"Onların cızdığı xəritələr Azərbaycanı ancaq geri apara bilər"

Bakı:

8 °C

87 %

2 m/s

Əlaqə

AZ RU EN

Ana səhifə / Siyasət / "Onların cızdığı xəritələr Azərbaycanı ancaq geri apara bilər"

"Onların cızdığı xəritələr Azərbaycanı ancaq geri apara bilər"

25.08.2011 [10:46]

Siyavuş Novruzov: Onlar Mozambikdə nə baş versə, onu da Azərbaycanda tətbiq etmək düşüncə tərzinə malikdirlər
Hakim Yeni Azərbaycan Partiyasından müxalif “İctimai Palata”nın hazırladığı “Demokratiyaya yumşaq keçidin yol xəritəsi” adlı sənədə münasibət bildirilib. Partiyanın İcra katibinin müavini Siyavuş Novruzov “Media forum” saytına açıqlamasında deyib: “Mən “İctimai Palata” adlı təşkilat tanımıram. Azərbaycan cəmiyyətinin, seçicilərin dəstəkləmədiyi şəxslər orda toplanıblar. Bu cür adamlar Azərbaycan cəmiyyəti üçün hansısa yol xəritəsi hazırlaya bilməzlər. Yol xəritəsi gündəmdə olan, populyar addır. Onlar da hər şeyə bir populyar ad qoymağa çalışırlar. Onlar Azərbaycan dövlətinin həyata keçirdiyi strateji xətt, siyasi, iqtisadi, sosial, elmi, mədəni islahatlarla bağlı hər hansı yeni təklif verə bilməzlər. çünki o adamların heç biri 1990-cı illərin səviyyəsindən irəli gedə bilməyib”.
S.Novruzov hesab edir ki, müxalifət dünyanın müxtəlif ölkələrində baş verən bir hadisəni eşidən kimi Azərbaycanda da onu tətbiq etmək istəyir. Amma onun fikrincə, bu addımların hamısı iflasa uğrayıb: “Ukraynada “narıncı inqilab” baş verəndə Azərbaycan müxalifəti özünü “narıncı inqilab” edənlərə oxşatmağa çalışdı. Nəticə nə oldu? Müxalifət kimdənsə nəyisə oğurlayanda zamanı, məkanı, sistemi, insanların düşüncə tərzini də nəzərə ala bilmir. Onlar Mozambikdə nə baş versə, onu da Azərbaycanda tətbiq etmək düşüncə tərzinə malikdirlər.
İkincisi, “narıncı inqilab” baş verən ölkədə hansı proseslər cərəyan edir? Bir koalisiyada hakimiyyətə gələnlər bu gün məhkəmədə bir-birinin üzünə dururlar. “Narıncı inqilab”ın prezidenti Viktor Yuşşenko inqilabın əsas banilərindən olan keçmiş baş nazir Yulya Timoşenkonun üzünə durub onu korrupsiya və rüşvətdə ittiham edir. Başqa bir ölkədə “qızılgül inqilabı” oldu. Azərbaycan müxalifətçiləri əllərinə gül-çiçək götürüb düşmüşdülər Bakının küçələrinə, orda-burda gəzirdilər. Bunun da nəticəsi göz önündədir.
Fələstin-İsrail münaqişəsində yol xəritəsi adlı bir anlayış var. Bu da ABŞ-dan gələn ideyadır. Hər hansı problemi, məsələni həll etmək üçün nədən başlayıb nədə qurtarmaq üçün plan hazırlayırlar və bunu yol xəritəsi adlandırırlar. Fələstindəki yol xəritələrinin hansı nəticələr verdiyi göz önündədir. İndi Azərbaycan müxalifəti bunu da mənimsəyib, özlərini gah jurnalist, gah da politoloq adlandıran, cəmiyyətdə heç bir uğur qazanmayan adamlardan istifadə edib lazımsız, məzmunsuz, mahiyyətsiz, yamağa bənzəyən bir şey hazırlayıb ortaya atıblar. Guya bu hansısa islahatlar planıdır”.
YAP İcra katibinin müavini hesab edir ki, Azərbaycanda bütün sahələrdə davamlı islahatlar həyata keçirilir. S.Novruzov bildirib ki, Azərbaycan cəmiyyəti indiki müxalifətin cızdığı xəritələri görüb: “Onların ortalığa atdıqları məsələlərin heç bir mahiyyəti yoxdur. Onların cızdığı xəritələr Azərbaycan cəmiyyətini ancaq geri apara bilər, irəliyə aparması mümkün deyil”.

Paylaş:

Baxılıb: 952 dəfə