Laçın – Zəfərimizin, qayıdışımızın və dirçəlişimizin rəmzi

Bakı:

32 °C

51 %

4 m/s

Əlaqə

AZ RU EN

Ana səhifə / YAP xəbərləri / Laçın – Zəfərimizin, qayıdışımızın və dirçəlişimizin rəmzi

Laçın – Zəfərimizin, qayıdışımızın və dirçəlişimizin rəmzi

25.08.2026 [13:40]

Sevda Quluyeva
YAP Kəngərli rayon təşkilatının sədri
26 Avqust – Laçın Şəhəri Günü Azərbaycan tarixinin şanlı səhifələrindən birini əks etdirən
əlamətdar gündür. Bu tarix Laçının işğaldan azad olunmasını, keçmiş məcburi köçkünlərin
doğma torpaqlarına qayıdışını və şəhərdə aparılan genişmiqyaslı bərpa-quruculuq işlərini
özündə birləşdirir. Bu gün Laçın uzun illər davam edən həsrətin deyil, Zəfərin, qayıdışın və yeni
həyatın rəmzi kimi öz tarixini yazır.
Laçın Azərbaycanın qədim və gözəl guşələrindən biridir. Zəngin meşələri, dağları, çayları,
mineral su ehtiyatları və əlverişli iqlimi ilə seçilən rayon xalqımızın tarixi-mədəni yaddaşında
xüsusi yer tutur. Lakin 1992-ci ilin mayında Laçının Ermənistan tərəfindən işğal olunması
şəhərin və rayonun dinc həyatını yarımçıq qoydu. On minlərlə laçınlı doğma yurdlarından
didərgin düşərək Azərbaycanın müxtəlif bölgələrində məskunlaşdı. İşğal illərində yaşayış
məntəqələri, tarixi-mədəni irs nümunələri və sosial infrastruktur dağıdıldı, rayonun təbiətinə ciddi
ziyan vuruldu. Buna baxmayaraq, laçınlıların doğma yurda bağlılığı və qayıdış arzusu heç
zaman zəifləmədi.
Azərbaycan xalqı üç onillik ərzində işğal altında olan torpaqlarımızın azad ediləcəyinə inamını
qorudu. Dövlətimizin məqsədyönlü siyasəti, güclü ordu quruculuğu və xalqımızın milli həmrəyliyi
bu inamın gerçəkləşməsinə imkan verdi.
2020-ci ildə baş vermiş Vətən müharibəsi Azərbaycanın ərazi bütövlüyünün bərpasında tarixi
dönüş yaratdı. Laçın rayonunun cənub hissəsində Azərbaycan Ordusunun keçirdiyi hərbi
əməliyyatlar nəticəsində bir sıra yaşayış məntəqələri, o cümlədən Güləbird kəndi azad edildi.
Şuşanın azad olunmasından sonra Ermənistan kapitulyasiyaya məcbur oldu və 10 noyabr 2020-
ci il tarixli üçtərəfli Bəyanata əsasən Laçın rayonunun digər hissəsi Azərbaycana qaytarıldı.
Beləliklə, Laçın Azərbaycanın ərazi bütövlüyünün bərpasının mühüm rəmzlərindən birinə
çevrildi. 26 avqustun Laçın Şəhəri Günü kimi qeyd olunması isə şəhərin yeni tarixinin
başlanğıcını, uzun illər davam edən həsrətin sona çatmasını və qayıdış arzusunun
gerçəkləşməsini ifadə edir.
Laçının azad olunmasından sonra qarşıda duran əsas vəzifələrdən biri şəhərin və rayonun
yenidən qurulması, təhlükəsiz və müasir yaşayış şəraitinin yaradılması oldu. Dövlətimizin
başçısının rəhbərliyi ilə burada genişmiqyaslı bərpa və quruculuq işləri həyata keçirilir. Yollar,
enerji, su, qaz və rabitə infrastrukturu qurulur, yaşayış kompleksləri, məktəblər, uşaq bağçaları,
səhiyyə və digər sosial obyektlər yaradılır.
Laçın şəhərinə keçmiş məcburi köçkünlərin qayıdışı 2023-cü il mayın 27-dən başlayıb. Doğma
yurda qayıdan ailələr yeni mənzillərlə yanaşı, müasir sosial və məişət imkanları ilə də təmin
edilir. Bu proses Böyük Qayıdış siyasətinin mühüm istiqamətlərindən biridir. Uzun illər yalnız
xatirələrdə yaşayan Laçın artıq yenidən öz sakinlərinin səsi ilə canlanır.
Müasir Laçının qurulmasında şəhərsalma və ekoloji məsələlərə xüsusi diqqət yetirilir. Məqsəd
sadəcə dağıdılmış binaları bərpa etmək deyil, təbii landşaftı qoruyan, yaşıllıqları geniş olan,
rahat, təhlükəsiz və dayanıqlı şəhər mühiti yaratmaqdır. “Böyük Qayıdışa dair I Dövlət
Proqramı” çərçivəsində təhlükəsiz yaşayış şəraitinin yaradılması, sosial xidmətlərin inkişafı,
məşğulluğun təmin edilməsi və infrastrukturun qurulması əsas istiqamətlərdəndir.
Laçının dirçəlişi yaşayış məntəqələrinin bərpası ilə məhdudlaşmır. Şəhərdə yeni iş yerlərinin
yaradılması, sahibkarlığın inkişafı və iqtisadi fəallığın artırılması da mühüm əhəmiyyət daşıyır.

