Tibb işçilərinin sosial müdafiəsinin gücləndirilməsi diqqət mərkəzindədir

Bakı:

26 °C

39 %

4 m/s

Əlaqə

AZ RU EN

Ana səhifə / Sosial / Tibb işçilərinin sosial müdafiəsinin gücləndirilməsi diqqət mərkəzindədir

Tibb işçilərinin sosial müdafiəsinin gücləndirilməsi diqqət mərkəzindədir

22.08.2020 [00:35]

Ekspertlər hesab edirlər ki, koronavirusla mübarizə tədbirlərində iştirak edən tibb işçilərinin əməkhaqlarına müddətli əlavənin verilməsinin müddətinin uzadılması haqqında Nazirlər Kabinetinin qərarı mühüm əhəmiyyətə malikdir

Məlum olduğu kimi, Baş Nazir Əli Əsədov “Yeni növ koronavirus (COVID-19) infeksiyası ilə mübarizə tədbirlərində iştirak edən tibb işçilərinin əməkhaqlarına müddətli əlavənin müəyyən edilməsi barədə” Azərbaycan Respublikası Nazirlər Kabinetinin 2020-ci il 25 mart tarixli 112 nömrəli Qərarında dəyişiklik edilməsi haqqında Qərar imzalayıb. Qərara əsasən, yeni növ koronavirus infeksiyası ilə mübarizə tədbirlərində iştirak edən tibb işçilərinin əməkhaqlarına müddətli əlavənin verilməsi oktyabrın 1-dək uzadılıb.

Öz növbəsində, sözügedən məsələyə münasibət bildirən Milli Məclisin Əmək və sosial siyasət komitəsinin sədr müavini Məlahət İbrahimqızı deyib ki, ölkəmizdə koronavirus pandemiyası ilə güclü mübarizə aparılır. Onun sözlərinə görə, bu prosesdə dövlət üzərinə düşən bütün addımları atır. Məqsəd isə insanların sağlamlığının və təhlükəsizliyinin təmin edilməsidir. Komitə sədrinin müavini əlavə edib ki, həyata keçirilən tədbirlər sayəsində bu mübarizədə ciddi nəticələr əldə olunur: “Təbii ki, dövlətimizin başçısının rəhbərliyi ilə həyata keçirilən qabaqlayıcı tədbirlər nəticəsində pandemiyanın mənfi təsirlərini minimuma endirmək mümkün olur. Hazırkı şəraitdə müvafiq səhiyyə tədbirləri ilə yanaşı, əhalinin sosial müdafiəsinin gücləndirilməsi də xüsusi diqqət mərkəzindədir. Pandemiya başlayandan dövlətimiz bütün sferalar üzrə əhalinin sosial müdafiəsinin gücləndirilməsi yönündə vacib addımlar atıb. Təbii ki, tibb işçilərinin sosial müdafiəsinin gücləndirilməsi də daim diqqət mərkəzində olan məsələdir. Çünki virusa yoluxmuş şəxslərin müalicəsində onlar əsl fədakarlıq göstərir, gecə-gündüz demədən çalışırlar. Bu baxımdan, Nazirlər Kabinetinin qərarı tibb işçilərinə maddi və mənəvi dəstəkdir”.

“Baş Nazir tərəfindən bu qərarın imzalanması çox doğru bir addımdır. Ona görə ki, koronavirus pandemiyası hələ bitməyib. Belə olan şəraitdə isə yeni növ koronavirus infeksiyasına yoluxmuş xəstələrin müalicəsində iştirak edən tibb işçilərinin maddi təminatının gücləndirilməsi zəruridur”. Bu fikirləri isə Milli Məclisin deputatı Müşfiq Cəfərov deyib.

O xatırladıb ki, hələ bu ilin mart ayında dövlət başçısı yeni növ koronavirus (COVID-19) infeksiyası ilə mübarizə tədbirlərində iştirak edən tibb işçilərinin sosial müdafiəsinin gücləndirilməsi haqqında Sərəncam imzalayıb. Bu Sərəncam dövlətimizin başçısı tərəfindən səhiyyə işçilərinin zəhmətinə verilən böyük qiymətdir. Çünki koronavirus kimi təhlükəli virusa qarşı mübarizədə əsas yük həkimlərimizin və tibbi xidmət personalının üzərinə düşür. Onlar çətin şəraitdə gərgin əmək sərf edərək, demək olar ki, fasiləsiz işləyirlər.

Deputat söyləyib ki, virusa yoluxmuş insanların doğmaları, yaxınları həkimlərə güvənirlər: “Çünki vətəndaşların onlardan gözləntiləri böyükdür. Belə vəziyyətdə, heç şübhəsiz ki, tibbi xidmət sahəsində fədakar əmək sərf edən səhiyyə işçiləri əməklərinin maddi qarşılığını almalı, gündəlik qayğılardan azad olmalıdırlar. Məhz bu baxımdan, Nazirlər Kabinetinin qərarında edilən dəyişiklik də COVID-19 infeksiyası ilə mübarizə tədbirlərində iştirak edən tibb işçilərinin sosial müdafiəsinin gücləndirilməsi istiqamətində atılan növbəti vacib və düzgün addımdır”.

Nardar BAYRAMLI

Paylaş:

Baxılıb: 540 dəfə