Heydər Əliyev yeni azerbaycan logo

Ana səhifə / Siyasət / “B” planı...

“B” planı...

20.05.2022 [10:37]

Ermənistanın çıxış yoludurmu?

Taleh AĞAVERDİYEV

Radikal erməni müxalifəti bütün mümkün qüvvələri toplayaraq yenidən köhnə arzusunu - Nikol Paşinyanın devrilməsinə cəhd edir. “Ermənistan” fraksiyasından olan parlament üzvlərinin müşayiəti ilə gənc daşnaklardan ibarət kiçik qruplar İrəvan küçələrini blokadaya almağa başladılar və bu, gözlənildiyi kimi, polislə toqquşma və həbslərlə nəticələndi. Saxlanılanların sayı 400-ə yaxınlaşır, yerli polis idarələri sözün əsl mənasında etirazçılarla doludur, hər iki tərəfdən zorakılıq tətbiq olunur: Ermənistan Baş Qərargahının keçmiş rəhbərinin oğlu İrəvanda polisi döyüb, polis həbs zamanı az qala “Daşnaksütyun” partiyasının sədrinin qolunu sındırıb (bəzi etirazçıların isə “az qala” deyil, doğrudan da sındırıb).

Bir sözlə, Ermənistanda daxili siyasi xaos davam edir. Ermənistanın baş naziri Nikol Paşinyan hətta təcili olaraq Təhlükəsizlik Şurasının iclasını keçirməyə məcbur olub. Qonşu ölkədə baş verən bütün bu çaşqınlıq fonunda xəbərlər yayılmağa başladı ki, Ermənistan hakimiyyəti uzun sürən müqavimət hərəkatından narahatdır və daxili siyasi böhranın həlli vasitəsi kimi yenə növbədənkənar parlament seçkilərinin keçirilməsini müzakirə etməyə başlayıb. “Nikol Paşinyanın komandası hesab edir ki, vəziyyət idarəolunmaz olarsa və hakimiyyətin etirazçıları saxlamaq üçün resursları olmasa, yenidən növbədənkənar parlament seçkiləri elan etməyə dəyər. Bu, mövcud rejimin səlahiyyətlərinin uzadılması demək olacaq. Bu, etiraz dalğasını yatıra bilməyəcəyi təqdirdə hakimiyyətin “B” planıdır”, - deyə Ermənistanın “Hraparak” qəzeti yazır.

Bu nəşr, əslində müxalif yönümlüdür və məlumatın etibarlılığı sual altındadır. “Cənubi Qafqaz” Politoloqlar Klubunun rəhbəri, politoloq İlqar Vəlizadə belə bir ssenarinin nə dərəcədə real olması və mövcud hakimiyyət seçkilərdə uduzarsa və ya zorakılıqla devrilərsə, Ermənistanda hakimiyyət dəyişikliyinin hansı fəsadlara səbəb ola biləcəyi ilə bağlı suallarımızı cavablandırıb.

“Əlbəttə, bu, Ermənistan rəhbərliyinin səlahiyyətində olan məsələdir, lakin kənardan belə qısa müddətdə təkrar növbədənkənar parlament seçkilərinin keçirilməsi çox absurd görünür. Hakimiyyət öz legitimliyini tez-tez keçirilən parlament seçkiləri və ya referendumlarla deyil, apardıqları siyasətin effektivliyi ilə təsdiq etməlidir. Siyasət effektiv olmalıdır ki, belə addımlara ehtiyac olmasın”, - deyə həmsöhbətimiz bildirib.

Müxalifətin hərəkətlərinə gəlincə, politoloq qeyd edib ki, bunlar, ilk növbədə, bu gün Ermənistan cəmiyyətində asayişi pozan, zorakılığa açıq çağırışlar edən dağıdıcı qüvvələrdir: “Belə insanlara münasibətdə müvafiq qanunvericilik təsir alətləri var və hesab edirəm ki, onlar tətbiq edilməlidir. Digər tərəfdən, təbii ki, bütün bunlar Ermənistan tərəfinin insan hüquqlarına riayət olunması ilə bağlı üzərinə götürdüyü humanitar öhdəliklər çərçivəsində baş verməlidir. Amma burada hiss olunur ki, erməni tərəfi bəzi hallarda, yumşaq desək, həddini aşmaqdadır. Müvafiq beynəlxalq təşkilatlar isə buna heç bir reaksiya vermir, Ermənistana heç bir təzyiq göstərmir. Bu da, bir tərəfdən bu beynəlxalq təşkilatlara, onların effektivliyinə dair çoxsaylı suallar doğurur, digər tərəfdən isə etirazçılara qarşı daha sərt davranmaq üçün Ermənistan hakimiyyətinin əl-qolunu açır”.

İlqar Vəlizadə revanşistlərin hakimiyyətə gəlməsinin fəlakətli nəticələrə səbəb olacağını vurğulayıb.

“Mən inanmıram ki, onlar uğur qazana biləcəklər, lakin nəzəri cəhətdən bu baş verərsə, təkcə Ermənistan üçün deyil, bütövlükdə region üçün fəlakətli nəticələrə gətirib çıxaracaq. Ona görə də bu məsələdə təkcə daxili qüvvələr deyil, həm də xarici qüvvələr (xüsusən də regionda sülh və əmin-amanlığı qorumağa çalışan ölkələrin simasında) belə bir ssenarinin reallaşmasının qarşısını almaqda maraqlı olmalıdırlar. Çünki bu adamlar müharibəni, zorakılığı təbliğ edirlər və onların hakimiyyətə qayıdışı yaxşı heç nəyə gətirib çıxarmayacaq”, - deyə həmsöhbətimiz fikrini yekunlaşdırıb.

Paylaş:
Baxılıb: 178 dəfə

Xəbər lenti

Hamısına bax

Turizm

Sosial

Xarici siyasət

Prezident bu gün

Prezident bu gün

29 İyun 10:17

MEDİA

İqtisadiyyat

Siyasət

Azadlıqdan abadlığa...

29 İyun 09:40  

Gündəm

Dəmir yumruq yerindədir

29 İyun 09:32  

Xəbər lenti

Xəbər lenti

Xəbər lenti

Xəbər lenti

Prezident bu gün

Prezident bu gün

28 İyun 10:14

Xəbər lenti

İqtisadiyyat

Neft bahalaşıb

28 İyun 09:21

Xəbər lenti

Arxiv
B Be Ça Ç Ca C Ş
1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30