Gənclər Fondu 6-cı qrant müsabiqəsinə yekun vurub

Bakı:

24 °C

56 %

3 m/s

Əlaqə

AZ RU EN

Ana səhifə / Sosial / Gənclər Fondu 6-cı qrant müsabiqəsinə yekun vurub

Gənclər Fondu 6-cı qrant müsabiqəsinə yekun vurub

06.12.2014 [12:04]

Dekabrın 5-də Azərbaycan Respublikasının Prezidenti yanında Gənclər Fondunun Müşahidə Şurasının növbəti iclası keçirilib.
Fondun mətbuat xidmətindən AzərTAc-a bildiriblər ki, iclasın gündəliyinə 6-cı qrant müsabiqəsi çərçivəsində təqdim olunan layihələrin müzakirəsi, qurum tərəfindən maliyyələşdirilən layihələrin monitorinqi qaydalarının təkmilləşdirilməsi və digər məsələlər daxil edilib.
Müşahidə Şurasının sədri, Prezident Administrasiyasının İctimai-siyasi məsələlər şöbəsi müdirinin müavini Tahir Süleymanov 6-cı qrant müsabiqəsi barədə məlumat verərək bildirib ki, 2014-cü il sentyabrın 5-dən oktyabrın 20-dək Fonda “A” (yerli layihələr), “B” (beynəlxalq layihələr) və “C” (fiziki şəxslərin layihələri) kateqoriyaları üzrə 1248 layihə təklifi daxil olub. Oktyabrın üçüncü ongünlüyü və noyabr ayı ərzində layihələr Fondun aparatının əməkdaşları tərəfindən sistemləşdirilib, hər biri haqqında annotasiya hazırlanıb, 500-dək müraciətçi ilə görüşlər keçirilib.
Müşahidə Şurasının üzvləri əvvəlki müsabiqələr çərçivəsində maliyyələşdirilmiş layihələrin hesabatlarını indiyədək təqdim etməyən gənclər təşkilatlarının və fiziki şəxslərin müraciətlərinə baxılmaması barədə razılığa gəliblər. Digər təkliflər qiymətləndirilərkən ilk növbədə, ictimai əhəmiyyət daşıyan, gənclərin fiziki, intellektual və mənəvi inkişafına xidmət edən, real icra planı və büdcəsi olan layihələrə üstünlük verilib.
Aparılan müzakirələr nəticəsində “A” kateqoriyası üzrə 137 layihədən 103-ü, “B” kateqoriyası üzrə 24 layihədən 13-ü, “C” kateqoriyası üzrə 1087 layihədən 292-nin dəstəklənməsi məqsədəuyğun sayılıb. Barələrində müsbət qərar qəbul olunan 408 layihənin maliyyələşdirilməsi üçün Fond tərəfindən 2 milyon 86 min 100 manat vəsaitin ayrılması nəzərdə tutulub (həmin layihələrin siyahısı 2014-cü il dekabrın 9-da Fondun rəsmi internet səhifəsində yerləşdiriləcək).
İclasda Fond tərəfindən maliyyələşdirilən layihələrin monitorinqinin təkmilləşdirilməsi ilə bağlı məsələ müzakirəyə çıxarılıb. “Azərbaycan Respublikasının Prezidenti yanında Gənclər Fondu tərəfindən maliyyələşdirilmiş layihələrin monitorinqinin aparılması Qaydaları”na bir sıra əlavə və dəyişikliklər təklif edilib. Müzakirələrdən sonra həmin təkliflər qəbul olunub.
Erməni diasporuna qarşı mübarizənin səmərəliliyinin artırılması istiqamətində daha təsirli və ardıcıl tədbirlərin görülməsinin vacibliyi vurğulanaraq, Ermənistan-Azərbaycan, Dağlıq Qarabağ münaqişəsi və azərbaycanlılara qarşı törədilən soyqırımların araşdırılması ilə bağlı xarici tədqiqatçılar və tələbələr üçün qrant müsabiqələrinin keçirilməsinin zəruriliyini qeyd edilib. Bu məqsədlə xüsusi kateqoriyanın müəyyən edilməsi və ya mövcud olanlardan birinin yenisi ilə əvəzlənməsi barədə təkliflər səslənib. Müşahidə Şurası tərəfindən qəbul edilən sənədlərə müvafiq əlavə və dəyişikliklərin layihəsinin hazırlanması üçün Şura üzvləri və Fondun əməkdaşlarından ibarət tərkibdə işçi qrupu yaradılıb. Yeni kateqoriya üzrə müsabiqənin 2015-ci ilin əvvəllərində elan edilməsi qərara alınıb.
Gündəlikdəki məsələlərlə bağlı müzakirələrdə Müşahidə Şurasının üzvləri iştirak ediblər.

Paylaş:

Baxılıb: 999 dəfə