İqtisadi Əməkdaşlıq Təşkilatına üzv olan dövlətlərlə əməkdaşlıq genişlənir

AZ RU EN

Ana səhifə / YAP xəbərləri / İqtisadi Əməkdaşlıq Təşkilatına üzv olan dövlətlərlə əməkdaşlıq genişlənir

İqtisadi Əməkdaşlıq Təşkilatına üzv olan dövlətlərlə əməkdaşlıq genişlənir

16.11.2023 [11:10]

Azərbaycanın qarşılıqlı münasibətləri daha da dərinləşdirdiyi dövlətlərdən biri Özbəkistandır. Azərbaycan Özbəkistan əlaqələri həm ikitərəfli, həm də çoxtərəfli platformalarda, o cümlədən də Türk Dövlətləri Təşkilatında intensiv şəkildə inkişaf edir. İki ölkəni tarixdən gələn bir sıra bağlılıqlar, dövlətlərin siyasi iradəsi və cəmiyyətlərin istəyi birləşdirir. Bu gün Azərbaycanın və Özbəkistanın siyasi dialoqu, iqtisadi və humanitar sahələrdə əməkdaşlığı daha yüksək səviyyəyə qaldırmalarının qarşısında hər hansı bir maneə yoxdur.

Hazırda Azərbaycan Respublikası ilə Özbəkistan Respublikası arasında strateji tərəfdaşlıq uğurla inkişaf edir və önəmli iqtisadi əlaqələr yaradılır. Ötən il Prezident İlham Əliyevin Özbəkistana bir dövlət səfəri və iki işgüzar səfəri olmuşdur. Ölkələrimiz arasında diplomatik münasibətlər 1995-ci il oktyabrın 2-də qurulub. Siyasi dialoğun yüksək səviyyəsinə adekvat olaraq iqtisadi sahədə əməkdaşlıq genişlənir. Özbəkistan ilə ticarətimizdəki 64.0 faizlik artım birgə dövriyyəmizi 111 milyon 903 min dollardan 2022-ci ildə 183 milyon 307 min dollaradək artırıb. Ötən ilin iyun ayında Prezident İlham Əliyevin Özbəkistana baş tutan uğurlu dövlət səfəri çərçivəsində iki ölkənin prezidentləri “Azərbaycan Respublikası ilə Özbəkistan Respublikası arasında strateji tərəfdaşlığın dərinləşdirilməsi və hərtərəfli əməkdaşlığın genişləndirilməsi haqqında Bəyannamə”ni imzalayıblar. Bu sənəd mahiyyətcə iki dost ölkənin gələcək strateji əməkdaşlığının yol xəritəsidir.

Şavkat Miromonoviç Mirziyoyev yenidən Özbəkistan Prezidenti seçildikdən sonra ilk dövlət səfərini Azərbaycana etmişdir. Bu səfərlərin olması iki ölkə arasında qardaşlıq münasibətlərinin dərin olmasını bir daha nümayiş etdirir.

Noyabrın 9-da Özbəkistanın paytaxtı Daşkənd şəhərində İqtisadi Əməkdaşlıq Təşkilatının (ECO) 16-cı Zirvə toplantısı keçirildi. Cənab Prezident İlham Əliyevin Özbəkistan Respublikasının paytaxtı Daşkənd şəhərində İqtisadi Əməkdaşlıq Təşkilatının 16-cı Zirvə toplantısında çıxışı mühüm tarixi əhəmiyyət kəsb edir.Toplantıdakı çıxışında "Yaşıl keçid və qarşılıqlı əlaqələr" ilində Azərbaycanın sədrliyi çərçivəsində reallaşan tədbirlərin və təşəbbüslərin tərəfdaşlığımızın genişlənməsinə böyük töhfə verdiyini vurğulayan Özbəkistan Prezidenti Şavkat Mirziyoyev Bakıda Təmiz Enerji Mərkəzinin və Regional Elektrik Bazarının təşkili istiqamətində əməli tədbirlər həyata keçirildiyini, həmçinin ekologiya sahəsində də yüksək səviyyəli dialoq platforması yaradıldığını xüsusi vurğuladı. Bildirdi ki, turizm sektorunda əməkdaşlığın daha da genişləndirilməsi məqsədilə ilk dəfə olaraq tur-operatorlar şəbəkəsi formalaşdırılıb və Təhlükəsiz Turizmin İnkişafı Proqramı təsdiq edilib.

