Radikal müxalifət cəbhəsində yeni qarşıdurma meyilləri...

Bakı:

15 °C

77 %

1 m/s

Əlaqə

AZ RU EN

Ana səhifə / Siyasət / Radikal müxalifət cəbhəsində yeni qarşıdurma meyilləri...

Radikal müxalifət cəbhəsində yeni qarşıdurma meyilləri...

17.02.2012 [23:47]

İsa Qəmbər - Arif Hacılı qarşıdurmasının fonunda Müsavat daxilində mövcud olan ziddiyyətlər İctimai Palatada da parçalanma tendensiyalarının kəskinləşməsini şərtləndirir
Hər zaman müxtəlif xarakterli qarşıdurmalar və ziddiyyətlərlə gündəmə gələn radikal müxalifət bu dəfə də eyni aqibətlə üz-üzədir. Daha doğrusu, ənənəvi surətdə mövcud olan silsilə uğursuzluqlar, korporativ maraqların təmin olunması üçün aparılan pərakəndə mübarizə bəhs edilən düşərgədə parçalanma meyilləri, qarşıdurma və qütbləşmə tendensiyalarını daha da kəskinləşdirib. Ziddiyyətlər və qarşıdurmaların hazırki halqası qismində isə Müsavat Partiyası çıxış etməkdədir.
Məlum olduğu kimi, Müsavat Partiyasının qurultayı yaxınlaşdıqca orada sədrlik mübarizəsi çərçivəsində gərginlik və qarşıdurma meyilləri daha da güclənir. Bu proseslərin mərkəzində isə İsa Qəmbərin sədrlik postundan getmək istəməməsi dayanır. Daha dəqiq desək, İsa Qəmbər öz postunu əldən buraxmamaq, inhisara aldığı sədrliyi davam etdirmək üçün ən müxtəlif metod və vasitələrdən yararlanmağa çalışır. Belə ki, o gah partiya Nizamnaməsinin dəyişdirilməsi istiqamətində “aktual müzakirələr”in başlanmasına cəhd göstərir, gah da partiya daxilində müxtəlif ziddiyyətlər yaratmaqla məqsədinə çatmaq istəyir. Əslində İsa Qəmbərin fəaliyyətinə dərindən bələd olanlar bunu heç də təəccüblü qarşılamırlar. Belə ki, İ.Qəmbər Müsavat Partiyasına sədrlik etdiyi bütün dönəmlərdə düçar olduğu silsilə uğursuzluqları ört-basdır etmək üçün məhz bu cür manipulyativ metodlara istinad edib, atdığı addımlarla yalnız gərginlik və qarşıdurmaları gücləndirib. Odur ki, məhz bu gün də İ.Qəmbər təşkilat daxilində korporativ maraqlarının təmin olunması üçün siyasi manipulyasiyalar edir.
Bütün bunların fonunda isə Müsavat daxilində yeni qütbləşmə və qarşıdurma meyilləri meydana çıxır və daha da kəskinləşir. çünki İ.Qəmbərin sədrlik postunu əldən buraxmamaq uğrunda apardığı mübarizənin fonunda partiya daxilindəki qruplaşmalar da adekvat tədbirlər görməyə və addımlar atmağa çalışırlar. Məsələn, Arif Hacılı müxtəlif xarakterli bəyanatlar verməklə İsa Qəmbərin sədrlikdən getməsinin zəruri olduğunu ifadə edir və özünü ona başlıca opponent qismində təqdim edir. A.Hacılı-İ.Qəmbər qarşıdurmasının fonunda isə Müsavat daxilindəki qütbləşmə daha da dərinləşir.
Digər tərəfdən, sabiq Müsavat funksioneri Vurğun Əyyuba yaxın qruplaşma da sədrlik postunu ələ keçirmək istəyir. Nəticədə bu kontekstdə hər üç qruplaşmalar arasında ziddiyyətlərin daha da dərinləşməsi qanunauyğun hala çevrilir.
Yeri gəlmişkən, bütün bunların fonunda İ.Qəmbərin 2013-cü ildə keçiriləcək prezident seçkilərində radikal müxalifətin “birliyi” olan İctimai Palatadan (İP) vahid namizəd kimi irəli sürülməsi variantının ortaya çıxması isə radikal düşərgədə yeni qarşıdurmalara rəvac verib. çünki İP daxilində də hər hansı həmrəylik mövcud deyil və orada təmsil olunan qurumlar şəxsi ambisiyalardan çıxış etməkdədirlər. Daha da dəqiqləşdirsək, kimsəyə sirr deyil ki, özünü İP daxilində lokomotiv qüvvə kimi qələmə verməyə cəhd göstərən Əli Kərimlinin rəhbərlik etdiyi AXCP heç də İ.Qəmbərin buradan prezidentliyə vahid namizəd kimi irəli sürülməsinə imkan verməyəcək. Qarşı tərəfin edəcəyi həmlələr isə ənənəvi surətdə qeyri-sabitliyi ilə səciyyələnən AXCP-Müsavat münasibətlərinin növbəti gərginlik və qarşıdurma mərhələsinə çıxmasına səbəb olacaq.
Beləliklə, göründüyü kimi, Müsavatın timsalında radikal müxalifət yeni parçalanma və qarşıdurma ərəfəsindədir. Hazırki reallıqları və tendensiyaları nəzərə alaraq belə bir proqnoz verə bilərik ki, mövcud qarşıdurma meyilləri daha da kəskinləşəcək və bu İP daxilində yeni ziddiyyətlər, həmçinin, parçalanmaların meydana çıxmasını şərtləndirəcək.
NURLAN QƏLƏNDƏRLİ

Paylaş:

Baxılıb: 924 dəfə