Azərbaycan idman ölkəsi kimi dünyada böyük nüfuz qazanıb

Bakı:

23 °C

72 %

11 m/s

Əlaqə

AZ RU EN

Ana səhifə / YAP xəbərləri / Azərbaycan idman ölkəsi kimi dünyada böyük nüfuz qazanıb

Azərbaycan idman ölkəsi kimi dünyada böyük nüfuz qazanıb

04.05.2026 [12:51]

Aprelin 30-da Azərbaycan Respublikasının Prezidenti İlham Əliyev Albaniyanın paytaxtı Tiranada keçirilmiş Avropa çempionatında komanda hesabında Avropa çempionu olan yunan-Roma güləşi və sərbəst güləş, həmçinin qadın güləşi üzrə medal qazanmış idmançıları və onların məşqçilərini qəbul etdi. Görüşdə milli komandamızı Tiranada keçirilmiş Avropa çempionatında qazandığı böyük qələbə münasibətilə təbrik edən cənab İlham Əliyev vurğuladı ki, bu qələbə bizim hamımızı sevindirdi. Azərbaycan güləşçiləri bir daha göstərdilər ki, onlar Avropada birincidirlər. Avropa çempionatında komanda hesabında birinci olmaq, əlbəttə ki, böyük nailiyyətdir. Xüsusilə nəzərə alsaq ki, bu gün həm dünyada, həm Avropada güləş üzrə mübarizə daha gərgin keçir, bir çox ölkələrdən olan tanınmış güləşçilər böyük nəticələr göstərirlər və mübarizə də çox gərgin idi. Bizim idmançılarımız öz peşəkarlığını göstərərək rəqibləri ədalətli mübarizədə məğlub etmişlər. Bu, əlbəttə, bütün xalqımızı sevindirir və bir daha göstərir ki, güləşimiz uğurla inkişaf edir. Güləşimizin böyük ənənələri var və biz bu ənənələri yaşadırıq.

Azərbaycan dünyada güclü idman ölkəsi kimi tanınır. Beynəlxalq arenada layiqli yer tutur və böyük yarışlara ev sahibliyi edir. İdmançılarımız olimpiada, dünya və Avropa çempionatlarında müntəzəm medallar qazanaraq bu mövqeyi möhkəmləndirir. Dövlət tərəfindən idmana yüksək diqqət və qayğı göstərilir. Ötən ilin idman yekunlarına həsr olunan mərasimdə cənab İlham Əliyev diqqəti idmanın inkişafının əsas göstəricilərindən olan medalların sayına yönəldərək bildirdi ki, 2025-ci ildə idmançılarımız tərəfindən qazanılan medalların sayı rekord həddə çatıb. Beynəlxalq yarışlarda idmançılarımız tərəfindən 2000-dən çox medal, təqribən 600-dən çox qızıl medal qazanılıb. Bu, bir daha onu göstərir ki, idmanın inkişafı Azərbaycanda uğurla gedir. 2024-cü illə müqayisədə medalların sayı daha çoxdur və bu, yəqin ki, təbiidir. Çünki idmanın inkişafına göstərilən diqqət, aparılan dövlət siyasəti, əlbəttə ki, ildən-ilə daha yaxşı nəticələrə gətirib çıxarır.

Bu statistik rəqəm 2026-cı ili də daha böyük idman uğurları ilə başa vuracağımıza əminlik yaradır. Qələbəmizin təqdimatı olan medalların sayında artım olacağına da böyük əminlik var. Azərbaycan bütün sahələrdə, o cümlədən idmanda davamlı uğurların əldə edilməsi üçün zəruri addımları ilə diqqətdədir. Cənab İlham Əliyevin “Biz daim irəli baxmalıyıq” çağırışı bütün dövrlərdə və bütün sahələrdə öz aktuallığını qoruyur. Ölkəmizin bu və ya digər sahələr üzrə beynəlxalq tədbirlərə ev sahibliyi də bunun bariz nümunəsidir.

Dövlət başçısı İlham Əliyev qəbulda bu məqamı da diqqətə çatdırdı ki, federasiyaya gəldikdə onu da qeyd etməliyəm ki, bizim tanınmış idmançılarımız, Olimpiya çempionları federasiya rəhbərliyində təmsil olunurlar. Məşqçilər arasında da tanınmış idmançılar təmsil olunur. Bu gün məşqçi kimi fəaliyyət göstərən idmançıların yarışlarını vaxtilə mən özüm izləmişəm, həm Bakıda, həm Olimpiya Oyunlarında onlara azarkeşlik etmişəm. İndi isə onların yetirmələri bizi sevindirir. Bax belə, nəsillər dəyişdikcə güləş və bütövlükdə idman Azərbaycanda nəinki yaşayır, hətta inkişaf edir və yeni zirvələrə çatır. Nəsillər dəyişir, amma bir şey dəyişmir, o da Azərbaycan idmanının uğurları: “Əlbəttə, indi federasiya, xüsusilə bölgələrdə olan gənc idmançıları məşq, təlim toplanışlarına cəlb etmək üçün işini bundan sonra da təkmilləşdirəcək. Çünki bu gün hər bir bölgədə həm Olimpiya İdman kompleksləri var, eyni zamanda, güləş zalları. Ona görə bu seleksiya işi, əlbəttə ki, gələcək uğurlarımızın əsasını təşkil edəcək”.

Dövlət başçısı İlham Əliyevin Avropa çempionatında komanda hesabında çempion olan güləşçilərlə görüşü özündə mühüm çağırışları ehtiva edir. Bu, idmançılar üçün böyük stimuldur və onlarda məsuliyyət hissini daha da artırır. Dövlət başçısı İlham Əliyevin bu diqqət və qayğısı növbəti qələbələrə çağırışdır. Günümüzün qürurverici hadisələrindən biri məhz idmançılarımızın qalib, suverenliyini tam bərpa edən Azərbaycanı təmsil etmələridir. Cənab İlham Əliyevin qeyd etdiyi kimi, bu gün qalib dövlət və qalib xalq kimi yaşayan dövlətimiz, xalqımız, o cümlədən idman uğurları ilə fəxr edir.

Anar Nəbiyev

YAP Qazax rayon təşkilatının sədri

Paylaş:

Baxılıb: 284 dəfə