Azərbaycan beynəlxalq miqyasda etibarlı tərəfdaş kimi tanınır

Bakı:

10 °C

93 %

0 m/s

Əlaqə

AZ RU EN

Ana səhifə / YAP xəbərləri / Azərbaycan beynəlxalq miqyasda etibarlı tərəfdaş kimi tanınır

Azərbaycan beynəlxalq miqyasda etibarlı tərəfdaş kimi tanınır

12.08.2025 [14:26]

Azərbaycan Respublikasının Prezidenti cənab İlham Əliyevin ABŞ-a rəsmi səfəri və Ağ Evdə keçirilən görüşlər ölkəmizin beynəlxalq nüfuzu baxımından mühüm hadisə kimi yadda qaldı. Prezident İlham Əliyev ABŞ Prezidenti Donald Tramp və Ermənistanın Baş naziri Nikol Paşinyanla birlikdə mətbuat qarşısında çıxış edərək Cənubi Qafqazda sabitliyin və davamlı sülhün təmin olunmasına dair əldə edilmiş razılaşmaları ictimaiyyətə çatdırdı. Prezidentin bəyanatında diqqət çəkən əsas məqam Azərbaycanla ABŞ arasında strateji tərəfdaşlığın rəsmi şəkildə elan olunması oldu. İlham Əliyev bildirdi ki, iki ölkə arasında yeni əməkdaşlıq mərhələsi başlanır və bu əməkdaşlıq enerji təhlükəsizliyi, investisiya, süni intellekt texnologiyaları və regional sabitlik sahələrini əhatə edəcək. Bununla yanaşı, ABŞ-ın 1992-ci ildən tətbiq etdiyi 907-ci düzəlişin ləğvi Prezident tərəfindən tarixi ədalətin bərpası kimi dəyərləndirildi.

Görüş çərçivəsində Azərbaycan və Ermənistan arasında sülh razılaşmasının imzalanması isə region üçün yeni dövrün başlanğıcı hesab olunur. Tərəflər bir-birinin ərazi bütövlüyünü rəsmən tanıyıb, diplomatik münasibətlərin qurulmasına və nəqliyyat-kommunikasiya xətlərinin, o cümlədən Zəngəzur dəhlizinin açılmasına razılıq veriblər. Bu sənədin imzalanması ilə ATƏT-in Minsk Qrupunun vasitəçilik missiyasına da son qoyulub.

Səfərin növbəti günündə cənab Prezident İlham Əliyev Azərbaycan media nümayəndələrinə geniş müsahibə verərək bu razılaşmanın əhəmiyyətini ətraflı şəkildə şərh etdi. Dövlət başçısı vurğuladı ki, Azərbaycan heç vaxt müharibə tərəfdarı olmayıb və bu gün diplomatik zəfər qazanaraq məqsədlərinə sülh yolu ilə çatıb. O, ABŞ-ın təşəbbüsü ilə keçirilmiş bu görüşlərin real nəticələr doğurduğunu və artıq Cənubi Qafqazın yeni bir mərhələyə qədəm qoyduğunu bildirdi. Müsahibədə həmçinin enerji siyasəti, Avropaya qaz ixracının genişləndirilməsi, mina təmizlənməsi və azad edilmiş ərazilərdə aparılan quruculuq işləri haqqında da məlumat verildi.

Prezident İlham Əliyev qeyd etdi ki, qarşıdakı aylarda ABŞ və Azərbaycan arasında Strateji Tərəfdaşlıq Sazişi hazırlanacaq. Bu sənəd yalnız siyasi deyil, eyni zamanda iqtisadi və texnoloji əməkdaşlığı da özündə ehtiva edəcək. Səfər çərçivəsində atılan addımlar Azərbaycanın beynəlxalq miqyasda etibarlı tərəfdaş kimi tanınmasını bir daha sübut etdi. Dövlət başçısının çıxışı və müsahibəsi Azərbaycanın prinsipial, ardıcıl və milli maraqlara əsaslanan xarici siyasət xəttinin uğurlu nəticəsidir. Bu hadisə həm də regionda uzunmüddətli sabitlik və tərəqqi üçün yeni imkanlar açır.

Sonda qeyd etmək lazımdır ki, bu səfər və verilən bəyanatlar Azərbaycan diplomatiyasının yeni mərhələyə qədəm qoyduğunu göstərir. Bu gün həqiqətən də tarixi bir gündür – çünki bir tərəfdə regionda sülhə nail olmaq üçün göstərilən iradə, digər tərəfdə isə beynəlxalq tərəfdaşlıq və qarşılıqlı hörmətin parlaq nümunəsi dayanır. Azərbaycanın sülh yönümlü siyasəti və liderlik missiyası dünya siyasətində daha çox diqqət çəkir və nümunə olaraq qəbul edilir.

Rövşən Əhmədov

YAP Ağcabədi rayon təşkilatının sədri

Paylaş:

Baxılıb: 232 dəfə