Azərbaycan beynəlxalq hüququ bərpa edərək, ərazi bütövlüyünü təmin etmişdir

Bakı:

19 °C

55 %

3 m/s

Əlaqə

AZ RU EN

Ana səhifə / YAP xəbərləri / Azərbaycan beynəlxalq hüququ bərpa edərək, ərazi bütövlüyünü təmin etmişdir

Azərbaycan beynəlxalq hüququ bərpa edərək, ərazi bütövlüyünü təmin etmişdir

28.08.2025 [20:54]

Mansur Quliyev,

YAP Ağdam rayon təşkilatının sədri

Azərbaycan Respublikasının Prezidenti cənab İlham Əliyevin nüfuzlu “Əl-Ərəbiyyə” telekanalına verdiyi müsahibə ölkəmizin beynəlxalq siyasətdə artan nüfuzunu, regional proseslərdə müəyyənedici rolunu bir daha nümayiş etdirdi. Dövlət başçısının çıxışı həm regional təhlükəsizlik məsələlərinin, həm də qlobal əməkdaşlığın dərin təhlili ilə yadda qaldı.

Prezident İlham Əliyev müsahibədə xüsusi olaraq 44 günlük Vətən müharibəsinin nəticələrinə və bölgədə formalaşan yeni geosiyasi reallıqlara diqqət çəkdi. Dövlət başçısı vurğuladı ki, Azərbaycan beynəlxalq hüququ bərpa edərək, ərazi bütövlüyünü təmin etmişdir. Bu tarixi qələbə yalnız ölkəmiz üçün deyil, bütün region üçün sülh və əməkdaşlıq üçün yeni imkanlar açmışdır.

Müsahibədə ən mühüm məqamlardan biri Azərbaycan-Ermənistan münasibətlərinə dair mövqelər idi. Prezident İlham Əliyev qeyd etdi ki, Azərbaycan sülh gündəliyinə sadiqdir və bu istiqamətdə ardıcıl addımlar atır. Lakin Ermənistanın revanşist meyllərdən əl çəkməsi vacibdir. Dövlət başçısı bildirdi ki, yalnız qarşılıqlı hörmət və beynəlxalq hüquqa əsaslanan müqavilələr imzalandığı halda dayanıqlı sülh mümkün ola bilər.

Prezident İlham Əliyev müsahibədə Azərbaycanın enerji siyasətinə də geniş yer verdi. O, vurğuladı ki, Azərbaycan Avropanın etibarlı enerji tərəfdaşıdır və dünya bazarına sabit şəkildə neft, qaz və elektrik enerjisi ixrac edir. Eyni zamanda, bərpa olunan enerji layihələrinin inkişafı Azərbaycanın enerji təhlükəsizliyində mühüm mərhələ kimi dəyərləndirildi. Bu yanaşma Azərbaycanın həm region, həm də dünya üçün strateji enerji mərkəzinə çevrildiyini təsdiq edir.

Dövlət başçısı müsahibədə Azərbaycanın beynəlxalq nəqliyyat dəhlizləri üzərindəki mühüm rolunu da xüsusi qeyd etdi. Bakı-Tbilisi-Qars dəmir yolu, Orta Dəhliz layihəsi və digər irimiqyaslı təşəbbüslər Azərbaycanı Şərqlə Qərb arasında strateji körpü mövqeyinə çıxarır. Prezident İlham Əliyev bildirdi ki, bu layihələr yalnız ölkəmizin deyil, həm də region dövlətlərinin iqtisadi inkişafına mühüm töhfə verir.

“Əl-Ərəbiyyə” telekanalına müsahibə ərəb dünyasına ünvanlandığı üçün Prezident İlham Əliyevin İslam həmrəyliyi ilə bağlı mesajları xüsusi önəm daşıyır. Dövlət başçısı vurğuladı ki, Azərbaycan müsəlman dünyasında birlik və qarşılıqlı dəstəyin gücləndirilməsi tərəfdarıdır. Ölkəmizin həm İslam Əməkdaşlıq Təşkilatında, həm də ərəb ölkələri ilə ikitərəfli əlaqələrdə fəal iştirakı bunu bir daha sübut edir.

Müsahibə zamanı Prezident İlham Əliyev Azərbaycanın müstəqil siyasət yürütməsini, qlobal proseslərdə balanslı mövqeyini və milli maraqlara əsaslanan prinsipial xəttini bir daha ortaya qoydu. Bu, beynəlxalq ictimaiyyətə aydın mesaj idi: Azərbaycan heç bir təzyiq altında deyil, öz maraqlarına söykənən siyasət həyata keçirir və regionda sabitliyin təminatçısı rolunda çıxış edir.

Prezident İlham Əliyevin “Əl-Ərəbiyyə” telekanalına müsahibəsi həm Azərbaycan ictimaiyyəti, həm də beynəlxalq aləm üçün mühüm siyasi bəyanat xarakteri daşıyır. Bu çıxışda ölkəmizin strateji prioritetləri – sülh, əməkdaşlıq, enerji təhlükəsizliyi, nəqliyyat dəhlizləri və İslam həmrəyliyi – aydın şəkildə ifadə olunmuşdur. Müsahibə bir daha sübut etdi ki, Prezident İlham Əliyevin rəhbərliyi ilə Azərbaycan bölgədə aparıcı güc və beynəlxalq siyasətdə etibarlı tərəfdaşdır.

Paylaş:

Baxılıb: 436 dəfə