Azərbaycanda Qərb sosiologiyasına aid ilk kitab...

Bakı:

10 °C

81 %

1 m/s

Əlaqə

AZ RU EN

Ana səhifə / Mədəniyyət / Azərbaycanda Qərb sosiologiyasına aid ilk kitab...

Azərbaycanda Qərb sosiologiyasına aid ilk kitab...

24.10.2009 [10:37]

BDU-nun dosenti Azər Şirinovun müəllifliyilə çap olunmuş nəşr tələbələr, magistrlar və geniş oxucu kütləsi üçün nəzərdə tutulub
“ötən əsrin sonunda Azərbaycanın müstəqilliyə nail olması SSRİ məkanında yaranmış digər müstəqil dövlətlərdə olduğu kimi, respublikamızda da cəmiyyətşünaslıq elmlərinin, o cümlədən, sosiologiyanın inkişafına, müstəqil fənn kimi tədrisinə əlverişli şərait yaratdı. Sosiologiyanın tarixini, nəzəri və praktiki problemlərini öyrənən mütəxəssislər haqlı olaraq qeyd edirdilər ki, keçmiş sosialist birliyi ölkələrində, o cümlədən, Azərbaycanda uzun müddət kommunist ideologiyasının hökmranlığı əslində, cəmiyyət haqqında bilikləri məhdudlaşdıraraq müəyyən qəlibə salmış, sosioloji tədqiqatlara birtərəfli münasibət formalaşdırmış, bununla da bir çox xalqların sosial və mənəvi cəhətdən zənginləşməsinə mane olmuşdur”. Bu fikirlər Bakı Dövlət Univesitetinin dosenti, Politologiya və Sosiologiya kafedrasının müdir müavini Azər Şirinovun yenicə nəşr olunmuş, nəfis tərtibatda verilmiş “Qərb sosiologiyası” kitabındandır. Müəllifin yazdıqlarına görə, müasir dövr həyatımız sübut edir ki, sosial və siyasi biliklərin öyrənilməsi, əhalinin ümumi bilik və mədəniyyət səviyyəsinin yüksəldilməsi zəruri praktik tələbata çevrilmişdir. Azərbaycanda sosiologiya elminin kökləri ötən əsrin 60-cı və 70-ci illərinə təsadüf edir. Həmin dövrdə respublikamızda sosiologiyanın tədris olunması zərurəti ciddi şəkildə əsaslandırılmış, sosial problemlərin tədqiqi sahəsində müəyyən addımlar atılmışdır. Azərbaycan müstəqil inkişaf yolunu tutması, sosial elmlərin, o cümlədən, sosiologiyanın inkişafına təkan verdi. Bunun nəticəsində son illər respublikamızda sosiologiya və sosioloji tədqiqat sahəsində bir sıra monoqrafiyalar, dərsliklər, dərs vəsaitləri buraxılmışdır. Bütün bu tədqiqatlarda ümumi sosiologiyanın mühüm nəzəri və metodoloji problemləri öz əksini tapsa da, Qərb sosiologiyasının nəzəri axtarışlarına ya toxunulmuş, ya da səthi şəkildə münasibət bildirilmişdir. Doğrudur, Qərb sosioloji nəzəriyyələrini, xüsusilə, müasir konsepiya və baxışlarını öyrənmək müəyyən çətinliklərlə əlaqədardır. Bu, hər şeydən əvvəl, onunla əlaqədardır ki, respublikamızda bu sahədə elmi ədəbiyyat və tərcümə əsərləri kifayət dərəcədə deyildir. İkincisi, rus dilində sovet dövrünə aid olan ittifaq ədəbiyyatında Qərb və Amerika sosiologiyası marksist-leninçi metodologiya baxımından təhlil və tənqid edilmişdir. üçüncüsü, son illərdə rus dilində bu sahəyə aid nəşr edilən ədəbiyyatın qıtlığı geniş və əhatəli tədqiqat işinin yazılmasını çətinləşdirir.
Nəzərə almaq lazımdır ki, hazırda müstəqillik yolu ilə inamla irəliləyən respublikamızın Qərb dünyası ilə əlaqələri xeyli dərəcədə inkişaf edib, məzmunca dolğunlaşıb. Qloballaşma meyli, əslində, milli qapalılıq, milli əlahiddəlik hüdudlarını getdikcə məhdudlaşdırır, milli təhlükəsizlik probleminə yeni müstəvidə yanaşmağı tələb edir. Qərb dünyası ilə təmas nöqtələrinin artması oradakı fəal mənəvi-intellektual axtarışların əsas istiqamətlərini düzgün başa düşməyə, milli inkişafımızın real zəmininə istinad etməyə, eyni zamanda, qloballaşmanın, inteqrasiyanın açdığı imkanlardan maksimum bəhrələnməyə tələbat yaradır. Ona görə də, cəmiyyətimizin sosial həyatının daha rasional təşkilinə, sosial nizamın daha yüksək və humanist keyfiyyətinə olan ehtiyac Qərbin müasir sosioloji axtarışlarının zənginliyi barəsində aydın təsəvvür əldə olunmasını zəruri edir. Zənnimizcə, hazırkı kitab həmin ehtiyacın müəyyən səviyyədə ödənilməsinə köməklik göstərəcək.
Xatırladaq ki, geniş oxucu kütləsi üçün nəzərdə tutulan nəşr respublikamızda Qərb sosiologiyasına aid ilk kitabdır.
RAMİL

Paylaş:

Baxılıb: 1460 dəfə