İqtisadi Əməkdaşlıq Təşkilatının üzvü kimi Azərbaycan təşkilatın işində fəal iştirak edir. Azərbaycan ECO-nun Təmiz Enerji Mərkəzinin ev sahibi kimi rəsmi olaraq təsdiqlənmişdir. Son illərdə Azərbaycanın nəqliyyat və logistika infrastrukturu ECO-nun üzv dövlətləri üçün açıqdır. Son illərdə Azərbaycan özünün nəqliyyat infrastrukturuna milyardlarla ABŞ dolları həcmində sərmayə qoymuş və Avrasiyanın Şərq-Qərb və Şimal-Cənub nəqliyyat dəhlizləri üzərində yerləşən nəqliyyat və logistika mərkəzlərindən birinə çevrilmişdir. Hər iki dəhlizin Azərbaycandan keçən hissələri tam hazır vəziyyətdədir. Cənab Prezident İlham Əliyev toplantıda çıxış edərək qeyd etmişdir ki, “Son 20 il ərzində Azərbaycan iqtisadiyyatına 310 milyard ABŞ dolları həcmində sərmayə qoyulmuş və bunun 200 milyard dolları qeyri-neft sektorunun payına düşür. Azərbaycanın neft və qaz ehtiyatları ilə zəngin olmasına baxmayaraq, bərpa olunan enerji sektorunun inkişafına xüsusi diqqət yetirilir. Azərbaycanın bərpa olunan enerji potensialı quruda 37 qiqavat külək və günəş enerjisi, Xəzər dənizinin ölkəmizə məxsus sektorunda isə 157 qiqavat külək enerjisi təşkil edir”.

Ölkə başçımız cıxışında Azərbaycan İqtisadi Əməkdaşlıq Təşkilatının işinə böyük əhəmiyyət verdiyini bildirmiş, Azərbaycanın xarici siyasətində ECO-ya üzv ölkələrlə əlaqələrin qurulması prioritet istiqamətlərdən olduğunu, həmçinin əməkdaşlıq əlaqələrin sabit qaydada şaxələndiyini və Azərbaycanın ECO-nun fəaliyyətinə töhfələr verdiyini bildirmişdir.Ölkəmiz təşkilatın bir sıra toplantılarına uğurla ev sahibliyi etmişdir. Belə ki, təşkilatın 9-cu və 12-ci Zirvə toplantıları müvafiq olaraq 2006-cı və 2012-ci illərdə Bakıda reallaşmiş, bu il oktyabrın 10-da isə Şuşada İqtisadi Əməkdaşlıq Təşkilatının Nazirlər Şurasının 27-ci iclası keçirilib. Eyni zamanda, Şuşa şəhəri 2026-cı il üçün ECO-nun turizm paytaxtı elan edilmişdir.

Azərbaycan bütün bu göstəriciləri ilə dünyanın aparıcı təşkilatlarının diqqət mərkəzindədir. Beynəlxalq sferada etibarlı tərəfdaş imici qazanmış ölkəmiz neft gəlirlərinin qeyri–neft sektoruna yönəldilməsi istiqamətində mühüm nailiyyətlər qazanmışdır. Azərbaycan Respublikasının İqtisadi Əməkdaşlıq Təşkilatına üzv olan dövlətlərlə sıx əməkdaşlıq etməsi iqtisadi potensialımızı daha da artırır və yeni layihələrin həyata keçməsinə şərait yaradır.

YAP Naftalan şəhər təşkilatının sədri Rövlan Heydərov

Paylaş:

Baxılıb: 156 dəfə