Azərbaycan-Özbəkistan Strateji Tərəfdaşlığı

Bakı:

32 °C

51 %

4 m/s

Əlaqə

AZ RU EN

Ana səhifə / YAP xəbərləri / Azərbaycan-Özbəkistan Strateji Tərəfdaşlığı

Azərbaycan-Özbəkistan Strateji Tərəfdaşlığı

25.08.2026 [13:47]

Azərbaycan Respublikasının Prezidenti cənab İlham Əliyevin Özbəkistanın
Milli İnformasiya Agentliyinə verdiyi müsahibə iki qardaş ölkə arasında strateji
tərəfdaşlığın və hərtərəfli əməkdaşlığın keyfiyyətcə yeni mərhələyə qədəm
qoyduğunu növbəti dəfə nümayiş etdirdi. Dövlət başçımızın toxunduğu mühüm
məsələlər sırasından xüsusilə nəqliyyat-tranzit sahəsində əldə olunan nəticələr və
perspektiv planlar mərkəzi yer tutur. Şərq ilə Qərb, Şimal ilə Cənub arasında
mühüm körpü rolunu oynayan Azərbaycan və Özbəkistanın nəqliyyat
infrastrukturunun inteqrasiyası regional ticarətin dinamikasına güclü təkan verir və
tranzit yükdaşımalarında misilsiz artımı şərtləndirir.
Son illərdə Mərkəzi Asiya və Cənubi Qafqaz regionlarının artan geoiqtisadi
əhəmiyyəti fonunda Bakı və Daşkənd arasında nəqliyyat-kommunikasiya xətlərinin
inkişafı prioritet istiqamətə çevrilmişdir. Prezident cənab İlham Əliyevin
vurğuladığı kimi, iki ölkə arasında tranzit daşımalarının həcmində müşahidə
olunan davamlı artım təkcə ikitərəfli iqtisadi göstərici deyil, həm də geniş
coğrafiyada sabitliyin və iqtisadi inteqrasiyanın göstəricisidir. Xüsusilə Mərkəzi
Dəhliz (Orta Dəhliz) çərçivəsində həyata keçirilən birgə layihələr Özbəkistan
məhsullarının Xəzər dənizi və Azərbaycan ərazisindən keçməklə Avropa və digər
dünya bazarlarına daha sürətli, təhlükəsiz və səmərəli çıxışını təmin edir.
Tranzit daşımalarındakı bu artım təsadüfi xarakter daşımır. Azərbaycanın
modernləşdirilmiş nəqliyyat infrastrukturu — Bakı Beynəlxalq Dəniz Ticarət
Limanı, yenidən qurulmuş dəmir yolu şəbəkələri, yeni avtomobil magistralları və
müasir logistika mərkəzləri Mərkəzi Asiya ölkələrinin, o cümlədən Özbəkistanın
artan yük axınını tam həcmdə qəbul etməyə imkan verir. Eyni zamanda,
Özbəkistanda nəqliyyat sektorunun liberallaşdırılması, ixrac və tranzit
potensialının artırılması istiqamətində atılan addımlar Azərbaycanın tranzit
imkanları ilə mükəmməl vəhdət təşkil edir.
Müsahibədə qeyd olunduğu kimi, yükdaşımaların həcminin artmasında
gömrük və sərhəd-keçid prosedurlarının sadələşdirilməsi, rəqəmsal
texnologiyaların tətbiqi və vahid tarif siyasətinin formalaşdırılması müstəsna rol
oynayır. İki ölkənin aidiyyəti qurumları arasında sıx koordinasiya nəticəsində
logistik zəncir boyu vaxt itkisi minimuma endirilmiş, yükdaşıyanlar üçün cəlbedici
şərait yaradılmışdır. Bu da öz növbəsində təkcə dövlət şirkətlərinin deyil, özəl
sektorun və beynəlxalq logistika operatorlarının da sözügedən marşruta marağını
dəfələrlə artırmışdır.

Nəqliyyat-tranzit əlaqələrinin genişlənməsi təkcə yük həcmlərinin göstəricisi
ilə məhdudlaşmır. Bu proses regionda yeni iş yerlərinin açılmasına, infrastruktur
layihələrinə investisiya axınının güclənməsinə və kiçik, orta sahibkarlığın
inkişafına birbaşa təkan verir. Bakı-Tbilisi-Qars dəmir yolu xəttinin ötürmə
qabiliyyətinin genişləndirilməsi və Azərbaycanın Xəzərdəki ən böyük ticarət
donanmasına sahib olması Özbəkistandan gələn yüklərin Qərb istiqamətində
maneəsiz hərəkətini zəmanət altına alır.
Azərbaycan Respublikasının Prezidenti cənab İlham Əliyevin Özbəkistan
Milli İnformasiya Agentliyinə verdiyi müsahibə bir daha göstərdi ki, Bakı və
Daşkənd arasında strateji dialoq yüksək səviyyədədir və konkret praktiki nəticələrə
söykənir. Tranzit daşımalarında əldə olunan dinamik artım Azərbaycan və
Özbəkistanın geosiyasi çəkisini artırmaqla yanaşı, Avrasiya məkanında nəqliyyat
xəritəsinin yenidən formalaşmasında aparıcı amillərdən birinə çevrilmişdir.
Geoiqtisadi çağırışların artdığı müasir dövrdə iki qardaş dövlətin nəqliyyat və
logistika sahəsindəki güclü tərəfdaşlığı regionun uzunmüddətli inkişafı,
təhlükəsizliyi və rifahı üçün etibarlı bünövrə rolunu oynayır.
Varis Rüstəmov,
Yeni Azərbaycan Partiyası Sabirabad rayon təşkilatının sədri