Əmlakını sığortalamayanların diqqətinə!

Bakı:

24 °C

52 %

10 m/s

Əlaqə

AZ RU EN

Ana səhifə / İqtisadiyyat / Əmlakını sığortalamayanların diqqətinə!

Əmlakını sığortalamayanların diqqətinə!

02.06.2023 [11:22]

Cərimələr xeyli müddətdir qüvvədədir

Daşınmaz əmlakın 80 faizə yaxını sığortasızdır

Günel ABBASOVA

Son günlər sığorta şirkətləri medianın imkanlarından istifadə edərək mənzilini sığorta etdirməyən vətəndaşları sığorta prosesinə cəlb etməyə çalışırlar. Onlar rəsmi xəbərdarlıqlar yayaraq iddia edirlər ki, iyunun 1-dək mənzilini sığorta elətdirməyənlər cərimə ediləcək. Sığorta şirkətlərinin təkid adlandırdıqları proses bir qədər məcbur etmə məsələsinə çevrildiyi üçün bununla bağlı hətta TV kanallarında da “iqtisadçıların” açıqlamalarına rast gəlirik. Amma maraqlıdır ki, bu “iqtisadçılar” cərimənin hansı qanunun hansı maddəsi ilə gerçəkləşdiriləcəyinə aydınlıq gətirməkdən yayınırlar. Bu da cəmiyyətdə müəyyən sualların yaranması ilə nəticələnir. Elə oxucularımız tərəfindən də məsələnin doğruluq payı barədə çoxsaylı suallar ünvanlanır.

Sözügedən sığorta cərimələri barədə sual doğuran bütün məqamların cavabını iqtisadçı Vüqar Bayramov “Yeni Azərbaycan”a açıqlamasında ətraflı şəkildə izah edib. O bildirib ki, bəzi sığorta şirkətləri mənzillərə xəbərdarlıqlar göndərərək əmlakını sığortalamayanların iyunun 1-dən cərimələnəcəyini bildiriblər: “Bu məsələ ilə bağlı müraciətlərin sayının çox olduğunu nəzərə alaraq bildirmək istərdik ki, mənzillərin icbari sığortası ilə bağlı xəbərdarlıqlar rəsmi deyil. Qanunvericilikdə mənzilini icbarı sığorta etdirməyənlər üçün cərimələr nəzərdə tutulsa da, bu cərimələr artıq xeyli müddətdir ki, qüvvədədir, yəni, onun 1 iyun tarixi ilə heç bir əlaqəsi yoxdur. Qeyd edək ki, Bakıdakı ev və mənzillərin illik sığorta haqqı 50, Gəncə, Sumqayıt və Naxçıvan şəhərlərində 40, digər şəhər və rayonlarda isə 30 manatdır. Müvafiq olaraq paytaxtdakı mənzillərə 25 min, Gəncə, Sumqayıt və Naxçıvan şəhərlərindəki mənzillərə 20 min, digər şəhər və rayonlardakı mənzillərə isə 15 min manat sığorta təminatı verilir”.

Onun sözlərinə görə, daşınmaz əmlakın icbari sığortasına dair qanunun hələ bir neçə il əvvəl qüvvəyə minməsinə baxmayaraq sığorta haqqının yığılmasında çətinliklər qalmaqdadır: “Daşınmaz əmlakın təxminən 80 faizə yaxını hələ də sığortasızdır. Nəticədə icbari sığortadan istifadə edilmədiyi üçün əmlaka fərqli səbəblərdən ziyan dəyən zaman ödənişlər həyata keçirilmir. Halbuki, icbari sığortadan istifadə əmlaka dəymiş ziyanın şirkət tərəfindən qarşılanmasına gətirib çıxara bilər.

Bununla belə, sığorta mexanizminin təkmilləşdirilməsinə də ehtiyac var. Çünki elə əmlaklar var ki, onlar mütəmadi sığorta olunurlar, həmin əmlaklara ziyan dəymir. Belə əmlaka ziyan dəymədiyi üçün illərlə sığortadan istifadə etmirlər. Hazırda əmlakın sığortalanmasında fiks-vahid tariflər tətbiq olunur. Məsələn, iki vətəndaş əmlakını sığortalayıbsa, onlardan biri son beş ildə sığortadan istifadə etməyibsə, digər vətəndaş isə əmlakını sığortalayıb, son beş ildə iki dəfə sığorta hadisəsi baş veribsə, yenə də hər iki vətəndaşın sığorta haqqı eynidir. Buna görə də sığorta hadisəsi baş verməyən əmlaklar üçün daha aşağı tariflərin müəyyənləşdirilməsi məqsədəuyğun olardı. Bu, təbii olaraq, imkan verəcək ki, həm vətəndaşlar daha geniş şəkildə sığortadan istifadə etsinlər, həm də əmlakına ziyan dəyməyən, sığorta hadisəsi baş verməyən vətəndaşımız əmlaka görə daha az sığorta tarifi ödəsin”.

Paylaş:

Baxılıb: 673 dəfə