Azərbaycanlılar Gürcüstandan niyə deportasiya ediliblər?

Bakı:

7 °C

87 %

2 m/s

Əlaqə

AZ RU EN

Ana səhifə / Xəbər lenti / Azərbaycanlılar Gürcüstandan niyə deportasiya ediliblər?

Azərbaycanlılar Gürcüstandan niyə deportasiya ediliblər?

01.02.2022 [10:21]

Viza rejiminin pozulması, qeyri-qanuni yaşamaq...

Pərviz

Ötən il Gürcüstandan 14 Azərbaycan vətəndaşı deportasiya edilib. Bu barədə Gürcüstan Daxili İşlər Nazirliyinin (DİN) hesabatında qeyd olunub. Bildirilib ki, 2021-ci ildə deportasiya edilən Azərbaycan vətəndaşlarından 3-ü kişi, 11-i isə qadın olub. Təkcə ötən ilin oktyabr-dekabr ayları ərzində 6 Azərbaycan vətəndaşı deportasiya edilib.

Azərbaycan ilə Gürcüstan arasında mühüm əməkdaşlıq əlaqələri mövcuddur. Yayılan bu xəbər isə narahatedici məqamlardan xəbər verir. Görəsən, azərbaycanlıların Gürcüstandan deportasiya edilməsinin səbəbləri nədir?

Bununla bağlı qəzetimizə danışan Azərbaycan-Gürcüstan parlamentlərarası əlaqələr üzrə işçi qrupunun rəhbəri Arzu Nağıyev bildirib ki, ortada dövlətlərarası münasibətlərə hər hansı bir xələl gətirəsi məsələ yoxdur. Belə ki, baş verənlər sadəcə qanun pozuntuları ilə bağlı ortaya çıxan problemlərdən qaynaqlanır: “Eyni proseslər Azərbaycanda da olur. Problemin yaranmasına isə bir sıra məsələlər yol açır. Məsələn, viza rejiminin pozulması, qeyri-qanuni yaşamaq kimi hallar bu kimi deportasiyalara səbəb olur. O cümlədən haqqında cinayət işi açılan şəxslər də deportasiya edilərək öz ölkəsinə təhvil verilir. Məsələ bundan ibarətdir. Gürcüstan DİN-in yaydığı məlumat isə illik hesabatdır və orada bu rəqəmlərin əks etdirilməsində qeyri-adi hal yoxdur”.

İki ölkə arasında münasibətlərin yüksək səviyyədə olduğunu diqqətə çatdıran İşçi qrupun rəhbəri bu yaxınlarda Gürcüstan - Azərbaycan parlament dostluq qrupunun rəhbəri, Gürcüstan parlamentinin vitse-spikeri Arçil Talakvadze ilə də görüşdüyünü dilə gətirib. O bildirib ki, Gürcüstanda fəaliyyət göstərən səfirliyimizlə də mütəmadi olaraq əlaqələr saxlanılır. “Mütəmadi olaraq səfirliklə də əlaqələrimiz var. Ortaya çıxan problemlər əsasən xırda qanun pozuntuları ilə bağlı olur ki, bu da öz həllini tapır. Ümumiyyətlə, Gürcüstanla Azərbaycan arasında son dövrlərdə hər hansı bir məsələ ilə bağlı mühüm ziddiyyət müşahidə olunmayıb. Hətta Azərbaycanda yaşayan azərbaycan əsilli Gürcüstan vətəndaşlarının pandemiya dövründə vaksinasiyası ilə bağlı problemin həllinə nail olduq. Üç minə yaxın azərbaycan əsilli Gürcüstan vətəndaşı vaksinasiyadan keçdi. Bundan başqa, II Qarabağ müharibəsində 22 nəfər əslən Gürcüstandan olan azərbaycanlı şəhid olmuşdu. Şəhidlərimizlə bağlı da Gürcüstanda böyük bir tədbir keçirdik. Anım günləri, Zəfər günü ilə bağlı tədbirlər təşkil olunub. Gürcüstan rəhbərliyinin nümayəndələri bu tədbirlərdə iştirak ediblər”, - deyə A.Nağıyev əlavə edib.

Paylaş:

Baxılıb: 766 dəfə