Azərbaycanın bir qrup vətənpərvər gənci İran İslam Respublikasının ölkəmizdəki səfirliyi qarşısında etiraz aksiyası keçirib

Bakı:

25 °C

66 %

13 m/s

AZ RU EN

Ana səhifə / Siyasət / Azərbaycanın bir qrup vətənpərvər gənci İran İslam Respublikasının ölkəmizdəki səfirliyi qarşısında etiraz aksiyası keçirib

Azərbaycanın bir qrup vətənpərvər gənci İran İslam Respublikasının ölkəmizdəki səfirliyi qarşısında etiraz aksiyası keçirib

12.05.2012 [09:43]

Dünən İran İslam Respublikasının ölkəmizdəki səfirliyi qarşısında Azərbaycanın bir qrup vətənpərvər gənci etiraz aksiyası keçirib. Vətənpərvər gənclər İranın ölkəmizə qarşı həyata keçirdiyi anti-Azərbaycan kampaniyasına etiraz ediblər. Qeyd edək ki, son olaraq Təbriz şəhərində Azərbaycan konsulluğunun binası qarşısında dövlətimizin hədəf alındığı, ölkəmizə qarşı şüarların səsləndirildiyi piket keçirilib. Piketdə Azərbaycan dövlətinə qarşı təhqiramiz şüarlar səsləndirilib və dövlət atributlarımız təhqir olunub. 600 nəfərdən çox gəncin iştirak etdiyi aksiyanın iştirakçıları “Azərbaycan var olsun, İrana ar olsun!”, “Homoseksualist İran mollarına Azərbaycanda yer yoxdur!”, “Şuşanı ermənilərə İran hakimiyyəti satıb!”, “İran-Ermənistan qardaşlığına ar olsun!”, “Qonşu, yoxsa təhlükə mənbəyi?!”, “Əhmədinejat 40 milyonluq Cənubi azərbaycanlıya qara ləkədir!”, “Qarabağda didərgin düşmüş müsəlmanların ah-naləsi ermənilərin dostu Xomeneyiyə cəhənnəm vəd edir!”, “İran gənclərinə azadlıq!” kimi şüarlar səsləndirilib. Piketin aparıcısı Sərraf Hüseynov İranın Azərbaycana qarşı qərəzli siyasət həyata keçirdiyini bildirib. Onun sözlərinə görə, adını İslam dövləti qoyan İran, minlərlə dinc müsəlmanın qanını tökən işğalçı Ermənistanla dostluq münasibətlərini davam etdirir: “İran necə İslam dövlətidir ki, işğalçı Ermənistana hərtərəfli dəstək göstərir? Azərbaycan gəncliyi olaraq biz bu siyasəti pisləyirik”.
Aygün Əliyeva isə İranın Azərbaycana qarşı apardığı kampaniyanın məqsədinin aydın olduğunu deyib. Onun sözlərinə görə, onlar müstəqil Azərbaycan dövlətinin güclənməsini həzm edə bilmirlər: “İran sözdə Azərbaycanı qardaş adlandırır. Əməldə isə bunun tam əksi yönündə fəaliyyət göstərir. Eyni zamanda, özünü İslam dövləti adlandıran İran əslində müsəlmanları dəstəkləmir. Qarabağda minlərlə müsəlman azərbaycanlıların qanını tökən Ermənistanla onun sıx münasibətləri, dostluğu buna sübutdur. Ar olsun belə dövlətə!”.
çıxış edən Qafqaz Müsəlmanları İdarəsinin Qərb bölgəsi üzrə səlahiyyətli nümayəndəsi Hacı Tahir Qarabağı qeyd edib ki, Təbriz şəhərində Azərbaycan konsulluğunun binası qarşısında keçirilən piketdə Azərbaycan dövlətinin və xalqımızın təhqir olunması yolverilməzdir: “Piketdə faktiki olaraq, Azərbaycanın ünvanına təhqiramiz ifadələr səsləndirilib. İranın Azərbaycana qarşı bu cür münasibət göstərməsi İslam dininin təməl qaydalarına ziddir. Bu cür nalayiq ifadələr səsləndirən və xalqımızı təhqir edənlər müsəlman ola bilməzlər. çünki bir müsəlman öz müsəlman qardaşını təhqir etməz”.
