BMT Bakının tələbini qəbul etdi

Bakı:

15 °C

77 %

1 m/s

Əlaqə

AZ RU EN

Ana səhifə / Siyasət / BMT Bakının tələbini qəbul etdi

BMT Bakının tələbini qəbul etdi

27.10.2023 [10:32]

Bu, Azərbaycanın beynəlxalq müstəvidə yüksək nüfuzunun göstəricisidir

N.BAYRAMLI

BMT Baş Assambleyasının 78-ci sessiyasının prezidenti, Trinidad və Tobaqonun sabiq Baş naziri və BMT yanında daimi nümayəndəsi Dennis Frensis Azərbaycanın BMT yanında Daimi Nümayəndəliyinə məktub göndərib. Məktubda BMT Baş Assambleyasının prezidenti Azərbaycanın Qoşulmama Hərəkatının Koordinasiya Bürosunun sədri qismində fövqəladə xüsusi sessiyanın çağırılması tələbini qəbul etdiyini bildirib.

Baş Assambleyanın xüsusi sessiyasının oktyabrın 26-da BMT-yə üzv olan 120 ölkənin, 18 müşahidəçi ölkənin və 10 müşahidəçi təşkilatın iştirakı ilə BMT-nin Nyu-Yorkdakı qərargahında keçirilməsi qeyd olunub.

Bu fakt Azərbaycanın beynəlxalq müstəvidə yüksək nüfuzunun göstəricisidir. Ölkəmiz beynəlxalq təşkilatlar çərçivəsində fəal siyasət həyata keçirir ki, bu da dünyada rəğbətlə qarşılanır. Xüsusilə, Qoşulmama Hərəkatının sədri olaraq dövlətimiz mühüm təşəbbüslərlə çıxış edib.

Azərbaycanın sədrliyi COVID-19 pandemiyasının qlobal miqyasda yayılması ilə eyni dövrə təsadüf etsə də, ölkəmiz QH sədrliyi qismində irəli sürdüyü və Hərəkata üzv dövlətlər tərəfindən yekdilliklə dəstəklənən beynəlxalq əhəmiyyətli uğurlu təşəbbüslər sayəsində pandemiya ilə əlaqəli çətinlikləri beynəlxalq əməkdaşlıq imkanlarına çevirməyi bacarıb. Bu xüsusda QH-nin COVID-19 pandemiyasına qarşı mübarizə üzrə yüksək səviyyəli Təmas Qrupunun təsis edilməsini, 4 may 2020-ci ildə onun virtual formatda Sammit səviyyəli görüşünün keçirilməsini, QH-nin sədri qismində ölkə başçısı İlham Əliyevin təşəbbüsü əsasında 2020-ci ilin 3-4 dekabr tarixlərində BMT Baş Assambleyasının COVID-19 pandemiyasına qarşı mübarizə üzrə xüsusi sessiyasının keçirilməsini qeyd etmək olar. Xüsusi sessiyada da BMT-yə üzv olan ölkələr (Ermənistan istisna olmaqla) Azərbaycanın təşəbbüsünü və çağırışlarını yüksək qiymətləndirdilər.

Həmçinin, ölkə başçısının təşəbbüsü ilə QH-nin Azərbaycan sədrliyi tərəfindən əvvəlcə BMT-nin İnsan Hüquqları Şurasında, daha sonra isə BMT Baş Assambleyasında “COVID-19 əleyhinə peyvəndlərə bərabər, məqbul qiymətə, vaxtında və universal əlçatanlığın təmin edilməsi” adlı qətnamə layihələrinin irəli sürülməsi və qəbul edilməsi kimi addımlar ölkəmizin və Hərəkatın beynəlxalq nüfuzunu əhəmiyyətli dərəcədə gücləndirib.

BMT-nin növbəti xüsusi sessiyasının keçirilməsi də Azərbaycanın beynəlxalq miqyasda baş verən hadisələrə, dünyanı narahat edən proseslərə adekvat münasibətinin və dünya ictimaiyyətinin qlobal problemlərin həllində həmrəyliyinin təmin olunmasına yönələn səylərinin göstəricisidir. Bu baxımdan, Qoşulmama Hərəkatının Koordinasiya Bürosunun sədri qismində Azərbaycanın təşəbbüsü ilə BMT Baş Assambleyassının fövqəladə xüsusi sessiyasının keçirilməsi böyük önəm kəsb edir.

Paylaş:

Baxılıb: 544 dəfə