Daşkəsən rayonunda da Novruz bayramı böyük təntənə ilə qeyd edilib

Bakı:

23 °C

57 %

6 m/s

Əlaqə

AZ RU EN

Ana səhifə / Sosial / Daşkəsən rayonunda da Novruz bayramı böyük təntənə ilə qeyd edilib

Daşkəsən rayonunda da Novruz bayramı böyük təntənə ilə qeyd edilib

19.03.2014 [10:00]

Daşkəsəndə qədim milli bayramımız olan Novruz bayramı böyük təntənə ilə qeyd edilib. Rayonun Heydər Əliyev meydanında əvvəlcə kənd təsərrüfatı və sənaye məhsullarının nümunələrinə, məktəblilərin hazırladıqları sərgilərə, yerli sənətkarlıq nümunələrinə baxış keçirilib, bayram tonqalı yandırılıb. Ümumrayon şənliyində çıxış edən Daşkəsən rayon İcra Hakimiyyətinin başçısı Əhəd Abıyev deyib ki, Azərbaycan Prezidenti İlham Əliyevin rəhbərliyi altında ölkəmizdə bu gün çox geniş şəkildə tikinti, quruculuq və abadlıq işləri aparılır, ölkə iqtisadiyyatı sürətlə inkişaf edir. Həyata keçirilən siyasət nəticəsində ölkəmizin beynəlxalq aləmdə nüfuzu artıb, mövqeləri möhkəmlənib, Azərbaycanda ictimai-siyasi sabitlik təmin edilib: “Ölkəmizdə bütün sahələr üzrə aparılan işlər biz daşkəsənliləri də ürəkdən sevindirir. Möhtərəm Prezidentimizin diqqət və qayğısı sayəsində Daşkəsən rayonunda da çox böyük nailiyyətlər qazanılıb, elmi əsaslarla Yeni Daşkəsən layihəsi işlənib hazırlanıb, eyni zamanda, çoxsaylı Dövlət proqramlarının layihələri ölkə rəhbərimizin tapşırıq və tövsiyələrinə əsasən davamlı olaraq yerinə yetirilməkdədir”.
Daşkəsən rayon İcra Hakimiyyətinin başçısı rayonda son üç il ərzində əldə edilən digər uğurlardan, nailiyyətlərdən, qarşıda duran vəzifələrdən də söz açıb. O, daha sonra “Novruz bayramı təkcə Azərbaycanda deyil, dünyanın bir çox ölkələrində 300 milyondan çox əhali tərəfindən qeyd olunur. Bu gözəl milli bayramımız münasibətilə sizləri bir daha təbrik edir, hər birinizə can sağlığı, ruzi-bərəkət, bol-bol sevinc, ailə xoşbəxtliyi arzulayıram. Növbəti Novruz bayramına əliboş gəlməmişik. Bir ildə 7 məktəb tikintisi aparmışıq. Rayonunun örüş-otlaq sahələrinin daşkəsənlilərin istifadəsinə verilməsi təmin edilməkdədir. Bu il isə 20-dən çox ünvanda tikinti, təmir, yenidənqurma və abadlıq işləri aparılacaqdır. Daşkəsən rayon İcra Hakimiyyətinin yeni inzibati binasında son tamamlama işləri görülür”, - deyə qeyd edib.
Sonra rayonun ictimai-siyasi həyatında fəal iştirakına görə bəzi sakinlərə və təhsildə fərqləndiklərinə görə bir qrup məktəbliyə rayon İcra Hakimiyyəti başçısının fəxri fərmanları verilib.
Daha sonra bayram tədbiri rayon ərazisində yerləşən “N” saylı hərbi hissədə əsgər və zabitlərlə davam etdirilib. Ucqar dağ ətəyində yerləşən hərbi hissədə Daşkəsən rayon İcra Hakimiyyəti başçısı Əhəd Abıyev əsgərləri təbrik edib, onların şəraiti və xidməti işləri ilə maraqlanıb. Rayon İcra Hakimiyyəti rəhbərliyinin təşəbbüsü və təşkilatçılığı ilə gətirilən Novruz sovqatı və xonçaları əsgərlərə paylanıb.

Paylaş:

Baxılıb: 1337 dəfə