Azərbaycan–Mərkəzi Asiya əməkdaşlığında yeni mərhələ

Bakı:

22 °C

83 %

6 m/s

Əlaqə

AZ RU EN

Ana səhifə / YAP xəbərləri / Azərbaycan–Mərkəzi Asiya əməkdaşlığında yeni mərhələ

Azərbaycan–Mərkəzi Asiya əməkdaşlığında yeni mərhələ

09.10.2026 [16:25]

Azərbaycanın Mərkəzi Asiya dövlətləri ilə münasibətlərinin möhkəmləndirilməsi, regional əməkdaşlığın genişləndirilməsi və beynəlxalq nəqliyyat-logistika əlaqələrinin inkişafı ölkəmizin xarici siyasətinin prioritet istiqamətlərindəndir. Cənab Prezident İlham Əliyevin rəhbərliyi ilə həyata keçirilən məqsədyönlü siyasət nəticəsində Azərbaycan region dövlətləri ilə qarşılıqlı faydalı tərəfdaşlığını gücləndirir və ortaq inkişaf hədəflərinin reallaşdırılmasına mühüm töhfə verir.

Oktyabrın 8-də Türkmənistanın Türkmənbaşı şəhərində keçirilən Azərbaycan Respublikası və Mərkəzi Asiya Dövlət Başçılarının 8-ci Məşvərət görüşündə Prezident İlham Əliyevin çıxışı ölkəmizin regional əməkdaşlığa verdiyi töhfələri və gələcək tərəfdaşlığın əsas istiqamətlərini əks etdirib. Dövlət başçısı Azərbaycan ilə Mərkəzi Asiya ölkələri arasında siyasi dialoqun, iqtisadi əlaqələrin və qarşılıqlı etimadın daha da möhkəmləndirilməsinin vacibliyini vurğulayıb.

Azərbaycanın 2025-ci ildə Məşvərət formatına tamhüquqlu üzv kimi qoşulması ölkəmizin regiondakı mövqeyinin güclənməsinin və Mərkəzi Asiya ilə Cənubi Qafqaz arasında əlaqələrin inkişafının mühüm göstəricisidir. Bu əməkdaşlıq dövlətlər arasında iqtisadi, siyasi və humanitar münasibətlərin genişləndirilməsi üçün yeni imkanlar yaradır.

Dövlət Başçısı çıxışında iqtisadi-ticari əlaqələrin inkişafına xüsusi diqqət yetirib. Azərbaycan ilə Mərkəzi Asiya ölkələri arasında ticarət dövriyyəsinin artması, qarşılıqlı investisiyaların genişlənməsi və birgə investisiya fondlarının yaradılması tərəfdaşlığın konkret nəticələridir. Dövlət başçısı birgə istehsal müəssisələrinin qurulmasının, sənaye kooperasiyasının genişləndirilməsinin və beynəlxalq bazarlara birgə çıxış imkanlarının artırılmasının əhəmiyyətini qeyd edib.

Nəqliyyat və logistika sahəsində əməkdaşlıq görüşün əsas mövzularından biri olub. Azərbaycanın əlverişli coğrafi mövqeyi və müasir nəqliyyat infrastrukturu ölkəmizin Şərq ilə Qərb arasında mühüm tranzit mərkəzi kimi rolunu artırır. Orta Dəhlizin inkişafı, Xəzər dənizi üzərindən yükdaşımaların genişləndirilməsi və rəqəmsal bağlantıların gücləndirilməsi regionun beynəlxalq iqtisadi əlaqələrini daha da möhkəmləndirir.

Energetika sahəsində tərəfdaşlıq da strateji əhəmiyyət daşıyır. Azərbaycan Mərkəzi Asiya ölkələrinin enerji resurslarının dünya bazarlarına çatdırılmasında mühüm rol oynayır. Bununla yanaşı, yaşıl enerji sahəsində birgə layihələrin həyata keçirilməsi regionda enerji təhlükəsizliyinin möhkəmləndirilməsi və dayanıqlı inkişaf üçün geniş perspektivlər açır.

Azərbaycanın 2027-ci ildə Məşvərət formatına sədrlik edəcək olması ölkəmizin regional əməkdaşlığın inkişafındakı rolunu daha da artırır. Bu, birgə təşəbbüslərin genişləndirilməsi, iqtisadi əlaqələrin dərinləşdirilməsi və ortaq maraqların təmin olunması üçün mühüm imkanlar yaradacaq.

Cənab Prezident İlham Əliyevin Türkmənbaşı şəhərindəki çıxışı bir daha göstərir ki, Azərbaycan Mərkəzi Asiya dövlətləri ilə münasibətlərin inkişafına, regional sabitliyin möhkəmləndirilməsinə və qarşılıqlı faydalı əməkdaşlığın genişləndirilməsinə xüsusi önəm verir. Bu tərəfdaşlığın davamlı inkişafı regionun iqtisadi potensialının artırılmasına, beynəlxalq mövqelərinin güclənməsinə və xalqlarımızın rifahının yüksəldilməsinə mühüm töhfə verəcək.

Rövşən Əhmədov

YAP Ağcabədi rayon təşkilatının sədri

Paylaş:

Baxılıb: 28 dəfə