Yeni Azərbaycan Partiyası Xızı rayon təşkilatında müşavirə keçirilib

Bakı:

22 °C

83 %

4 m/s

Əlaqə

AZ RU EN

Ana səhifə / YAP xəbərləri / Yeni Azərbaycan Partiyası Xızı rayon təşkilatında müşavirə keçirilib

Yeni Azərbaycan Partiyası Xızı rayon təşkilatında müşavirə keçirilib

09.10.2026 [17:28]

06 oktyabr 2026-cı il tarixində Yeni Azərbaycan Partiyası Xızı rayon təşkilatında Azərbaycan Respublikasının Prezidenti, Yeni Azərbaycan Partiyasının sədri cənab İlham Əliyevin YAP-ın VIII Qurultayındakı nitqindən irəli gələn məsələlərə həsr olunmuş müşavirə keçirilib.

Müşavirədə Yeni Azərbaycan Partiyası İdarə Heyətinin üzvü, “Yeni Azərbaycan” qəzetinin baş redaktoru Alqış Musayev, YAP Mərkəzi Aparatının Təşkilat şöbəsinin baş məsləhətçisi Orxan Bayramov, YAP Xızı rayon təşkilatının sədri Ayaz Quliyev, partiya fəalları və rayon təşkilatının əməkdaşları iştirak ediblər.

Əvvəlcə xalqımızın Ümummilli Lideri Heydər Əliyevin abidəsi ziyarət edilib, abidənin önünə gül dəstələri düzülüb.

Tədbirin əvvəlində Ümummilli Lider Heydər Əliyevin və Azərbaycanın ərazi bütövlüyü, müstəqilliyi və suverenliyi uğrunda canlarından keçmiş şəhidlərin əziz xatirəsi bir dəqiqəlik sükutla yad edilib. Daha sonra Azərbaycan Respublikasının Dövlət Himni səsləndirilib.

Tədbiri giriş sözü ilə açan YAP Xızı rayon təşkilatının sədri Ayaz Quliyev Azərbaycan Respublikasının Prezidenti, Yeni Azərbaycan Partiyasının sədri cənab İlham Əliyevin VIII Qurultayda səsləndirdiyi fikirlərin və qarşıya qoyduğu vəzifələrin partiyanın gələcək fəaliyyətinin əsas istiqamətlərini müəyyənləşdirdiyini bildirib. Qeyd olunub ki, Yeni Azərbaycan Partiyası ölkənin ictimai-siyasi həyatında fəal iştirak edən, cəmiyyətin müxtəlif təbəqələrini öz ətrafında birləşdirən aparıcı siyasi qüvvə kimi qarşıya qoyulan vəzifələrin həyata keçirilməsində bundan sonra da fəal rol oynayacaq.

Yeni Azərbaycan Partiyası İdarə Heyətinin üzvü, “Yeni Azərbaycan” qəzetinin baş redaktoru Alqış Musayev çıxışında ölkədə həyata keçirilən dövlət siyasətinin ictimai-siyasi əhəmiyyətindən, Yeni Azərbaycan Partiyasının cəmiyyətin siyasi həyatındakı rolundan və VIII Qurultayda müəyyənləşdirilən prioritet istiqamətlərdən bəhs edib. Bildirib ki, partiyanın qarşısında duran vəzifələrin uğurla icrası hər bir partiya üzvünün fəallığından və təşəbbüskarlığından asılıdır.

Müşavirədə çıxış edən YAP Mərkəzi Aparatının Təşkilat şöbəsinin baş məsləhətçisi Orxan Bayramov VIII Qurultaydan irəli gələn məsələlər, partiya təşkilatlarının qarşısında duran əsas vəzifələr və təşkilati fəaliyyətin daha da təkmilləşdirilməsi istiqamətində görülməli işlər barədə fikirlərini bölüşüb. O, partiya strukturlarının yerlərdə fəaliyyətinin gücləndirilməsinin, üzvlərlə işin səmərəli təşkilinin və ictimai fəallığın artırılmasının vacibliyini diqqətə çatdırıb.

Müşavirədə çıxış edən partiya fəalları Abdulla Hüseynov , Elxan Manafov və Bahar Aslanova VIII Qurultaydan irəli gələn vəzifələrin həyata keçirilməsi, partiya üzvləri ilə işin daha da gücləndirilməsi, gənclərin və qadınların partiya fəaliyyətində fəal iştirakının təmin olunması, ictimai-siyasi proseslərdə fəallığın artırılması istiqamətində fikirlərini bildiriblər..

Tədbirin sonunda Yeni Azərbaycan Partiyasının himni səsləndirilib.

Paylaş:

Baxılıb: 72 dəfə