Azərbaycanın idman siyasəti - uğura aparan model

Bakı:

23 °C

74 %

11 m/s

Əlaqə

AZ RU EN

Ana səhifə / YAP xəbərləri / Azərbaycanın idman siyasəti - uğura aparan model

Azərbaycanın idman siyasəti - uğura aparan model

01.05.2026 [11:34]

Albaniyanın paytaxtı Tirana şəhərində təşkil olunan güləş üzrə Avropa çempionatı Azərbaycanın idman sahəsində həyata keçirdiyi siyasətin real nəticələrini bir daha üzə çıxardı. Komanda hesabında əldə edilən birincilik yalnız yarış uğuru kimi deyil, illər boyu qurulan məqsədyönlü və ardıcıl inkişaf strategiyasının məntiqi nəticəsi kimi qiymətləndirilməlidir. Azərbaycan Respublikasının Prezidenti İlham Əliyev idmançılarla görüşündə bu qələbəni sistemli yanaşmanın bəhrəsi kimi xarakterizə edərək idmanın dövlət siyasətində mühüm yer tutduğunu xüsusi vurğuladı. Bu nailiyyətlər təsadüfi deyil. Uzun müddətdir ki, Azərbaycanda idman sahəsinə kompleks yanaşma tətbiq olunur və bunun nəticəsində möhkəm infrastruktur bazası formalaşıb. Müasir Olimpiya İdman komplekslərinin yaradılması, peşəkar məşq mərkəzlərinin fəaliyyəti və federasiyaların daha səmərəli təşkilatlanması həm kütləvi idman hərəkatının genişlənməsinə, həm də yüksək nəticələrin əldə olunmasına şərait yaradıb. Dövlət başçısının qeyd etdiyi kimi, seleksiya prosesinin düzgün qurulması və məşq sisteminin effektiv təşkili gənc idmançıların uğurlarında əsas rol oynayır və bu da gələcək üçün güclü idman ehtiyatının formalaşmasına zəmin yaradır. Məsələyə analitik yanaşdıqda aydın görünür ki, Azərbaycanın idman modelində əsas üstünlüklərdən biri insan kapitalının düzgün idarə edilməsidir. Bu sahədə yalnız maddi resurslara deyil, həm də bilik və təcrübənin ötürülməsinə xüsusi önəm verilir. Vaxtilə beynəlxalq arenalarda ölkəni uğurla təmsil etmiş idmançıların bu gün məşqçi və ya idarəçi kimi fəaliyyət göstərməsi təcrübənin sistemli şəkildə yeni nəsilə çatdırılmasını təmin edir. Bu yanaşma davamlı inkişaf üçün mühüm baza rolunu oynayır. Digər tərəfdən, idman Azərbaycanda təkcə nəticə əldə etmək vasitəsi kimi deyil, həm də sosial və ideoloji funksiyalar daşıyan mühüm sahədir. Beynəlxalq yarışlarda qazanılan qələbələr cəmiyyətdə birlik hissini gücləndirir, gənclərin vətənpərvərlik ruhunda yetişməsinə müsbət təsir göstərir. Bu kontekstdə idman ölkənin beynəlxalq arenada mövqeyini möhkəmləndirən “yumşaq güc” alətlərindən biri kimi çıxış edir. Azərbaycanın nüfuzlu beynəlxalq idman tədbirlərinə ev sahibliyi etməsi də bu siyasətin mühüm istiqamətlərindəndir. Bu cür yarışlar ölkənin təşkilatçılıq potensialını nümayiş etdirməklə yanaşı, idman diplomatiyasının inkişafına təkan verir. Eyni zamanda, yerli idmançılar üçün beynəlxalq təcrübə qazanmaq imkanı yaradır, turizm sektoruna və iqtisadi fəallığa müsbət təsir göstərir. Bununla yanaşı, müasir texnologiyaların idmana tətbiqi də diqqət mərkəzindədir. Məşq prosesində analitik məlumatlardan istifadə, fiziki və psixoloji hazırlığın elmi əsaslarla qurulması idmançıların rəqabət qabiliyyətini artıran vacib amillər sırasındadır. Tiranada qazanılan komanda birinciliyi bir daha sübut edir ki, Azərbaycanın idman siyasəti uzunmüddətli və dayanıqlı prinsiplər üzərində qurulub. Güclü infrastruktur, peşəkar kadr bazası, səmərəli idarəetmə və dövlət dəstəyi bu uğurun əsas dayaqlarını təşkil edir. Gələcəkdə seleksiya işinin genişləndirilməsi, regionlarda istedadların aşkara çıxarılması və beynəlxalq əməkdaşlığın daha da dərinləşdirilməsi Azərbaycanın idman sahəsində mövqeyini daha da gücləndirəcək. Beləliklə, Azərbaycan idmanı artıq yalnız qələbələrlə yadda qalan sahə deyil, eyni zamanda strateji şəkildə idarə olunan və davamlı inkişaf edən prioritet istiqamətlərdən biri kimi formalaşıb.

YAP Xəzər rayon təşkilatının sədri Namiq Əhmədov

Paylaş:

Baxılıb: 446 dəfə