Azərbaycanda yeni investisiya bumu başlayır

Bakı:

14 °C

82 %

7 m/s

Əlaqə

AZ RU EN

Ana səhifə / Gündəm / Azərbaycanda yeni investisiya bumu başlayır

Azərbaycanda yeni investisiya bumu başlayır

04.03.2011 [18:46]

Prezident İlham Əliyev: İndi biz ikinci böyük investisiya qoyuluşunun astanasındayıq
Azərbaycanda həyata keçirilən düşünülmüş siyasət sayəsində ölkəmizin maliyyə qüdrəti artmaqdadır. Prezident İlham Əliyev bildirib ki, respublikamız güclü maliyyə resurslarına malikdir və bölgədə ən iri kommunikasiya-infrastruktur layihələrinin reallaşmasının təşəbbüskarıdır. Azərbaycan xarici dövlətlərlə strateji nəqliyyat-kommunikasiya layihələrində iştirak etməklə yanaşı, həm də öz maliyyə qüdrəti hesabına ən iri regional layihəni belə maliyyələşdirmək gücünə qadirdir: “Biz artıq tam hazırlıqlı vəziyyətdəyik. Biz bütün lazımi işləri görmüşük və böyük sərmayələrin qoyuluşuna da hazırıq. Hesab edirəm ki, bu il və ondan sonrakı illərdə Azərbaycanın energetika, neft-qaz, xüsusilə qaz sektoruna milyardlarla dollar vəsait qoyulacaqdır. Həm ölkə iqtisadiyyatı, həm də özəl sektor buna hazır olmalıdır. Sirr deyil ki, neft strategiyamızın icrası hesabına yüzlərlə Azərbaycan şirkəti kontraktlar alıblar və o imkanlardan bəhrələniblər. O şirkətlər neft sənayesində görülmüş işlər hesabına maliyyə imkanlarını genişləndiriblər. İndi biz ikinci böyük investisiya qoyuluşunun astanasındayıq. Artıq biz buna daha da hazırıq. Sadəcə olaraq, mən özəl sektora bildirmək istəyirəm ki, onlar da qoyulacaq bu böyük investisiyaların icrasında fəal iştirak etsinlər, xaricdən Azərbaycanın qaz sektoruna qoyulacaq pulların böyük hissəsi Azərbaycan şirkətləri tərəfindən öz həllini tapsın və Azərbaycan şirkətləri bundan bəhrələnsinlər”.
17 il əvvəl əsası qoyulmuş yeni neft strategiyasının mühüm uğurları artıq Azərbaycanı inkişaf etmiş dövlətə çevirib və ölkəmizin güclü maliyyə resursları formalaşıb. Həmin ehtiyatların ilbəil artım dinamikası həm iqtisadiyyatın pozitivlik tempini yüksəldib, həm də neftdən kənar sahələrin dayanıqlı inkişafına zəmin yaradıb. Bunun nəticəsidir ki, neft kapitalının baza investisiyası kimi qeyri-neft sektoruna yatırılması real sektorun bütün bölmələrində dinamizmi möhkəmləndirib. Düşünülmüş neft strategiyasının həyata keçirilməsi, eyni zamanda, iqtisadiyyatın strukturunda keyfiyyət dəyişiklikləri yaradıb. Bu isə modern texnologiyalara və innovasiyalara əsaslanan yeni iqtisadi modelin əsas komponentlərini təşkil etməkdədir. Beləliklə, Azərbaycan iqtisadiyyatın şaxələndirilməsini genişləndirməklə maliyyə mənbələrini möhkəmləndirmiş olur.
Güclü maliyyə mənbələrinin formalaşması isə Azərbaycanın özünün potensial investor statusunu möhkəmləndirir. Respublikamız hazırda sərmayə portfelinin daha səmərəli və valyutatutumlu bölmələrə yönləndirilməsini nəzərdən keçirir. Artıq bu istiqamətdə konkret istiqamətlər də məlumdur və yeni investisiya bumunun çoxşaxəli iqtisadiyyatın inkişafının sürətlənməsini əhatə edəcəyi şübhə doğurmur. Bura həm yeni neft və qaz layihələrinin maliyyələşdirilməsi, həm də özəl biznesə dövlətin maliyyə dəstəyinin gücləndirilməsi, eləcə də, regional miqyaslı layihələrə ölkəmizin böyük həcmdə maliyyə axınlarının yönəldilməsi daxildir. Məlum olduğu kimi, Azərbaycan hökuməti özəl biznesə və milli sahibkarlıq sektorunun güclənməsinə mühüm əhəmiyyət verir və bu məqsədlə növbəti illərin investisiya proqramlarında da bu sahə prioritet kimi diqqətdə saxlanılacaq. Ən əsası isə ölkənin regionları xüsusi olaraq sərmayə qoyuluşlarının ünvanı olacaq. Yəni, yeni investisiya bumu bölgələrin inkişaf mərhələsinin yeni dövründə başlıca strateji məqsədlərdən biri olacaq.
Yeni investisiya bumunun başlıca tələblərindən biri xarici dövlətlərin infrastruktur və valyuta gətirə biləcək iqtisadi bölmələrinə sərmayələrin yönəldilməsidir. Bura region ölkələrinin yanacaq-energetika, sənaye, neft-kimya, maliyyə bazarlarına sərmayə qoymaqla yanaşı, Avropa bazarlarında rəqabətqabiliyyətli məhsulların ixracını reallaşdırmaq kimi strateji məqsədlər də daxildir. Dövlət başçısının qeyd etdiyi kimi, indi yeni imkanlar yaranıb və buna uyğun olaraq addımlar atmaq vacibdir: “ölkə iqtisadiyyatı və ölkədə yaranan maliyyə resursları tələb edir ki, biz xarici bazarlara çıxaq. Xarici bazarlara isə ancaq rəqabətqabiliyyətli məhsullarla çıxa bilərik. Biz çalışmalıyıq ki, nəinki xarici bazarlara çıxarmaq üçün, ölkə daxilində istehlak olunan mallar da yüksək standartlara cavab verməlidir”.
Dünya iqtisadi sistemində gedən proseslər, postneft mərhələsində ölkənin tarazlı və davamlı iqtisadi inkişafının təmin edilməsi və yeni dövrün reallıqları yaranmış inkişaf modelinin tədqiqini zəruri edir. Liberal bazar iqtisadiyyatı mexanizmlərini tətbiq edən Azərbaycan artıq yeni əsrin birinci onilliyində tamamilə rəqabətə söykənən bazar münasibətlərini möhkəmləndirməklə uğurlu nəticələrə nail olub. Tam şəkildə bazar iqtisadiyyatına keçən, iqtisadiyyatı liberal iqtisadiyyat olan və müstəqil, dayanıqlı, öz resurslarına güvənən, dünya birliyinə sürətlə inteqrasiya edən Azərbaycan yeni dövrün reallıqlarına uyğun siyasət həyata keçirməkdədir.
XXI əsrin ikinci onilliyində meydana çıxan siyasi-sosial, iqtisadi islahatların dinamikası və yeni dövrün qlobal çağırışları tamamilə müasir iqtisadi modelə ehtiyac yaradır. Son bir ildə qeyri-neft bölməsində intensiv inkişaf dinamikasının müşahidə olunması, neft sektoru ilə müqayisədə artım tempinin 2,5 dəfə çox olması bu sahədə proqressiv tendensiyanı möhkəmləndirir.
ELBRUS CƏFƏRLİ

Paylaş:

Baxılıb: 1046 dəfə