Ana dilimiz – dövlətçiliyimizin və milli kimliyimizin dayağı

Bakı:

19 °C

82 %

4 m/s

Əlaqə

AZ RU EN

Ana səhifə / YAP xəbərləri / Ana dilimiz – dövlətçiliyimizin və milli kimliyimizin dayağı

Ana dilimiz – dövlətçiliyimizin və milli kimliyimizin dayağı

31.07.2026 [15:20]

Hər bir xalqın tarixini yaşadan, onun milli yaddaşını gələcək nəsillərə daşıyan ən müqəddəs mənəvi sərvəti ana dilidir. Dil təkcə ünsiyyət vasitəsi deyil, xalqın düşüncə tərzini, dünyagörüşünü, mədəniyyətini, adət-ənənələrini və dövlətçilik fəlsəfəsini özündə yaşadan əvəzsiz milli xəzinədir. Azərbaycan dili də əsrlər boyu xalqımızın milli varlığını qoruyan, onu zamanın sərt sınaqlarından çıxaran ən güclü mənəvi dayaqlardan biri olmuşdur.

Müstəqil Azərbaycanın memarı və qurucusu, Ümummilli Lider Heydər Əliyev ana dilimizin dövlət dili kimi qorunması və inkişaf etdirilməsini milli siyasətin əsas istiqamətlərindən biri kimi müəyyənləşdirmişdir. Onun uzaqgörən siyasəti nəticəsində Azərbaycan dilinin nüfuzu daha da yüksəlmiş, dövlət idarəçiliyində, təhsildə, elmdə və ictimai həyatın bütün sahələrində istifadəsi genişlənmişdir.

Məhz Ümummilli Lider Heydər Əliyevin 9 avqust 2001-ci il tarixli Fərmanı ilə hər il 1 avqust "Azərbaycan əlifbası və Azərbaycan dili günü" kimi qeyd olunur. Bu əlamətdar gün xalqımızın milli-mənəvi dəyərlərinə göstərilən yüksək dövlət qayğısının, ana dilimizə olan sonsuz ehtiramın və milli kimliyimizin qorunmasına verilən önəmin bariz ifadəsidir.

Azərbaycan dilinin bugünkü inkişafı ölkə Prezidenti cənab İlham Əliyevin rəhbərliyi ilə uğurla davam etdirilir. Dövlət başçısının imzaladığı fərman və sərəncamlar, qəbul olunan dövlət proqramları dilimizin saflığının qorunmasına, ədəbi dil normalarının möhkəmləndirilməsinə, Azərbaycan dilinin rəqəmsal mühitdə inkişafına və beynəlxalq nüfuzunun artırılmasına mühüm töhfələr verir.

Qloballaşmanın sürətləndiyi, informasiya axınının sərhəd tanımadığı müasir dövrdə ana dilinin qorunması hər bir vətəndaşın mənəvi borcudur. Xarici sözlərin lüzumsuz istifadəsi, sosial şəbəkələrdə dil normalarının pozulması və nitq mədəniyyətinə laqeyd münasibət milli dilimizin saflığı üçün müəyyən çağırışlar yaradır. Bu baxımdan hər birimiz Azərbaycan dilinin zənginliyini qorumalı, onu düzgün yazmalı, səlis danışmalı və gələcək nəsillərə olduğu kimi ötürməliyik.

Azərbaycan dili min illərin sınağından çıxmış, Nizaminin hikmətini, Füzulinin məhəbbətini, Vaqifin müdrikliyini, Cəlil Məmmədquluzadənin maarifçiliyini, Üzeyir Hacıbəylinin milli ruhunu, Bəxtiyar Vahabzadənin və Xəlil Rzanın azadlıq duyğularını yaşadan qüdrətli bir dildir. Bu dil xalqımızın keçmişini, bu gününü və gələcəyini birləşdirən mənəvi körpüdür.

Dilə hörmət dövlətə hörmətdir, tarixə sədaqətdir, gələcəyə məsuliyyətdir. Azərbaycan dilini qorumaq yalnız dilçilərin və müəllimlərin deyil, hər bir Azərbaycan vətəndaşının müqəddəs vəzifəsidir. Çünki ana dilini yaşadan xalq öz milli kimliyini, müstəqilliyini və mənəvi bütövlüyünü qoruyub saxlayır.

1 Avqust – Azərbaycan əlifbası və Azərbaycan dili günü münasibətilə hər bir vətəndaşı ana dilimizin saflığını qorumağa, onu sevə-sevə öyrənməyə, düzgün istifadə etməyə və gələcək nəsillərə zəngin milli irsimizin ayrılmaz hissəsi kimi ötürməyə çağırırıq. Azərbaycan dili bizim milli qürurumuz, dövlətçiliyimizin dayağı və müstəqilliyimizin əbədi simvoludur.

Fidan Hüseynova
YAP Quba rayon təşkilatının sədri

Paylaş:

Baxılıb: 591 dəfə