Füzuli – Zəfərin və dirçəlişin ünvanı

Bakı:

25 °C

73 %

8 m/s

Əlaqə

AZ RU EN

Ana səhifə / YAP xəbərləri / Füzuli – Zəfərin və dirçəlişin ünvanı

Füzuli – Zəfərin və dirçəlişin ünvanı

16.10.2026 [12:10]

Hər bir xalqın tarixində elə günlər var ki, həmin günlər milli yaddaşın ayrılmaz hissəsinə çevrilərək gələcək nəsillər üçün qürur və iftixar mənbəyi olur. 17 oktyabr – Füzuli Şəhər Günü Azərbaycan xalqının yaddaşında məhz belə bir tarixdir. Bu gün təkcə bir şəhərin işğaldan azad edilməsinin ildönümü deyil, həm də milli iradəmizin, sarsılmaz Vətən sevgimizin və tarixi ədalətin təntənəsidir.

2020-ci il oktyabrın 17-də Vətən müharibəsinin gedişində Azərbaycan Ordusu Füzuli şəhərini işğaldan azad edərək tariximizin şanlı səhifələrindən birini yazdı. Otuz ilə yaxın doğma yurd həsrəti ilə yaşayan füzulililərin qəlbində azadlıq ümidi yenidən gerçəyə çevrildi. Bu tarixi Zəfər Azərbaycan əsgərinin qəhrəmanlığının, xalqımızın birliyinin və dövlətimizin qətiyyətli siyasətinin parlaq təcəssümü oldu. Füzulinin azadlığı uğrunda canlarından keçən şəhidlərimizin müqəddəs xatirəsi xalqımızın qəlbində daim yaşayacaq, qazilərimizin şücaəti isə gələcək nəsillər üçün vətənpərvərlik nümunəsi olaraq qalacaq.

Füzulinin azad edilməsi yalnız hərbi qələbə deyil, həm də xalqımızın öz tarixi torpaqlarına qayıdış yolunda mühüm mərhələ idi. İşğal illərində şəhərin və kəndlərin dağıdılması, tarixi-mədəni irsə vurulan ziyan bu torpaqların üzləşdiyi ağır faciəni nümayiş etdirirdi. Lakin Azərbaycan xalqının iradəsini sındırmaq, onun doğma yurda bağlılığını unutdurmaq mümkün olmadı. Xalqımız inamını qorudu, dövlətimiz isə qarşıya qoyduğu tarixi məqsədə nail oldu.

Möhtərəm Prezident, Müzəffər Ali Baş Komandan İlham Əliyevin rəhbərliyi ilə qazanılmış tarixi Zəfərdən sonra Füzulidə genişmiqyaslı bərpa və quruculuq işlərinə başlanıldı. Bu gün şəhərdə müasir infrastruktur yaradılır, yollar çəkilir, yaşayış binaları, sosial obyektlər və digər mühüm layihələr həyata keçirilir. Füzuli Beynəlxalq Hava Limanının istifadəyə verilməsi isə Qarabağın nəqliyyat imkanlarının genişləndirilməsi, bölgənin ölkəmizin digər əraziləri və beynəlxalq məkanla əlaqələrinin gücləndirilməsi baxımından mühüm əhəmiyyət daşıyır. Bütün bunlar dövlətimizin işğaldan azad edilmiş ərazilərin dirçəldilməsinə, onların iqtisadi potensialının reallaşdırılmasına və insanların layiqli yaşayış şəraitinin təmin edilməsinə verdiyi böyük önəmin göstəricisidir.

Füzulinin yenidən qurulması Böyük Qayıdış strategiyasının mühüm tərkib hissəsidir. Doğma yurdlarına qayıdan ailələrin evlərində yenidən ocaqların yanması, uşaqların öz doğma torpaqlarında böyüməsi, məktəblərin, mədəniyyət və sosial obyektlərin fəaliyyət göstərməsi azadlığın ən gözəl bəhrəsidir. Çünki torpağın həqiqi dirçəlişi yalnız binaların tikilməsi ilə deyil, orada həyatın canlanması, insanların məskunlaşması, gələcəyə inamla yaşaması ilə ölçülür.

Bu gün Füzuli keçmişin ağrılarını Zəfərin qüruru ilə birləşdirərək yeni inkişaf mərhələsinə qədəm qoyur. Onun müasir siması Azərbaycanın quruculuq qüdrətini, milli həmrəyliyini və gələcəyə yönəlmiş strateji baxışını əks etdirir. Füzuli həm də dünyaya mühüm mesaj verir: Azərbaycan öz torpaqlarını azad etməklə yanaşı, onları yenidən qurmağa, dirçəltməyə və gələcək nəsillərə daha abad şəkildə ötürməyə qadirdir.

17 oktyabr – Füzuli Şəhər Günü münasibətilə bütün xalqımızın, xüsusilə füzulililərin sevincini və qürurunu bölüşürük. Bu əlamətdar gün bizə bir daha xatırladır ki, milli birlik, güclü dövlətçilik və Vətənə sədaqət ən çətin sınaqlardan belə qalib çıxmağın əsas şərtləridir.

Füzuli bu gün Zəfərin, qayıdışın və quruculuğun rəmzidir. Onun yenidən dirçələn küçələri, ucalan binaları və doğma torpağına qayıdan insanları Azərbaycanın qalib ruhunun canlı təcəssümüdür. Bu torpaqlarda həyatın əbədi davam etməsi isə xalqımızın ən böyük arzularından birinin gerçəkləşməsidir.

Ramil Qurbanov
YAP Qazax rayon təşkilatının partiya veteranı

Paylaş:

Baxılıb: 16 dəfə

Xəbər lenti

Hamısına bax