“Namus məhbusu” nə deməkdir?

Ana səhifə / Siyasət / “Namus məhbusu” nə deməkdir?

“Namus məhbusu” nə deməkdir?

20.01.2022 [18:04]

Saxta iddiaların ifadəsi də saxta olur

XIV əsr filosofu, dövlət xadimi və tarixçisi İbn Xaldun qeyd edirdi ki, siyasət ciddi fəaliyyət sahəsidir, siyasətçi adına iddialı olan isə iki keyfiyyəti eyni anda daşımalıdır: savadlı və əqidəli olmaq. Yeddi əsr əvvəl ifadə edilən fikir bu gün də öz aktuallığını qoruyur – intellekt və əqidə sahibi olmadan “siyasətçi” imici formalaşdırmaq mümkün deyil. Yalnız süni “siyasətçi” obrazı yaratmağa cəhd göstərmək olar. Eynilə bu gün “virtual siyasət”lə məşğul olan, özünü “sosial medianın siyasi fenomeni” qiyafəsində təqdim edənlər kimi. Bu barədə nümunələr çoxdur – necə deyərlər, “əlini sallasan, əllisi”, yaxud Əli Kərimlisi.

30 ilə yaxındır ki, siyasətdə özünə yer tapa bilməyən, son zamanlar isə “müxalifətçilik ştatı”nı istismar etməklə qrant və qonorar hesabına onlayn siyasi teatr tamaşaları təşkil edən Ə.Kərimli hər sözündə, hərəkətində intellektual yetərsizliyini və əqidə çatışmazlığını nümayiş etdirir. Sadəcə bir məqama diqqət yetirək: o, son paylaşımlarının birində azadlığa buraxılmış Əlizamin Salayev adlı şəxsi “namus məhbusu” adlandırır. Yəqin ki, ifadəni görən hər kəs təəccüblə soruşar: “namus məhbusu” nə deməkdir? Bu suala nəinki sıradan bir şəxs, hətta ekspert-mütəxəssis də cavab verə bilməz. Çünki elm dəqiqlik və müəyyənlik xüsusiyyətlərinə malikdir, “namus məhbusu” ifadəsi isə uydurma – qondarma, saxta ifadədir (eynilə onu səsləndirənin “siyasətçi” kimliyi və iddiaları kimi-red.). Ona görə də müraciət etdiyimiz hüquqşünas, sosioloq və filoloqlar belə bir ifadəyə indiyə qədər rast gəlmədiklərini qeyd etdilər. Bu söz birləşməsini “google” axtarış sistemində yazsaq da, ondan Ə.Kərimlidən başqa heç kimin istifadə etmədiyini – heç bir kitabda, dəftərdə, mənbədə olmadığını gördük.

Maraqlı məqam budur ki, Ə.Kərimli bu ifadəni 2020-ci il aprelində Cinayət Məcəlləsinin 147.2 (ağır cinayətdə ittiham etməklə böhtan atma) və 148-ci (təhqir) maddələri ilə azadlıqdan məhrum edilmiş şəxs haqqında deyib. Məgər böhtan atan və təhqir edən “namus məhbusu” olur? Əgər o, “namus məhbusu” deyəndə namus üstündə tutulanı nəzərdə tutursa, bunun başqasına böhtan atan və təhqir edənə aidiyyəti yoxdur. Böhtançılıq isə, yumşaq desək, əxlaqsızlıqdır. Buna görə həmin şəxsi, hər halda, Ə.Kərimlinin “məntiqi” ilə namusazidd hərəkət edən adam kimi səciyyələndirə bilərik...

Ə.Kərimli internet kanallarında desibel rekordu vuracaq qədər səs tonu ilə bağıraraq siyasi şoumenlik edərkən iki dəqiqədən bir ixtisasca hüquqşünas olduğunu dilə gətirir. Deməli, onun ixtisas biliyi də “siyasətçi” obrazı kimi saxtadır - əks halda, heç bir sənəddə, məcəllədə, qanunda, qanunvericilikdə olmayan “namus məhbusu”ndan istifadə etməzdi. Bu, savadsızlıqla yanaşı, saxtakarlıqdır. Böhtançını “namus məhbusu” adlandıraraq insanları aldatmağa çalışan Kərimli həm də vicdansızlıq edir. Çünki böhtan atmaq əxlaqsızlıq olduğu kimi, yalançılıq da vicdansızlıqdır. Onda Əli əfəndi buyursun, özünü də “vicdan məhbusu” adlandırsın!

Paylaş:

Baxılıb: 254 dəfə

Xəbər lenti

Hamısına bax