Rusiya Ermənistanı işğalçı siyasəti davam etdirməyə həvəsləndirən addımlardan çəkinməlidir

Bakı:

25 °C

53 %

10 m/s

Əlaqə

AZ RU EN

Ana səhifə / Siyasət / Rusiya Ermənistanı işğalçı siyasəti davam etdirməyə həvəsləndirən addımlardan çəkinməlidir

Rusiya Ermənistanı işğalçı siyasəti davam etdirməyə həvəsləndirən addımlardan çəkinməlidir

20.10.2017 [10:18]

Millət vəkillərinin qənaətincə, təcavüzkar Ermənistanın Rusiya tərəfindən silahlandırılması regional sabitlik və təhlükəsizliyə ciddi təhdidlər yaradır
Xəbər verildiyi kimi, işğalçı Ermənistan oktyabrın 12-də Rusiyadan alacağı 100 milyon dollarlıq birinci kredit paketini təsdiq edib. Belə ki, 2015-ci il noyabrın 26-da imzalanmış razılaşmaya əsasən, Rusiya Ermənistana müasir silahlar almaq üçün 200 milyon dollar kredit vermək öhdəliyi götürüb. Müqaviləyə əsasən, 100 milyonluq kredit Ermənistana 20 il müddətinə verilir. Bu müddətin 5 ilinin illik 3 faiz dərəcəsi ilə güzəştli olması nəzərdə tutulub. Həmin vəsaitə Ermənistan “Smerç” reaktiv sistemləri, “İqla-S” zenit raket kompleksləri, “Avtobaza-M” radiotexniki kəşfiyyat kompleksləri, TOC-1A “Solnsepyok” ağır odsaçan sistemləri və digər sursatlar alacaq.
Göründüyü kimi, Rusiya Ermənistanı müasir silahlarla təchiz edir, təcavüzkar və işğalçı dövlətin hərbi potensialını gücləndirməyə çalışır. Ekspertlərin qənaətincə, ATƏT-in Minsk qrupunun həmsədri olan Rusiyanın təcavüzkar ölkəni ruhlandıran bu addımı onun bitərəflik tələbinə əməl etmədiyini və beynəlxalq hüquq normalarını pozduğunu göstərir.
Məsələyə münasibət bildirən Milli Məclisin deputatı Flora Qasımova deyib ki, bu fakt göstərir ki, Rusiya öz öhdəliklərini pozur: “Çünki ATƏT-in Minsk qrupunun həmsədri olan Rusiyanın münaqişə tərəflərinin birinə hərtərəfli yardım göstərməklə bitərəflik tələbinə əməl etməməsi qəbuledilməzdir. Bu, eyni zamanda, işğalçı Ermənistanı təcavüzkar iddiaları davam etdirməyə həvəsləndirməkdir. Bu hal həm beynəlxalq hüquq normalarına, həm də Rusiya-Azərbaycan münasibətlərinin ruhuna ziddir”.
Millət vəkili əlavə edib ki, Ermənistanın Rusiya tərəfindən silahlandırılması həm də regional sabitlik və təhlükəsizliyə ciddi təhdidlər yaradır: “Hər kəsə bəllidir ki, Ermənistan işğalçı ölkədir, onun təcavüzkar siyasəti bütövlükdə region üçün təhdid mənbəyidir. Belə olan halda, təcavüzkar iddialara sahib olan işğalçı ölkənin silahlandırılması yolverilməzdir. Rusiya bunu mütləq mənada nəzərə almalıdır”.
“Azərbaycan ictimaiyyətinin gözləntisi budur ki, Rusiya ATƏT-in Minsk qrupunun həmsədr ölkəsi kimi öz üzərinə düşən konkret vəzifələri yerinə yetirsin. Bu həm bu ölkənin öz mənafeyinə uyğundur, həm də regional sabitliyə xidmət edir”, - deyə F.Qasımova vurğulayıb.
Millət vəkili Rasim Musabəyov qeyd edib ki, Azərbaycan və Ermənistan prezidentlərinin görüşü ərəfəsində Rusiya öncə imzalanmış razılaşma çərçivəsində Ermənistana silah alması üçün 100 milyon dollar ayırdığını açıqlayıb: “Bunu İrəvanı danışıqlarda münaqişənin həlli üçün uzlaşmadan daha uzaq mövqe tutmağa təşviq etmək niyyəti kimi qəbul etməmək çox çətindir. Ermənistana müasir silahların verilməsi kredit kimi sənədləşdirilsə də, hər kəsə aydındır ki, Ermənistan pul ödəməyəcək. Moskva 25 ildir ki, Ermənistanı pulsuz silahlandırır. Hələ 1990-cı illərdə və 2000-ci illərin əvvəlində Rusiya Ermənistana 1 milyard dollar dəyərində silah və texnika verib”.
Millət vəkili onu da bildirib ki, Moskvanın Cənubi Qafqazda siyasətini dəyişdirəcəyi illüziyadır: “Ancaq bu barədə danışmaq lazımdır ki, Azərbaycan hər şeyi yaxşı görür və adekvat qiymətləndirir”.
Nurlan QƏLƏNDƏRLİ

Paylaş:

Baxılıb: 467 dəfə