Fərdi evlərə tələbat çoxalıb

Bakı:

24 °C

68 %

13 m/s

Əlaqə

AZ RU EN

Ana səhifə / Sosial / Fərdi evlərə tələbat çoxalıb

Fərdi evlərə tələbat çoxalıb

23.02.2023 [10:37]

10 minlik artım...

Yeganə BAYRAMOVA

Türkiyədə baş verən zəlzələdən sonra ölkəmizdə fərdi evlərə tələbat artıb. Nəticədə həyət evlərinin qiymətində müəyyən artımlar müşahidə edilir.

1 ildə 8 faiz artım

Ümümiyyətlə, Azərbaycanda son bir ildə mənzil qiymətlərində 8 faiz artım var. Mərkəzi Bankın “2022-ci ilin yanvar - dekabr ayları üzrə pul siyasəti icmalı”nda daşınmaz əmlak qiymətləri barədə məlumatlar yer alıb. İcmalda qeyd edilib ki, 2022-ci ilin IV rübündə mənzil bazarında qiymət indeksi əvvəlki ilin müvafiq dövrünə nəzərən 8 faiz artıb. Qiymət indeksi ilkin mənzil bazarında 7.2, təkrar mənzil bazarında isə 8 faiz yüksəlib.

Dövlət Statistika Komitəsinin məlumatına görə isə 2022-ci ildə istismara verilən yaşayış evlərinin ümumi sahəsi 2 milyon 593 min kvadratmetr təşkil edib. Bu da 2021-ci ilin göstəricisindən 24.8 faiz çoxdur. Ötən il yaşayış evlərinin tikintisinə kapital qoyuluşları 925.4 milyon manat təşkil edib. Bu isə 2021-ci illə müqayisədə 5.8 faiz azdır.

10-15 min manat bahalaşma

Maklerlər də fərdi yaşayış evlərində bahalaşma olduğunu təsdiqləyirlər. Suraxanıda ev alqı-satqısı ilə məşğul olan Əli Orucov “Yeni Azərbaycan”a açıqlamasında bildirib ki, zəlzələdən sonra nəinki fərdi evlərin qiyməti bahalaşıb, hətta evini satmaq üçün müraciət edənlərin çoxu fikrindən daşınıb. O, fərdi yaşayış evlərinin qiymətində zəlzələdən sonra 10-15 min manatdan çox bahalaşma olduğunu bildirib. Ə.Orucovun sözlərinə görə, ev tikintisi ilə məşğul olan şəxslər əvvəl fərdi yaşayış evlərini 38-45 min manata satışa qoymuşdularsa, bu qiymət zəlzələdən sonra 55-57 min olub.

Yeni tikili binalarda mənzillərin qiymətinə gəlincə, makler qeyd edib ki, ilin əvvəli artım olsa da, hazırda qiymətlər stabildir.

Həyət evlərini bahalaşdıran səbəblər

Əmlak üzrə ekspert Elnur Fərzəliyevin sözlərinə görə, adətən həyət evlərinə tələbat aprel-may ayından başlayırdı. Zəlzələ isə bu prosesi bir qədər tezləşdirib. Ekspert qeyd edib ki, bu bahalaşma yay boyu davam edə bilər: “Eyni zamanda, tikinti materiallarının da qiyməti bahalaşıb. Bu amil fərdi yaşayış evlərinin qiymətində bahalaşmaya səbəb olmuşdu. Digər tərəfdən, şəhərin mərkəzi hissələrində həyət evlərinin söküntüsü davam edir. Bu da fərdi evlərə təlabatı artırır. Bütün bunlarla yanaşı, zəlzələnin baş verməsi fərdi yaşayış evlərinin qiymətlərində artıma səbəb olub”.

Qiymət artımı nə vaxtadək davam edəcək?

E.Fərzəliyev bildirib ki, insanlar Türkiyədə baş verən zəlzələdən sonra təhlükəsizlik məqsədi ilə fərdi yaşayış evi almağa üstünlük verirlər: “Azərbaycanda fərdi evlərə marağın artması müvəqqəti amildir. Bu amilin təsirləri isə qısamüddətli olacaq. Psixoloji məqamlarla əlaqədar son iki-üç ay ərzində fərdi yaşayış evlərinə maraq artacaq. Bu da, eyni zamanda, fərdi yaşayış evlərinin qiymətinə təsir edə bilər”.

Ekspertlər bahalaşmaya səbəb kimi yalnız Türkiyədə baş verən zəlzələni göstərmirlər. Belə ki, ötən ilin əvvəlindən tikinti materiallarının qiymətinin artması və 2020-ci ildən evlərin tikintisi ilə məşğul olanların əlavə dəyər, mənfəət vergisinə cəlb edilməsi də bahalaşma səbəbi kimi qeyd olunur.

Paylaş:

Baxılıb: 667 dəfə