İqtisadiyyat və Sənaye Nazirliyində 2014-cü ildə qarşıda duran vəzifələrlə bağlı geniş müşavirə keçirilib

Bakı:

23 °C

72 %

12 m/s

AZ RU EN

Ana səhifə / Siyasət / İqtisadiyyat və Sənaye Nazirliyində 2014-cü ildə qarşıda duran vəzifələrlə bağlı geniş müşavirə keçirilib

İqtisadiyyat və Sənaye Nazirliyində 2014-cü ildə qarşıda duran vəzifələrlə bağlı geniş müşavirə keçirilib

15.01.2014 [09:36]

Prezident İlham Əliyevin Nazirlər Kabinetinin 2013-cü ilin sosial-iqtisadi inkişafının yekunlarına və 2014-cü ildə qarşıda duran vəzifələrə həsr olunmuş iclasında verdiyi tapşırıqların icrası ilə bağlı İqtisadiyyat və Sənaye Nazirliyində geniş müşavirə keçirilib.
Nazirliyin mətbuat xidmətindən AzərTAc-a bildiriblər ki, struktur bölmələrinin və digər qurumların rəhbərlərinin iştirakı ilə keçirilmiş müşavirədə iqtisadiyyat və sənaye naziri Şahin Mustafayev 2013-cü ildə qazanılmış iqtisadi nailiyyətlər və qarşıda duran vəzifələr barədə məlumat verib. Qeyd edilib ki, Nazirlər Kabinetinin 2013-cü ilin sosial-iqtisadi inkişafının yekunlarına və 2014-cü ildə qarşıda duran vəzifələrə həsr olunmuş iclasında Azərbaycan Prezidenti proqram xarakterli çıxışında ötən il görülmüş işlərə yekun vurub, 2014-cü ildə hərtərəfli inkişaf kursunun davam etdirilməsi və qazanılmış uğurların daha da möhkəmləndirilməsi üçün əsas prioritetləri müəyyənləşdirib.
Müşavirədə nazirliyin 2013-cü ildəki fəaliyyəti müzakirə olunub, qurum rəhbərlərinin hesabatları dinlənilib.
Nazir Şahin Mustafayev dövlətimizin başçısının çıxışından irəli gələn vəzifələrin vaxtında və keyfiyyətli icrası üçün nazirliyin struktur bölmələrinə konkret tapşırıqlar verib. Belə ki, regionların və Bakıətrafı qəsəbələrin sosial-iqtisadi inkişafına dair yeni dövlət proqramlarının geniş təhlillər və araşdırmalar aparılmaqla hazırlanması mühüm vəzifə kimi qarşıya qoyulub, bu sahədə işlərin ən qısa müddətdə başa çatdırılmasının vacibliyi qeyd edilib.
Azərbaycan Prezidentinin müvafiq Sərəncamına əsasən, İqtisadiyyat və Sənaye Nazirliyinə 2014-cü ilin ölkəmizdə “Sənaye ili” elan edilməsinə dair Tədbirlər Planının hazırlanmasının tapşırıldığını vurğulayan nazir Şahin Mustafayev sənədin qısa müddət ərzində hazırlanması üçün nazirliyin müvafiq strukturlarına göstəriş verib.
Müşavirədə dövlət investisiyalarının səmərəli istifadəsinə və infrastruktur layihələrinin icrasına nəzarətin gücləndirilməsi, Bakı-Astara yolunun, eləcə də kənd yollarının tikintisinin sürətləndirilməsi, bu sahədə mütəmadi monitorinqlərin keçirilməsi, iqtisadi təhlillərin səviyyəsinin yüksəldilməsi və yeni metodların tətbiqinin vacibliyi vurğulanıb, 2014-cü ildə sahibkarlığa dəstəyin daha da artırılması, elektron xidmətlərin tətbiqinin genişləndirilməsi, maarifləndirmə tədbirlərinin, biznes forumların, işgüzar görüşlərin səmərəliliyinin artırılması, istehlak bazarına nəzarətin, istehlakçı hüquqlarının qorunması və süni qiymət artımına qarşı mübarizə tədbirlərinin gücləndirilməsi, istehlakçı fəallığının artırılmasına nail olunması istiqamətində qarşıda duran vəzifələrdən də ətraflı bəhs olunub.
Eyni zamanda Prezident İlham Əliyevin tapşırığına uyğun olaraq, ərzaq təhlükəsizliyinin daha da möhkəmləndirilməsinin, iri taxılçılıq təsərrüfatlarının yaradılmasının davam etdirilməsinin, yeni torpaq sahələrinin dövriyyəyə cəlb olunmasının mühüm vəzifə kimi qarşıya qoyulduğu, bu sahədə işlərin sürətləndirilməsinin vacibliyi vurğulanıb. Habelə rəqabət qabiliyyətli və ixracyönümlü məhsul istehsalının artırılmasının, ticarət əlaqələrinin daha da genişləndirilməsinin, yeni və ənənəvi bazarlara çıxış imkanlarına xüsusi diqqət yetirilməsinin əsas vəzifələrdən olduğu qeyd edilib.
Müşavirədə ekoloji tədbirlərin sürətləndirilməsi, göllərin, xüsusilə Böyük Şor gölünün təmizlənməsi və gələn il layihənin birinci mərhələsinin başa çatdırılması, atmosferi çirkləndirən müəssisələrin müəyyənləşdirilməsi istiqamətində nazirliyin görəcəyi işlər də müəyyənləşdirilib.
Müşavirəyə yekun vuran nazir Şahin Mustafayev Prezident İlham Əliyev tərəfindən qarşıya qoyulmuş vəzifələrin vaxtında və hərtərəfli icrasına nail olmaq üçün konkret tapşırıqlar verib, müvafiq Tədbirlər Planının hazırlanması qərara alınıb.

Paylaş:

Baxılıb: 1080 dəfə