Daha 115 nəfər!

Bakı:

19 °C

63 %

4 m/s

Əlaqə

AZ RU EN

Ana səhifə / Sosial / Daha 115 nəfər!

Daha 115 nəfər!

30.01.2024 [13:32]

Füzuliyə köç davam edir…

Yeganə BAYRAMOVA

2020-ci il oktyabrın 17-si xalqımız üçün ən əlamətdar günlərdən biri idi. Ordumuzun 2020-ci il sentyabrın 27-də başladığı əks-hücum əməliyyatları nəticəsində Füzuli şəhəri erməni işğalından azad edildi. Məhz həmin gün-oktyabrın 17-də Prezident İlham Əliyev Füzulinin azad olunduğunu xalqa müraciətində çatdırdı.

Qeyd edək ki, Füzuli şəhərinin işğaldan azad edilməsi uğrunda şiddətli döyüşlər gedib. Düşmənin müqavimətini qıran Azərbaycan Ordusu onu geri çəkilməyə məcbur edib, ağır məğlubiyyətə uğradıb. Füzuli əməliyyatı zamanı Ermənistan ordusunun xeyli canlı qüvvəsi və texnikası məhv edilib. Bununla da xalqımızın 30 ilə yaxın Füzuli həsrətinə son qoyuldu.

Füzuli şəhəri azad olunan zaman bütün dünya erməni vandalizminin bariz nümunəsi ilə üzləşdi. Şəhər viran edilmiş və bir dənə də olsa salamat bina qalmamışdı. Qısa müddət ərzində görülən işlər nəticəsində hazırda 2 minə yaxın insan artıq Füzulidə məskunlaşıb.

Günü-gündən abadlaşan Füzuli…

Zəfərdən sonra ölkəmiz işğaldan azad edilmiş ərazilərdə nəhəng bərpa və quruculuq işləri aparır. Prezident İlham Əliyevin hər dəfə azad olunmuş ərazilərə səfərləri zamanı yerli şəraitlə tanışlıq, bərpa-quruculuq işləri ilə tanış olub. Dövlət başçısının bu məqsədlə ilk səfəri 2020-ci ilin noyabrın 16-da, böyük qələbədən dərhal sonra Füzuliyə olub. İlham Əliyev və birinci xanım Mehriban Əliyeva işğaldan azad olunan Füzuli rayonuna gəliblər. Bu səfərində Prezident Füzuli rayonundan Şuşa şəhərinə yol çəkilişi ilə bağlı göstəriş verib və Füzuli-Şuşa avtomobil yolunun – Zəfər yolunun çəkilişinə start verilib.

Ölkə başçısı bərpa olunan ərazilərimizdə yaşayış üçün ən gözəl şərait yaradıldığını qeyd edib. Prezident həmişə azad olunmuş rayonlara səfəri zamanı bildirib ki, 2026-cı ilin sonunadək bütövlükdə Qarabağ və Şərqi Zəngəzurda 140 min insanın yaşayacaq. Ölkə başçısı daim diqqətə çatdırıb ki, bütün layihələri icra edərkən həmin ərazilərə qayıdan əhalinin məşğulluq məsələlərinə də böyük diqqət yetirilir. Şəhər və kənd əhalisi üçün müvafiq məşğulluq layihələri həyata keçiriləcək. Kənd təsərrüfatı ilə məşğul olan əhalinin lazımi texnika və avadanlıqlarla, güzəştli kreditlərlə təmin olunması nəzərdə tutulur. Bərpa olunmuş ərazilərə köçmüş vətəndaşların özünüməşğulluq proqramları bütövlükdə regionda hamının işlə təmin olunmasına şərait yaradacaq.

Nəzərdə tutulan bütün layihələrin həyata keçirilməsi bütövlükdə Qarabağ və Şərqi Zəngəzur rayonlarının iqtisadi potensialının ümumi iqtisadi dövriyyəyə cəlb olunmasına şərait yaradacaq.

Prezident İlham Əliyev Füzuli sakinləri ilə görüşdüyü zamanlar Vətən müharibəsini xatırladaraq bu qələbənin Azərbaycan xalqı tərəfindən qazanıldığını vurğulayıb. O, şəhidlərimizə, qazilərimizə və veteranlarımıza göstərilən ehtiramın gənc nəslin tərbiyəsində mühüm rol oynadığını qeyd edib.

Füzuliyə köçənlərin sayı 1969 oldu…

Ölkə başçısının müvafiq Sərəncamı ilə təsdiq edilən “Böyük Qayıdış”la bağlı 2022-2026-cı illəri əhatə edən Dövlət Proqramı işğaldan azad edilmiş torpaqlarımıza yenidən həyatın qaytarılmasında mühüm rola malikdir. Prezidentin tapşırığına uyğun olaraq, yenidən qurulan Füzuli şəhərinə keçmiş məcburi köçkünlərin qayıdışı davam edir. Dünən növbəti köç karvanı Füzuliyə çatıb. Qarabağın dilbər guşələrindən olan Füzuli şəhəri doğma sakinlərini qarşılamağa davam edir. 27 ailə olmaqla, 115 nəfər Füzuli sakini öz yurduna qovuşub. Bununla da Füzuli şəhərində 527 ailə, 1969 nəfərin daimi məskunlaşması təmin edilib. Füzuli şəhərinə çatan ailələr böyük coşqu ilə qarşılanıblar. Keçmiş məcburi köçkünlər doğma torpaqlarına qovuşduqları üçün çox sevinclidirlər.

Paylaş:

Baxılıb: 598 dəfə