"Yeni Azərbaycan" 1/4 finala vəsiqə qazanan ilk komanda oldu

Bakı:

4 °C

70 %

7 m/s

Əlaqə

AZ RU EN

Ana səhifə / İdman / "Yeni Azərbaycan" 1/4 finala vəsiqə qazanan ilk komanda oldu

"Yeni Azərbaycan" 1/4 finala vəsiqə qazanan ilk komanda oldu

30.06.2009 [09:55]

“Xatirə Kuboku” turnirində ikinci turun oyunları keçirildi
“Yeni Azərbaycan” qəzetinin təşkilatçılığı ilə ümummilli lider Heydər Əliyevin Azərbaycanda ilk dəfə hakimiyyətə gəlməsinin 40 illiyinə həsr edilən kütləvi informasiya vasitələrinin komandaları arasında “Xatirə Kuboku” futzal turnirində ikinci turun oyunları keçirildi. Artıq bu turdan sonra qruplardan hansı komandaların növbəti mərhələyə vəsiqə qazandığı demək olar ki, müəyyənləşdi. üçüncü turun oyunları isə sadəcə qrup birincilərini müəyyən etmək baxımından əhəmiyyətli olacaq.
A qrupunun favoritləri keçirilən iki turdan sonra bu adı doğruldublar. Belə ki, qrupdan növbəti mərhələyə vəsiqəyə ən real iki namizəd “Yeni Azərbaycan” qəzetinin komandası ilə AzTV-nin “Telefortuna”sı bu məsələni artıq həll ediblər. Qalır qrupda kimin birinci, kimin ikinci olmasını müəyyən etmək. Deməli, bu həftəsonu keçiriləcək üçüncü turda azarkeşlər maraqlı mübarizənin şahidi olacaqlar. çünki ilk iki turu qələbə ilə başa vuran “Yeni Azərbaycan”la AzTV iyulun 4-də qrupda kimin güclü olduğunu öz aralarında müəyyən edəcəklər. Maraqlıdır ki, ilk iki turdan sonra turnirin bombardirliyi uğrunda mübarizə də məhz bu iki komandanın üzvləri arasında gedir. “Yeni Azərbaycan”ın komandası ikinci turu texniki qələbə ilə başa vurduğundan televiziyaçılar bundan maksium yararlanıblar. Daha doğrusu, AzTV-nin forvardı Elnur Əşrəfoğlu “Səs” qəzetinin komandasının qapısından 8 top keçirməklə bombardirlər siyahısında liderliyi ələ keçirib. Məsələ ondadır ki, E.Əşrəfoğlu ilk turda da 5 qol vurduğu üçün hazırda 13 qolla turnirin bombardiridir. “Yeni Azərbaycan”ın hücumçusu Ramil Vəlibəyov isə 11 qolla, hələlik, bu siyahıda ikincidir.
Qeyd edək ki, ikinci turda qəzetimizin komandası “Həftə içi”ndən olan həmkarlarımızla qarşılaşmalı idi. Amma həmkarlarımızın heyətində qəzet işçisi olmayan, mətbuat sahəsində çalışmayan bir neçə şəxsin oynadığı ilə bağlı şübhələr var idi. Təşkilat Komitəsi bu məsələni araşdıraraq narazılığını “Həftə içi” qəzetində çalışan həmkarlarımızın diqqətinə çatdırdı. Buna baxmayaraq, həmin şəxslər yenə də heyətdə olduqlarına görə, Təşkilat Komitəsi bu turda “Həftə içi”nin komandasına texniki məğlubiyyət verdi. Bu isə “Yeni Azərbaycan”ın aktivinə növbəti üç xalın yazılması və komandamızın turnir iştirakçıları arasında 1/4 final mərhələsinə ilk vəsiqə qazanan komanda olması demək idi.
Qrupun digər favoriti olan AzTV-nin futbolçuları “Səs” qəzetində çalışan həmkarlarımızı 14-3 hesabı ilə məğlub edərək kuboka iddialarını bir daha nümayiş etdirmiş oldular.
B qrupunda da vəziyyət təxminən oxşardır, “Lider TV” ilə “Zaman”+”çempion” birgə komandası ilk iki turu qələbə ilə başa vurub. Bu qrupda birinci olacaq komandanın adı həftəsonu keçiriləcək turda müəyyənləşəcək. Başa çatan son turda “Lider TV” “Səs” İnformasiya Agentliyinin komandasını 10-6 hesabı ilə məğlub etməklə aktivinə 3 xal yazdı. Turnirin iddialı komandalarından olan “Zaman”+”çempion” birgə komandası da onlardan geri qalmayaraq “AzərTAc”ın komandasını 10-5 hesabı ilə məğlub etdi. Deməli, həftəsonu keçiriləcək turda iki komandadan hansının daha güclü olduğu aydınlaşacaq. Bu qrupda “AzərTAc”la “Səs” İnformasiya Agentliyi üçün mübarizə artıq bitib və onlar üçün son tur, sadəcə, prestij baxımından əhəmiyyətlidir.
C qrupunda vəziyyət bir qədər fərqlidir. “Şərq”+”525-ci qəzet”in birgə komandası bu tur “Kaspi” ilə çətin oyun keçirdi. Bərabər mübarizə şəraitində keçən oyunu birləşmiş komanda 8-6 hesabı ilə qalib başa vuraraq növbəti mərhələyə vəsiqə qazandı. “Palitra”+”Paritet”in birləşmiş komandası isə “Olaylar” üzərində 12-9 hesabı ilə qələbə qazandı. İki turda məğlub olan “Olaylar” mübarizəni artıq dayandırıb. Növbəti mərhələyə ikinci vəsiqənin sahibi üçüncü turda keçiriləcək “Kaspi”-”Palitra”+”Paritet” oyunundan sonra müəyyənləşəcək.
D qrupunda da gərgin mübarizə gedir. “Televiziyalar qrupu” da adlandırılan qrupda 3 televiziyanın komandası mübarizə aparır. İlk turda məğlub olan ANS bu turda ATV üzərində 11-3 hesabı ilə qələbə qazanmaqla mübarizəni davam etdirir. Qrupun favoriti olan “Xəzər TV” ilk turda olduğu kimi, bu turu da yüksək səviyyədə keçirərək “İki sahil”i 10-2 hesabı ilə məğlub etdi. Bu qələbədən sonra “Xəzər TV” 1/4 finala vəsiqəni özü üçün təmin edib. Qrupda ANS və ATV-nin aktivində bir qələbə və bir məğlubiyyət var. Ona görə də, bu qrupda da ikinci vəsiqənin sahibi qrupun son oyununda müəyyənləşəcək.

Paylaş:

Baxılıb: 1338 dəfə