YAP Yasamal rayon təşkilatı Prezident İlham Əliyevin yenidən dövlət başçısı seçilməsinin 1 illiyi ilə bağlı tədbir keçirib

Bakı:

26 °C

54 %

3 m/s

AZ RU EN

Ana səhifə / YAP xəbərləri / YAP Yasamal rayon təşkilatı Prezident İlham Əliyevin yenidən dövlət başçısı seçilməsinin 1 illiyi ilə bağlı tədbir keçirib

YAP Yasamal rayon təşkilatı Prezident İlham Əliyevin yenidən dövlət başçısı seçilməsinin 1 illiyi ilə bağlı tədbir keçirib

05.04.2019 [09:32]

Aprelin 4-də Yeni Azərbaycan Partiyasının (YAP) Yasamal rayon təşkilatı Azərbaycan Respublikasının Prezidenti İlham Əliyevin növbəti dəfə dövlət başçısı seçilməsinin 1 ilinin tamam olması münasibətilə tədbir keçirib. Əvvəlcə Aprel döyüşlərində həlak olan şəhidlərimizin xatirəsi 1 dəqiqəlik sükutla yad edilib.
Tədbiri giriş sözü ilə açan YAP Yasamal rayon təşkilatının sədri Tağı Əhmədov son 1 il ərzində ölkədə görülən işlərdən və dövlət başçısının yürütdüyü siyasətdən bəhs edib.
Daha sonra Milli Məclisin Gənclər və idman komitəsinin sədri Ülvi Quliyev çıxış edərək bildirib ki, ötən ilin 11 aprelində keçirilən demokratik, şəffaf və ədalətli seçkilərdə Prezident İlham Əliyevin qalib gəlməsini Onun son 15 il ərzindəki fəaliyyətinə vətəndaşların verdiyi qiymət kimi dəyərləndirmək lazımdır. Ü.Quliyev dövlət başçısının həmişə təhlükəsizlik və sabitlik məsələlərinə böyük əhəmiyyət verdiyini söyləyib: “Çünki cənab Prezident çox gözəl bilir ki, onları əldə etmədən heç bir iqtisadi inkişafa nail olmaq mümkün deyil. Bununla yanaşı, cənab Prezident hər zaman xalqın rifah halının yüksəldilməsini əsas hədəf kimi qarşıya qoyub”.
Deputat diqqətə çatdırıb ki, bir il ərzində Prezidentin fəaliyyəti və gördüyü işlər nəticəsində iqtisadi sahədə böyük uğurlar əldə edilib: “Regionların sosial-iqtisadi inkişafı ilə bağlı 3-cü Dövlət Proqramı da uğurla başa çatıb. Qeyri-neft sektorunun, kiçik və orta sahibkarlığın, kənd təsərrüfatının inkişafı ilə bağlı imzalanan fərmanlar, sərəncamlar, qəbul edilmiş Dövlət proqramları iqtisadiyyatımızın inkişafına öz müsbət töhfələrini verib”.
Ü.Quliyev onu da qeyd edib ki, iqtisadiyyatımız inkişaf etdikcə Azərbaycanda bütün sahələrə, o cümlədən təhsil, səhiyyə, ordu quruculuğu, gənclər və idman sahəsinə də xüsusi diqqət ayrılır.
Tədbirdə çıxış edən millət vəkili Elşad Həsənov da ölkə başçısının 1 il ərzində gördüyü işləri statistik göstəricilərlə nəzərə çatdırıb. O, tədbir iştirakçılarının diqqətini son 1 ildə Prezident İlham Əliyevin iştirakı ilə açılışı baş tutan irimiqyaslı layihələrin həyata keçirilməsinə yönəldib.
Daha sonra çıxış edən “Səs” media qrupunun rəhbəri Bəhruz Quliyevin sözlərinə görə, bu ilin əvvəlindən Prezident İlham Əliyevin imzaladığı müxtəlif Fərman və sərəncamların əksəriyyəti ölkə vətəndaşlarının sosial rifahının yaxşılaşdırılması istiqamətində olub: “Bütün bunların hamısı Prezident İlham Əliyevin hər bir Azərbaycan vətəndaşının Prezidenti olduğunu nümayiş etdirir və buna görə də hər birimiz öz məsuliyyətimizi dərk edərək bu siyasətə dəstək verməliyik”.
“İki sahil” qəzetinin baş redaktoru, YAP Siyasi Şurasının üzvü Vüqar Rəhimzadə isə deyib ki, bir il müddətində görülən işlərə nəzər salanda Azərbaycan xalqının öz seçimində yanılmadığı sübut olunur. Prezident İlham Əliyevin imzaladığı müxtəlif Fərman və sərəncamların əksəriyyəti ölkə vətəndaşlarının sosial rifahının yaxşılaşdırılması istiqamətində olub. V.Rəhimzadənin sözlərinə görə, dövlət başçısının təbii fəlakət və digər hadisələrdən zərər çəkmiş əhalinin yanında olması da xalq-iqtidar birliyinin bariz nümunəsidir: “Əhalinin xüsusi ehtiyacı olan təbəqələrinə verilən sosial müavinətlərin artırılması, şəhid ailələrinə birdəfəlik ödənişlərin verilməsi, əməkhaqlarının, pensiyaların, tələbələrin təqaüdlərinin artırılması, problemli kreditlər, cəza siyasətinin humanistləşdirilməsi ilə bağlı Sərəncam və fərmanları çox mühüm addımlar hesab etmək olar”.
Tədbirə yekun vuran T.Əhmədov Prezident İlham Əliyevin bu ali vəzifəyə seçilməsinin xalqımızın xoşbəxt gələcəyi üçün böyük əhəmiyyətə malik olduğunu dilə gətirərək hamını Azərbaycanın dövlət başçısının ətrafında sıx birləşməyə çağırıb.
Qaşqay ZİYƏDDİNOĞLU

Paylaş:

Baxılıb: 886 dəfə