Erməni millətçilərinin azərbaycanlılara qarşı həyata keçirdikləri soyqırımı aktları xalqımızın qan yaddaşından silinməyəcək

Bakı:

11 °C

87 %

7 m/s

AZ RU EN

Ana səhifə / Sosial / Erməni millətçilərinin azərbaycanlılara qarşı həyata keçirdikləri soyqırımı aktları xalqımızın qan yaddaşından silinməyəcək

Erməni millətçilərinin azərbaycanlılara qarşı həyata keçirdikləri soyqırımı aktları xalqımızın qan yaddaşından silinməyəcək

01.04.2014 [09:29]

Azərbaycanın Qarsdakı baş konsulluğu 31 mart - Azərbaycanlıların Soyqırımı Günü ilə bağlı məlumat yayıb.
Məlumatda bildirilir ki, son iki yüz ildə erməni millətçilərinin və onların havadarlarının azərbaycanlılara qarşı apardıqları soyqırımı və deportasiya siyasəti xalqımızın qan yaddaşından heç zaman silinməyəcək.
1918-ci ilin mart qırğınları xalqımıza qarşı zaman-zaman həyata keçirilən soyqırımı aktlarından biridir. Erməni-bolşevik quldur dəstələri 1918-ci il martın 30-dan aprelin 2-dək Bakıda və Bakı quberniyasının müxtəlif bölgələrində kütləvi qırğınlar törədiblər.
Mart qırğını zamanı Şamaxıda, Zəngəzurda, Qubada və Azərbaycanın digər bölgələrində yüzlərlə yaşayış məntəqəsi yerlə-yeksan edilib, yerli əhali qətlə yetirilib. Erməni daşnakları xüsusilə Bakıda minlərlə azərbaycanlının həyatına son qoyub, tarixi abidələri məhv ediblər. Eyni zamanda, 1918-1920-ci illərdə Azərbaycanın yüzlərlə şəhər və kəndi, o cümlədən Qarabağın dağlıq hissəsində azərbaycanlıların yaşadıqları 150 kənd dağıdılıb, soydaşlarımız misli görünməmiş amansızlıqla qətlə yetiriliblər.
Məlumatda diqqətə çatdırılır ki, erməni millətçilərinin xalqımıza qarşı təcavüzü hələ də davam etməkdədir. Siyasi-ideoloji təxribat və dezinformasiya sahəsində zəngin təcrübəyə malik erməni milliyyətçiləri və xaricdəki erməni lobbisi ölkəmizə qarşı əsl niyyətlərini gizlədərək, hiyləgər üsullarla dünya xalqlarını çaşdırmağa və XX əsrdə törətdikləri qırğın və işğalları unutdurmağa çalışırlar.
Qeyd olunub ki, Ulu öndər Heydər Əliyevin 1998-ci il martın 26-da imzaladığı “Azərbaycanlıların soyqırımı haqqında” Fərman ilə 31 mart - Azərbaycanlıların Soyqırımı Günü olaraq elan edilib. Bu Fərman XX əsrdə Azərbaycan xalqına yönəlmiş soyqırımı cinayətinin bugünkü və gələcək nəsillərə çatdırılması, bütün dünyada 1918-ci ilin mart qırğınlarına siyasi qiymət verilməsi baxımından olduqca mühüm bir sənəddir.
Eyni zamanda məlumatda 1918-ci ildə Qafqaz İslam Ordusunun azərbaycanlılarla birlikdə erməni quldur dəstələrinə qarşı mübarizə aparması yer alıb. Məlumatda qeyd edilir ki, xilaskar Qafqaz İslam Ordusunun timsalında bütün türk xalqına minnətdarlığımızı bildirir, Azərbaycan torpaqlarında canlarından keçmiş əsgərlərə isə Uca Tanrıdan rəhmət diləyirik.

Paylaş:

Baxılıb: 1117 dəfə