“Nar Mobile” yeni “Nar Donor” adlı sosial layihəsini təqdim etdi

Bakı:

22 °C

65 %

4 m/s

Əlaqə

AZ RU EN

Ana səhifə / Sosial / “Nar Mobile” yeni “Nar Donor” adlı sosial layihəsini təqdim etdi

“Nar Mobile” yeni “Nar Donor” adlı sosial layihəsini təqdim etdi

09.04.2014 [09:08]

“Qan donorluğu bütün dünya ölkələri üçün çox önəmli bir məsələdir. Hər bir ölkədə buna böyük ehtiyac vardır. Qan bankında donor qanı nə qədər çox olarsa, həmin ölkədə daha çox insanın həyatını xilas etmək mümkün olar”. Bu fikri “Azerfon” MMC-nin baş direktoru Kent Maknili ötən gün “Marriot” mehmanxanasında keçirilən “Nar Donor” sosial layihəsinin təqdimat mərasimində bildirib. Hələ gənc yaşlarından başlayaraq ildə bir neçə dəfə qan verdiyini xatırladan K.Maknili rəhbərlik etdiyi şirkətin belə bir layihəyə dəstək verməsindən qürur duyduğunu söyləyib və digər böyük şirkətləri də bu sosial aksiyaya qoşulmağa dəvət edib.
Tədbirdə çıxış edən Mərkəzi Qan Bankının direktoru Pərvanə Hacıyeva son illər ölkəmizdə qan donorlarının sayının artdığını bildirib: “Əvvəlki illərlə müqayisədə son beş ildə ölkədə qan donorlarının sayı artmaqdadır. Əgər 2008-ci ildə respublikada 38 min donor qeydə alınmışdısa, 2013-cü ilin məlumatına əsasən, qan donorlarının sayı 61 min nəfərdən artıq olub. Bankda toplanılan qanın həcmi isə öz növbəsində 16 tondan 32 tonadək yüksəlib”.
Onun sözlərinə görə, bu rəqəm donor qanına olan tələbatı ödəmək üçün yetərli deyil. “Talassemiyalı xəstələri, eləcə də, xəstəxanalarda gündəlik ehtiyac duyulan tələbatı nəzərə alsaq, 9 milyondan artıq əhalisi olan bir ölkə üçün donorların sayı 150 mindən artıq olmalıdır. Odur ki, “Nar Mobile”ın bu xeyirxah təşəbbüsünə digər şirkətlər də dəstək versələr, donor qanına olan ehtiyacı ödəmək mümkün olar”, - deyə P.Hacıyeva vurğulayıb.
Layihə haqda məlumat verən “Azerfon” MMC-nin İctimaiyyətlə Əlaqələr və Korporativ Ünsiyyət vasitələri şöbəsinin müdiri Nigar Arpadarai bildirib ki, aprelin 8-dən 15-dək davam edəcək layihə çərçivəsində xüsusi qanköçürmə məntəqələri yaradılacaq. İstənilən vətəndaş həmin məntəqələrə yaxınlaşıb, könüllü surətdə donorluq etməklə neçə-neçə insan həyatını xilas etmiş olacaq. Bundan əlavə, “Nar Donor” layihəsinin xüsusi simvolu da müəyyənləşdirilib. “Donor Kabel” adlanan bu kəmər vasitəsi ilə “Android” sistemli telefonlar bir-birinə enerji vermək imkanı əldə edirlər. Kampaniya müddətində bütün “Nar Mobile” mağazalarında abonentlərə həmin ötürücü kəmər pulsuz olaraq paylanılacaq.
“Azerfon” rəsmisi sözügedən layihəni gələcəkdə də davam etdirmək niyyətində olduqlarını bildirib.
Səlim Loğmanoğlu

Paylaş:

Baxılıb: 1204 dəfə