YAP Mingəçevir şəhər təşkilatının Seçki Qərargahı uğurla fəaliyyətə başlayıb

Bakı:

24 °C

47 %

3 m/s

Əlaqə

AZ RU EN

Ana səhifə / YAP xəbərləri / YAP Mingəçevir şəhər təşkilatının Seçki Qərargahı uğurla fəaliyyətə başlayıb

YAP Mingəçevir şəhər təşkilatının Seçki Qərargahı uğurla fəaliyyətə başlayıb

19.08.2015 [09:55]

Qərargahda seçki kampaniyasını həyata keçirmək üçün bütün imkanlar mövcuddur
Yeni Azərbaycan Partiyası (YAP) bütün seçkilərdə olduğu kimi, noyabrın 1-də ölkəmizdə keçiriləcək növbəti parlament seçkilərinə də ciddi şəkildə hazırlaşır. Partiyanın tədbirlər planına uyğun olaraq bütün yerli strukturlar bu kampaniyaya səfərbər edilib. Bu məqsədlə yerli təşkilatlarda fəal seçki qərargahları yaradılıb. YAP-ın Mingəçevir şəhər təşkilatında da 18 nəfərdən ibarət Seçki Qərargahı fəaliyyət göstərir.
Təşkilatın sədri Cavanşir Yusubov bildirib ki, qərargahın işinə partiya fəalları və seçki təcrübəsi olan YAP üzvləri cəlb olunublar: “Partiyanın İcra Katibliyinin tövsiyə və tapşırıqlarına uyğun olaraq işimizi qurmuşuq. Artıq seçki məntəqələri üzrə məşvərətçi və müşahidəçilərin siyahıları bir daha dəqiqləşdirilərək hazırlanıb. Həmçinin, Yeni Azərbaycan Partiyasının namizədinin xeyrinə imza toplayanların siyahısı hazırlanıb. Bundan əlavə, seçicilərin siyahısı da daima dəqiqləşdirilir. Bununla yanaşı, seçki məntəqələri üzrə partiya üzvlərinin siyahısı da hazırdır”.
Mingəçevirdə əhalinin sayının 100 mindən çox olduğunu diqqətə çatdıran C.Yusubov seçicilərin iki - 47 saylı Mingəçevir və 49 saylı Yevlax-Mingəçevir seçki dairələrində səs verəcəyini qeyd edib. Mingəçevir şəhəri üzrə seçicilərin sayı 49267 nəfərdir. Onun sözlərinə görə, 47 saylı seçki dairəsi üzrə məntəqələrin sayı 30, seçicilərin sayı isə 37 min 207 nəfərdir. 49 saylı Yevlax-Mingəçevir Seçki Dairəsinin isə Mingəçevir şəhəri üzrə məntəqələrinin sayı 12, seçicilərin sayı 12 min 60 nəfərdir. Təşkilat sədri deyib ki, Mingəçevir şəhərində 14 seçki məntəqəsində - 12 veb kamera 47 saylı Mingəçevir seçki dairəsinin, 2 veb kamera isə 49 saylı Yevlax-Mingəçevir seçki dairəsinin seçki məntəqələrində quraşdırılıb.
Seçki Qərargahının üzvlərindən Nurcamal Məmmədova bildirib ki, parlament seçkilərinə hazırlıq böyük məsuliyyət tələb edir: “Biz də bu məsuliyyətli vəzifənin öhdəsindən layiqincə gəlməyə çalışırıq”.
Qərargahın digər üzvü Bəxtiyar Mustafayev də parlament seçkilərinin əhəmiyyətini vurğulayıb: “Bu seçkilərə nəinki ölkəmizdə, eləcə də, dünyada böyük maraq var. Yüzlərlə əcnəbi müşahidəçi ölkəmizdə seçki prosesini izləyir. Bu seçkiləri yüksək səviyyədə keçirməklə Azərbaycanın demokratik ölkə olduğunu bir daha dünyaya nümayiş etdirəcəyik”.
Xatırladaq ki, YAP Mingəçevir şəhər təşkilatı Seçki Qərargahı seçki ilə bağlı bütün maddi-texniki təchizatla təmin olunub. Bir sözlə, qərargahda seçki kampaniyasını uğurla həyata keçirmək üçün bütün imkanlar mövcuddur.
N.BAYRAMLI

Paylaş:

Baxılıb: 838 dəfə