Danışma, göstər!

Bakı:

25 °C

63 %

11 m/s

Əlaqə

AZ RU EN

Ana səhifə / Sosial / Danışma, göstər!

Danışma, göstər!

29.03.2022 [10:48]

Ukraynada müharibənin pikselləri azərbaycanlı fotoqrafın obyektivi ilə

Famil Mahmudbəyli: Bəzən bir portret bütün hekayəni izah etmək üçün kifayətdir

Günel ABBAS

Rusiya ilə Ukrayna arasında müharibə başlayandan bu günə kimi azı 1 119 ukraynalı mülki şəxs ölüb, 1 790 nəfər isə yaralanıb. Rusiya ordusunun hərbi əməliyyatları nəticəsində Ukraynanı 3 milyon 821 min 49 nəfər tərk edib. Bununla yanaşı öz doğma torpaqlarını qoruyanlar da az deyil. Hətta onların arasında Ukraynada çalışan, yaşayan azərbaycanlılar da var. Kimisi Ukrayna ordusunda döyüşür, kimisi sakinlərə ərzaq yardımı edir, kimisi də həqiqətləri işıqlandırmaq üçün müharibənin ocağına üz tutur.

Hazırda Ukraynada olan azərbaycanlı fotojurnalist Famil Mahmudbəyli “Yeni Azərbaycan”a hadisələrin mərkəzində gördükləri barədə danışdı. Fotoqraf qeyd etdi ki, bu, onun Ukraynaya ilk səfəridir: “Hazırda Kiyev şəhərindəyəm, burada müharibə zamanı vurulan böyük bir ticarət mərkəzi var. Həmin ticarət mərkəzinin bombardmandan sonrakı vəziyyətini və xəstəxanadakı yaralıların fotolarını çəkirik. Kiyevdə hava həyəcan siqnalları verilir, şəhərdə sakitlik olsa da, ətraf qəsəbələrdə bomba səsləri eşidilir. Axşam 8-dən sonra komendant saatı başlayır. İnternetlə bağlı da problemlər yaşayırıq, bir zamanlar insanları öz ətrafında birləşdirən bu gözəl şəhər indi sanki bizi hər şeydən uzaqlaşdırır. Burada həm də avtovağzallarda təmənnasız şəkildə tibbi yardım və ərzaq təminatı üçün könüllülər fəaliyyət göstərir. Bu səbəbdən Kiyev vağzalında əsl izdiham müşahidə olunur.

Bu səfər mənim peşəkar fəaliyyətimin bir hissəsidir. Yolumuz Rumıniyanın Suçava vilayətindən keçdi. İndi hava məkanı mülki uçuşlar üçün bağlı olduğundan Ukraynaya yalnız quru yolu ilə getmək mümkündür. Onu da qeyd edim ki, bir neçə gün əvvəl olduğum Çernivtsi şəhərinə çoxlu sayda qaçqın axın edir. Onların əksəriyyəti kütləvi atəşə tutulan Kiyev, Xarkov və Mariupol şəhərlərinin sakinləridir. Məcburi köçkünlərə yemək və dərmanlar pulsuz verilir. Onlar üçün müvəqqəti yataqxanalar yaradılıb. Burada qaçqınlarla əlaqə saxlayırıq, onların haradan gəldiyini, necə təxliyə edildiyini, hazırda nəyəsə ehtiyacı olub-olmadığını öyrənirik”.

Onun sözlərinə görə, Ukraynanın bir neçə şəhəri, o cümlədən Çernivtsi qismən təhlükəsiz sayılır: “Amma bəzən həyəcan siqnalları eşidirəm və komendant saatı axşam saat 9-da başlayır. Hələlik biz ancaq döyüş bölgəsinə gedən təcili yardım maşınlarına baxa bilirik. Amma bəlkə çox yaxında özüm də ora gedəcəyəm”.

Fotoqraf qeyd etdi ki, müharibədə emosiyaların öhdəsindən gəlmək çətindir: “Ancaq bu, mənim işimdir, peşə seçərkən riskləri nəzərə almalısan. Sakit olmağa çalışıram, lakin yaradıcı komponentlə soyuq düşüncəni birləşdirmək də asan olmur. Adi insanların həyatından müxtəlif anları kameranın yaddaşına köçürməyə çalışıram. Əsasən xoşbəxt üzlər çəkməyi xoşlayıram. Amma dəhşətli müharibədən əziyyət çəkən uşaqları da unutmaq olmaz. Onların ağrı və məyusluğunu ifadə edən gözlərini bütün dünya görməlidir. Bir fotoqraf kimi mənim üçün bir qayda var: “Danışma, göstər”. Bəzən bir portret bütün hekayəni izah etmək üçün kifayətdir”.

Paylaş:

Baxılıb: 711 dəfə