Hidayət Heydərov: Bütün titulları qazansam da, onları ikiqat artırmaq istəyirəm

Bakı:

23 °C

60 %

6 m/s

Əlaqə

AZ RU EN

Ana səhifə / İdman / Hidayət Heydərov: Bütün titulları qazansam da, onları ikiqat artırmaq istəyirəm

Hidayət Heydərov: Bütün titulları qazansam da, onları ikiqat artırmaq istəyirəm

11.06.2025 [22:21]

Avropa Cüdo Birliyinin (EJU) rəsmi saytı Azərbaycanın Olimpiya və dünya çempionu Hidayət Heydərovla bağlı yazı dərc edib.

AZƏRTAC xəbər verir ki, məqalədə idmançının Budapeştdə keçiriləcək cüdo üzrə dünya çempionatında yenidən tatamiyə çıxacağı, karyerası ərzində bütün titullara yiyələnməsinə baxmayaraq, hələ də motivasiyalı olduğu bildirilib.

Qeyd edilib ki, 73 kiloqram çəki dərəcəsində Parisdə Olimpiya çempionu olan Heydərov üçün 2024-cü il əlamətdar olub: “O, həmçinin dünya və Avropa çempionatlarında da qızıl medal qazanaraq cüdo tarixində unikal nəticəyə imza atıb. Bu uğurlardan sonra ona bir qədər fasilə lazım gəlib”.

“İki Olimpiya çempionumuzun həm rəsmi tədbirlərdə iştirak, həm də federasiya ilə bağlı bir çox öhdəlikləri var idi. Özlərinə vaxt ayırmaq üçün istirahətə ehtiyac duydular. Fevraldan etibarən yenidən hazırlıqlara başladıq. Hazırda 100 faiz formamızda olmasaq da, bu narahatedici deyil. Ən vacibi, yüksək əyarlı medallar uğrunda mübarizə zamanı tam hazır olmaqdır. Bu il dünya çempionatında uğurlu çıxış gözləyirəm. Amma federasiya olaraq bizim növbəti əsas hədəfimiz gələn il Bakıda keçiriləcək dünya çempionatıdır” , - Azərbaycan milli komandasının baş məşqçisi Riçard Trautman hələ Podqoritsada keçirilən Avropa çempionatı zamanı bunları söyləmişdi.

Bunun Heydərov üçün də xüsusi motivasiya mənbəyi olduğu vurğulanıb: “O, bu ilin aprelində Avropa çempionatında tatamiyə qayıtmaq istəyirdi. Lakin xəstələndiyi və tam sağalmadığı üçün yarışda iştirak edə bilməyib. Bununla belə, Podqoritsaya gedərək “İlin kişi cüdoçusu” mükafatını qəbul edib və komanda yoldaşlarına dəstək olub”.

“Sadəcə çəki itirmişdim və 10 ay sonra geri döndüm. Yenidən məşqlərə başlamaq və əvvəlki formaya qayıtmaq asan deyil, amma qarşıdakı yarışlarda qalib gəlmək istəyirəm. Bütün titulları qazansam da, onları ikiqat artırmaq niyyətindəyəm” , - 27 yaşlı cüdoçu deyib.

Olimpiya çempionu olmaq və ölkədə cüdonun simasına çevrilmək Heydərovun həyatında çox şeyi dəyişib: “Çox şey dəyişdi, amma ən önəmlisi budur ki, artıq tanınmış bir şəxsə çevrilmişəm. Bu məqamı sevirəm, çünki yeni nəslə nümunə olduğumu hiss edirəm”. Azərbaycanda küçədə gəzərkən və ya restoranda olarkən insanlar ona yaxınlaşır, avtoqraf istəyir və onunla şəkil çəkdirirlər. Heydərov isə bu diqqətdən narahat olmadığını bildirir.

Hidayət artıq diqqətini yenidən tam şəkildə cüdoya yönəldib. “Cüdo mənim üçün sadəcə bir idman növü deyil. Bu, mənim həyat yolumdur. Bu yolda isə geriyə baxmaq yoxdur – yalnız irəli,” - təsadüfi deyil ki, bir müddət öncə Heydərov şəxsi instaqram hesabında bunları yazmışdı.

Gündəlik məşq rejiminə qayıtmaq asan olmasa da, cüdoya olan sevgisi daha üstün gəlib: “Cüdo daha şəffaf və dürüstdür. Mən bu idmanı sevirəm, çünki burada hər kəs bir ailə kimidir. Hamı bir-birinə və müxtəlif mədəniyyətlərə hörmətlə yanaşır”.

Sonda bildirilib ki, Hidayət Heydərov dünya və Olimpiya çempionu statusu ilə Budapeştdə keçiriləcək dünya çempionatında yenidən tatamiyə çıxmaq üçün ciddi şəkildə hazırlaşıb.

Paylaş:

Baxılıb: 548 dəfə