Mərkəzi Asiya və Azərbaycan: Birlik, Geostrateji Tərəfdaşlıq və Gələcəyə Baxış

Bakı:

22 °C

88 %

2 m/s

Əlaqə

AZ RU EN

Ana səhifə / YAP xəbərləri / Mərkəzi Asiya və Azərbaycan: Birlik, Geostrateji Tərəfdaşlıq və Gələcəyə Baxış

Mərkəzi Asiya və Azərbaycan: Birlik, Geostrateji Tərəfdaşlıq və Gələcəyə Baxış

09.10.2026 [17:25]

Müasir beynəlxalq münasibətlər sistemində regional inteqrasiya və çoxşaxəli tərəfdaşlıq modeli dövlətlərin davamlı inkişafının və milli təhlükəsizliyinin əsas zəmanətinə çevrilib. Bu kontekstdə Azərbaycan Respublikasının Prezidenti cənab İlham Əliyevin Türkmənistanın Türkmənbaşı şəhərində keçirilən Azərbaycan Respublikası və Mərkəzi Asiya Dövlət Başçılarının 8-ci Məşvərət görüşündəki tarixi çıxışı regionun gələcək inkişaf xəritəsini müəyyən edən mühüm strateji proqram xarakteri daşıyır. Azərbaycanın Mərkəzi Asiya ölkələri ilə dinamik inkişaf edən əlaqələri köklü tarixi, mədəni və mənəvi təməllərə söykənərək bu gün tamamilə yeni, keyfiyyətcə yüksək mərhələyə qədəm qoyub.

Azərbaycanın Vətən müharibəsində qazandığı tarixi zəfərdən sonra işğaldan azad edilmiş ərazilərdə həyata keçirilən genişmiqyaslı bərpa və quruculuq işlərində Mərkəzi Asiya dövlətlərinin nümayiş etdirdiyi həmrəylik xüsusi qiymətə layiqdir. Qardaş ölkələrin dövlət başçılarının birbaşa təşəbbüsü və diqqəti ilə Qarabağ və Şərqi Zəngəzurda sosial, təhsil və mədəniyyət obyektlərinin inşası xalqlarımız arasındakı sarsılmaz dostluğun praktiki göstəricisidir. Özbəkistan Respublikası tərəfindən Füzuli şəhərində inşa edilən Mirzə Uluqbəy adına 1 nömrəli tam orta məktəb, Qazaxıstan Respublikasının hədiyyəsi olan Kurmanqazı adına Uşaq Yaradıcılıq Mərkəzi və Qırğız Respublikası tərəfindən Ağdam rayonunda təməli qoyulan Manas adına məktəb təkcə təhsil ocaqları deyil, həm də sarsılmaz mənəvi körpülərdir. Azad olunmuş torpaqlarımızda yüksələn bu obyektlər Mərkəzi Asiya xalqlarının Böyük Qayıdış prosesinə verdiyi dəyərli töhfə və qardaşlıq borcunun parlaq rəmzidir.

Tərəfdaşlığımızın ən mühüm sütunlarından birini energetika sektoru təşkil edir. Azərbaycan Mərkəzi Asiyanın zəngin enerji resurslarının beynəlxalq bazarlara təhlükəsiz və fasiləsiz tranzitində etibarlı və əvəzsiz strateji mərkəz rolunu oynayır. Türkmənistan və Qazaxıstandan neft həcmlərinin ölkəmizin infrastrukturu vasitəsilə nəqli günbəgün artır və bu daşımaların miqyasının genişləndirilməsi hər iki tərəf üçün strateji iqtisadi dividendlər təmin edir. Bununla yanaşı, müasir dövrün qlobal çağırışlarına cavab olaraq bərpaolunan enerji sahəsində əməkdaşlıq sürətlə dərinləşir. Azərbaycan, Qazaxıstan və Özbəkistanın birgə səyləri ilə həyata keçirilən "Yaşıl enerji dəhlizi" layihəsi regionun enerji xəritəsini yenidən formalaşdırır. Mərkəzi Asiyanın "yaşıl enerji" potensialının Azərbaycan üzərindən Avropa bazarlarına nəqlini nəzərdə tutan bu meqalayihə regional inteqrasiyanı gücləndirməklə yanaşı, Avrasiya coğrafiyasında davamlı iqtisadi inkişafa güclü təkan verir.

Azərbaycan və Mərkəzi Asiya ölkələri arasında formalaşan strateji tərəfdaşlıq yalnız iqtisadi və nəqliyyat-logistika layihələri ilə hüdudlanmır. Bu formatın geosiyasi çəkisi və əhəmiyyəti xeyli genişdir. Ölkələrimizdə mövcud olan sülh, siyasi və iqtisadi sabitlik, eləcə də milli təhlükəsizlik mühiti əldə etdiyimiz bütün nailiyyətlərin ana təməlidir. Dövlət başçılarının nümayiş etdirdiyi ali siyasi iradə, qarşılıqlı hörmət və etimada söykənən birgə fəaliyyət Mərkəzi Asiya və Azərbaycanın gələcək uğurlu inkişafının əsas təminatçısıdır. Bu möhkəm birgə platforma region dövlətlərinin qlobal miqyasda nüfuzunu artırır, regional təhlükəsizliyi möhkəmləndirir və gələcək nəsillər üçün dinc, firavan və dayanıqlı gələcək vəd edir.

Zahir Qəhrəmanov

YAP Şirvan şəhər təşkilatının sədri

Paylaş:

Baxılıb: 51 dəfə