Moskvaya ardıcıl hücumlar...

Ana səhifə / Analitik / Moskvaya ardıcıl hücumlar...

Moskvaya ardıcıl hücumlar...

22.08.2023 [11:23]

Hava limanlarına məhdudiyyət qoyuldu

Y.BAYRAMOVA

Dünən səhər saatlarında Moskvaya yeni dron hücumu qeydə alınıb. Bu barədə Rusiya Müdafiə Nazirliyi məlumat yayıb. Məlumata görə, PUA hava hücumundan müdafiə sistemləri tərəfindən vurulub. Hücumla əlaqədar olaraq hava limanlarına məhdudiyyət qoyulub, uçuşlar digər şəhərlərə yönəldilib.

4 gündə 2 hücum

Qeyd edək ki, bu, dörd gündə Moskvaya ikinci hücumdur. Moskvada hədəflərə hücum etmək istəyərkən hava hücumundan müdafiə sistemi Ukraynaya məxsus PUA-nı vurub. Hadisə avqustun 18-də Moskva vaxtı ilə saat 04:00 radələrində baş verib. Bildirilir ki, pilotsuz təyyarə Rusiya paytaxtının Krasnopresnenskaya sahili yaxınlığında zərərsizləşdirilib. Hücum nəticəsində itki və yanğın olmayıb.

Xatırladaq ki, avqustun 11-də Moskva yenə dron hücumlarına məruz qalıb. PUA hücumu səbəbindən “Vnukovo” hava limanı müvəqqəti bağlanmışdı.

3 ayda 7-ci dron

Qeyd edək ki, bu kimi hadisələr son üç ayda intensiv hal alıb. Belə ki, mayın 3-dən bu yana Moskvaya artıq 7 dəfə bu tip hücumlar müşahidə edilməkdədir. Mayın 3-də paytaxta edilən basqın ən çox rezonans doğuran hadisəyə çevrilmişdi. Ukraynanın iki pilotsuz təyyarəsinin köməyi ilə Rusiya Prezidentinin Kremldəki iqamətgahına zərbə endirməyə cəhd etməsi ilə bağlı yayılan məlumatda bu hücum da terror aktı adlandırılmışdı və Prezident Putinə sui-qəsd kimi qiymətləndirilmişdi. Ehtimallara görə, hücum Ukraynanın UKRJET şirkəti tərəfindən hazırlanmış UJ-22 hava-dronları vasitəsilə həyata keçirilmişdi.

Mayın 30-da da paytaxtın üç istiqamətində - Lenin prospektində, Profsoyuznaya küçəsində və Yeni Moskvanın Atlasova küçəsində bu kimi hücumlar qeydə alınmışdı. Həmin vaxt dronlardan birinin partlamayan KZ-6 formalı yük daşıdığı da məlum olmuşdu. Digər PUA-lar isə Moskvaya yaxınlaşmamış zərərsizləşdirilmişdi.

İyunun 21-də Yeni Moskva və Moskva vilayətlərində üç PUA düşürülmüşdü. PUA-lardan biri Lukino kəndi yaxınlığındakı Paxra çayı vadisinə, digər ikisi isə Moskva vilayətinin Naro-Fominsk rayonunun Kalininets kəndində endirilmişdi. Bu hücum vaxtı Moskva vilayətinin qubernatoru Andrey Vorobyov dağıntı və tələfatın olmadığını diqqətə çatdırmışdı. Rusiya Müdafiə Nazirliyi isə baş verənləri terror aktı kimi qiymətləndirmişdi. Hərbi idarə baş verənlərə görə Ukraynanı günahlandırmışdı.

Ukrayna Silahlı Qüvvələri iyulun 4-də səhər saatlarında Moskva şəhərinin Yeni Moskva rayonuna bir neçə pilotsuz uçuş aparatı ilə hücum edib. Bu barədə açıqlama verən Moskvanın meri Sergey Sobyanin hücum nəticəsində itki və dağıntının qeydə alınmadığını bildirmişdi. Hücum Vnukovo hava limanı yaxınlığında yerləşən hərbi hissəyə və aviabazaya edilmişdi. Nəticədə hava limanının fəaliyyətində tətbiq olunan məhdudiyyət aradan qaldırılmışdı.

Ukrayna “yaxasını kənara çəkir”

Baş verənlərdə ən maraqlı hal isə Ukraynanın da bu məsələdən “boyun qaçırması” sayıla bilər. Daha doğrusu, hələ ilk hücum zamanı, mayın 3-də Ukrayna prezidenti Volodimir Zelenski Rusiyanın Kreml Sarayına pilotsuz təyyarə hücumunun arxasında Ukraynanın olması ilə bağlı iddialarını rədd etmişdi. Ukrayna tərəfi iddia etmişdi ki, belə bir hücumla əlaqələri yoxdur. Bunu Qərbin hərbi mütəxəssisləri də “təsdiqləmişdi”. Əsas kimi isə Moskvanın ən müasir raket əleyhinə qurğularla mühafizə olunmasını göstərmişdilər. Beləliklə, Kremlə qarşı hər hansı bir hücum haqda iddia etmək hərbi cəhətdən mümkünsüz sayılmışdı.

Rusiya üçün “bəhanə”...

Baş verənlərdə ən mühüm nüans “nüvə təhlükəsi” təhdidinin olması kimi irəli sürülür. Siyasi mütəxəssislər ortada bəzi “təsadüf”ləri nəzərə alır. Hər dəfə Moskvaya hücum edildiyi haqda informasiyaların ardından ya cəbhə bölgəsində güclü hücum müşahidə olunur, ya da Ukraynaya nüvə silahı atıla bilməsi haqda informasiyalar yayılır. Beləliklə, Qərb mütəxəssisləri Moskvaya hücumun arxasında fərqli məsələlərin dayandığını iddia edirlər. Onlara görə, yeni PUA hücumları qarşıdakı müddətdə də Rusiya üçün əla bir “bəhanə” rolunu oynaya bilər...

Paylaş:

Baxılıb: 192 dəfə