səhiyyə Nazirliyinin nəzdində bu prosesin həyata keçirilməsi həm elmi-tədqiqat metodlarından daha rahat istifadəyə gətirib çıxaracaqdır, həm də ümumi səhiyyə siyasətinin müəyyənləşdirilməsi baxımından çox mühüm və çox önəmlidir”, - deyə M.Məmmədli qeyd edib.

Paylaş:

Baxılıb: 736 dəfə