İştirakçı Rauf Mərdiyev qeyd edib ki, İran dini dəyərlərdən siyasi təzyiq vasitəsi kimi istifadə edir: “İran müsəlmanlara qarşı soyqırımı həyata keçirmiş Ermənistanla əməkdaşlıq edir və işğalçı ölkənin təcavüzkar siyasətini dəstəkləyir. Bu, hansı dini qaydalara uyğundur? Mahmud Əhmədinejat əli müsəlmanların qanına batmış Serj Sarkisyanı bağrına basır. İndiyə qədər bir dəfə də olsun, Dağlıq Qarabağda ermənilərin azərbaycanlılara qarşı törətdikləri soyqırımı dilinə gətirməyən İran İslam Respublikasının prezidenti Mahmud Əhmədinejat Ermənistana səfəri zamanı qondarma “erməni soyqırımı” abidəsinin qarşısına əklil qoyur”.
Piketdə çıxış edən Bayram Aslanov isə deyib ki, İran hər vəchlə terrorist, təcavüzkar Ermənistanı dəstəkləməyə davam edir. “İran anlamalıdır ki, Ermənistan terrorist, işğalçı ölkədir. Müsəlmanlara qarşı dəfələrlə soyqırımı həyata keçirmiş Ermənistanla dostluq, qardaşlıq edən İrana ar olsun!”, - deyən B.Aslanov əlavə edib ki, Azərbaycan gəncləri ölkəmizdə İranın təxribatlarına yol verməyəcək.
Digər piket iştirakçısı Sahil Hacıyev Azərbaycan gəncliyinin öz dövlətinin keşiyində ləyaqətlə dayandığını vurğulayıb. O, bildirib ki, yüzlərlə gənci bu aksiyaya sövq edən İranda Azərbaycan dövləti əleyhinə aparılan cılız kampaniyadır: “İranın Azərbaycana qarşı sərgilədiyi bu mövqe düşmən mövqeyidir. Biz buradan düşmənə nifrətimizi ifadə edirik”.
Aksiya iştirakçısı Samirə Quliyeva isə çıxışında qeyd edib ki, bu mövqeyi ilə İran İslam dəyərlərini tapdalayır. O, aparılan belə kampaniyaların düzgünlüyə, ədalətə söykənmədiyini deyərək bütün bunların müqəddəs dinimiz tərəfindən qəbul olunmadığını diqqətə çatdırıb: “Bu mövqeyi ilə İran Azərbaycana qarşı xəyanət edir. Bu rejim İran xalqının iradəsini ifadə etmir. Mən bu rejimə müraciət edərək deyirəm ki, islami dəyərlərə zidd əməllərindən əl çək”.
Gülsel Səfərova isə bildirib ki, heç bir xarici dövlətin Azərbaycanın daxili işlərinə qarışmağa ixtiyarı yoxdur: “Amma, biz görürük ki, İran ölkəmizin daxili işlərinə qarşımaq istəyir. Bu, yolverilməzdir. Biz dünyəvi, tolerant ölkəyik. Azərbaycanın məqsədi sülh və əmin-amanlıq şəraitində yaşamaqdır. Amma bu cür xarici qüvvələr ölkəmizin xoşməramlı niyyətinə qarşı çıxır, dövlətimizə qarşı böhtanlar atmağa çalışırlar. Azərbaycan gəncliyi belə kampaniyanı qətiyyətlə pisləyir”.
Aksiyanın sonunda gənclər Azərbaycan dövlətinin himnini səsləndiriblər.
Nardar BAYRAMLI

Paylaş:

Baxılıb: 1099 dəfə