Əzrayılın bala paylaması...

Bakı:

13 °C

76 %

5 m/s

Əlaqə

AZ RU EN

Ana səhifə / Əzrayılın bala paylaması...

Əzrayılın bala paylaması...

24.09.2021 [15:29]

Pərviz Sadayoğlu

Yaxud, Makronun “bazar töhfələri”...

Azərbaycanda bir yaxşı el məsəli var. Bir uşağı olan kişiyə deyirlər ki, Əzrayıl bala paylayır, get sənə bir uşaq da versin. Kişi cavabında deyir ki, balama dəyməsin, verdiyini istəmirəm. İndi Fransa prezidenti Makronun qalib Bakı ilə məğlub İrəvanı danışıqlara “çağırması”, ələlxüsus Fransanın da Ermənistan və Azərbaycan arasında dialoqun “bərpa olunmasına” töhfə verməyə hazır olmasını deməsi elə Əzrayılın payladığı balanın əkizidir. 1997-ci ilin Milad bayramı günündən bəri ATƏT-in Minsk qrupunda həmsədr fəaliyyətinə başlayan Fransa ötən 24 il ərzində “cici-bacısı” Ermənistana niyə bu töhfədən bir boşqab çəkmirdi? İndi töhfəçilik eşqinə düşmüş Makron prezident olduğu ötən 4 il ərzində niyə dillənmirdi? Yaxşı, bunlar bir tərəfə, bu il iyunun 1-də Paşinyanla böyür-böyürə verdiyi “bəyanatlar”la Azərbaycanın ərazi bütövlüyünə qarşı yeni demarş etmək istəyən Makron niyə məhz indi - 30 il fəaliyyətsizlikdən başqa heç nə ilə yadda qalmayan Minsk qrupunu aktuallaşdırmağa, daha doğrusu “diriltməyə” çalışır. Axı, Qarabağ münaqişəsinin bitməsi ilə Minsk qrupu da demək olar ki, vasitəçi statusunu itirib. Deyəsən, Makronun budəfəki “töhfəbazlığı” “bəlkə də qaytardılar” xülyasına söykənir. Atalar sözünə bir balaca əl gəzdirsək, “daldan atılan daş topuğa belə çatmayanda dığırlanıb elə yerdəcə qalar”.

Hə, yadıma düşmüşkən, Fransa Azərbaycanda icra edilən minatəmizləmə fəaliyyətinə maliyyə dəstəyi ayırmaq fikrinə də düşüb. Maraqlıdır, deyilmi? Minalar harada basdırılıb - Azərbaycan torpağında. Basdıran kimdir - Ermənistan. Ortaya bir xeyli suallar çıxır. İnsan qətlindən başqa bir işə yaramayan bu minalar Ermənistan tərəfindən Azərbaycan torpaqlarına basdırılanda ATƏT-in Minsk qrupunun həmsədri olan Fransa hara baxırdı? Azərbaycan dövləti dəfələrlə Minsk qrupuna müraciətlər etmişdi. Həm minalarla bağlı, həm Ermənistanın Azərbaycan torpaqlarında qeyri-qanuni məskunlaşdırma aparması ilə bağlı, həm də işğal altındakı ərazilərimizdə ekoloji tarazlığın pozulması ilə bağlı. Ən nəhayət, yüz minlərlə azərbaycanlının öz EVİNDƏ, YURDUNDA, TORPAĞINDA yaşamaq hüququnun pozulması ilə bağlı. O illərdə qulağını kar, gözünü kor edən, həqiqətin gözünə düz baxmağı özünə rəva belə bilməyən Fransa dövləti bir dəfə də olsun kiçiyi saydığı, yanından əskiltmədiyi Ermənistana bütün bunlarla bağlı qulaqburması vermişdimi? Yox. Həqiqət isə bu gün də ortadadır. Azərbaycan xalqı torpaqlarını işğaldan azad etdikdən sonra belə erməni təcavüzünə məruz qalıb. Onlarla vətəndaşımız, hətta iki jurnalist həmkarımız o minaların qurbanına çevrilib. Fransa bir dəfə bununla bağlı bəyanat veribmi? Yenə də yox. Demək ki, Ermənistanın törətdiyi bütün özbaşınalıqlarda ATƏT-in Minsk qrupunun həmsədri kimi Fransanın da məsuliyyəti var. Axı, onlar vasitəçi idi. Bəs nəyə vasitəçilik edirdi? Qarabağ probleminin həllində iynə ucu boyda bir fayda verməyən vasitəçilk nəyə yarayır? Axı, bu vasitəçilik Azərbaycana qarşı aparılan təcavüzkar siyasətin qarşısının alınmasında epizodik rol belə ala bilməmişdi. Fransanın vasitəçiliyi Ermənistanı dəstəkləməkdən başqa heç bir işə yaramamışdı...

Artıq nəinki regiondakı vəziyyət, hər şey dəyişib. Bu gün Azərbaycan bütün problemləri kimi Qarabağ probleminin həllinə də özü nail olub. Bundan sonra Makronun “töhfəsi” elə müsyo Jordanın çör-çöp yığmağından uzağa gedəsi deyil. Makron isə Qarabağa gəlsə-gəlsə elə babası müsyo Jordan kimi Hatəmxan ağaya yalnız qonaq gələ bilər...

Paylaş:

Baxılıb: 698 dəfə