Rayonun zəngin təbii ehtiyatları, su mənbələri, dağlıq relyefi və əlverişli coğrafi mövqeyi kənd
təsərrüfatı, heyvandarlıq, arıçılıq və digər sahələrin inkişafı üçün geniş imkanlar yaradır.
Laçının təbii gözəllikləri onun turizm potensialını da artırır. Dağlar, meşələr, çaylar, bulaqlar və
mineral su ehtiyatları ekoturizm, dağ turizmi və sağlamlıq turizminin inkişafı üçün əlverişli şərait
yaradır. Qarabağ və Şərqi Zəngəzurun bərpası Laçının Azərbaycanın mühüm turizm
mərkəzlərindən birinə çevrilməsi üçün yeni imkanlar açır.
Laçının strateji coğrafi mövqeyi də xüsusi əhəmiyyət daşıyır. Müasir yol-nəqliyyat infrastrukturu
şəhərin digər bölgələrlə əlaqəsini genişləndirir, regionun iqtisadi potensialının artırılmasına və
yeni kommunikasiya imkanlarının yaradılmasına xidmət edir.
Laçının azadlığı Azərbaycan Ordusunun qəhrəmanlığı, şəhidlərimizin canı və qazilərimizin
fədakarlığı hesabına əldə edilmiş böyük Zəfərin tərkib hissəsidir. Bu gün Laçında dalğalanan
üçrəngli Azərbaycan bayrağı tarixi ədalətin bərpa olunmasının və şəhidlərimizin qanının yerdə
qalmadığının rəmzidir. Laçın Şəhəri Günü qeyd olunarkən Azərbaycanın ərazi bütövlüyü
uğrunda canından keçən bütün şəhidlərin əziz xatirəsi dərin ehtiramla yad edilir.
Bu gün Laçın işğalın deyil, quruculuğun və inkişafın simasını nümayiş etdirir. Yeni yaşayış
məhəllələri, yollar, sosial obyektlər və müasir infrastruktur şəhərin gələcəyə inamla
addımladığını göstərir. Laçının bərpası Azərbaycanın siyasi iradəsinin, iqtisadi gücünün və
quruculuq potensialının göstəricisidir.
26 Avqust – Laçın Şəhəri Günü xalqımızın yaddaşında Zəfər, qayıdış və dirçəliş günü kimi
yaşayacaq. Laçın artıq yalnız azad edilmiş şəhər deyil, Azərbaycanın Zəfər salnaməsinin,
Böyük Qayıdış siyasətinin və Qarabağla Şərqi Zəngəzurun yeni inkişaf mərhələsinin parlaq
rəmzlərindən biridir.