Bölgələrdə iftar süfrələri açılır

Bakı:

24 °C

66 %

11 m/s

Əlaqə

AZ RU EN

Ana səhifə / Sosial / Bölgələrdə iftar süfrələri açılır

Bölgələrdə iftar süfrələri açılır

14.07.2015 [09:53]

Prezident İlham Əliyevin 2014-cü il noyabrın 27-də imzaladığı Sərəncama əsasən, ölkədə dini maarifləndirmə və milli mənəvi dəyərlərin təbliği işini daha da gücləndirmək məqsədi ilə dini icmalara maliyyə yardımı göstərmək üçün Azərbaycan Respublikasının 2014-cü il dövlət büdcəsində nəzərdə tutulmuş Prezidentin Ehtiyat Fondundan Dini Qurumlarla İş üzrə Dövlət Komitəsinə (DQİDK) 2,5 milyon manat vəsait ayrılıb. Həmin maliyyə vəsaiti hesabına Ramazan ayında maarifləndirmə işinin aparılması məqsədilə Dövlət Komitəsinin dəstəyi ilə paytaxtda və bölgələrdə iftar süfrələri təşkil edilir.
DQİDK-dən AZƏRTAC-a verilən məlumata görə, növbəti iftar süfrəsi iyulun 10-da Bakı şəhəri, Xəzər rayonu Türkan qəsəbəsi “İmam Hüseyn” məscidi dini icması tərəfindən açılıb. Tədbirdə Dini Qurumlarla İş üzrə Dövlət Komitəsinin Bakı şəhəri üzrə şöbəsinin müdiri Anar Kazımov, dini icma üzvləri, ağsaqqallar, gənclər, həmçinin dindarlar iştirak ediblər.
Tədbiri açan DQİDK-nın Bakı şəhəri üzrə şöbəsinin müdiri A.Kazımov bildirib ki, ölkə rəhbərliyi hər zaman dindarlara diqqət və qayğı göstərir. Dindarların ibadəti üçün hər cür şəraitin yaradıldığını diqqətə çatdıran şöbə müdiri dövlətin dinə diqqət və qayğısının təməlinin Ümummilli lider Heydər Əliyev tərəfindən qoyulduğunu və bu siyasətin hazırda Prezident İlham Əliyev tərəfindən davam etdirildiyini vurğulayıb.
Daha sonra çıxış edən dindarlar göstərilən diqqət və qayğıya görə dövlətimizin başçısına minnətdarlıqlarını bildiriblər.
İyulun 10-da Dövlət Komitəsinin Bakı şöbəsinin əməkdaşlarının iştirakı ilə paytaxtın Qaradağ rayonu, Lökbatan qəsəbə məscidi dini icması və eləcə də, Sabunçu rayonu Bakıxanov qəsəbəsi “İmam Rza” məscidi dini icması, həmçinin iyulun 11-də Yasamal rayonu “Xanım Zəhra” məscidi tərəfindən də iftar süfrələri təşkil olunub. Təşkil olunmuş iftar mərasimlərində çıxış edənlər bu cür tədbirləri Azərbaycanda dövlət-din münasibətlərinin yüksək səviyyədə olmasının bariz nümunəsi kimi qiymətləndiriblər.
İyulun 10-da Şamaxı rayonunda da iftar süfrəsi təşkil edilib. Tədbirdə Şamaxı rayon İcra Hakimiyyətinin başçısı Asif Ağayev, Dini Qurumlarla İş üzrə Dövlət Komitəsi sədrinin birinci müavini Səyyad Aran, RİH başçısının müavinləri, Şamaxı rayonu “İmamzadə” məscidi dini icmasının sədri və eyni zamanda, QMİ-nin səlahiyyətli nümayəndəsi Elşən Rüstəmov, Şamaxı bölgəsi üzrə şöbənin müdiri vəzifəsini icra edən Rəhim Rəhimli, Şamaxı “Cümə” məscidi dini icmasının üzvləri, dini icma sədrləri, imam və axundlar, rayon ağsaqqalları, rayonda fəaliyyət göstərən idarə və müəssisə rəhbərləri iştirak ediblər.
Tədbiri açan rayon İcra Hakimiyyətinin başçısı Asif Ağayev dövlətin dindarlara qayğısından danışaraq, iftar süfrəsinin təşkil olunmasına görə Dövlət Komitəsinə minnətdarlığını bildirib.
Sonra Dövlət Komitəsi sədrinin birinci müavini S.Aran Ramazan orucunun mənəvi mahiyyətindən, dini maarifləndirmə sahəsində görülən işlərdən danışıb.
Daha sonra çıxış edən “İmamzadə” məscidi dini icmasının sədri və QMİ-nin səlahiyyətli nümayəndəsi Elşən Rüstəmov dini maarifləndirmə işinin aparılması məqsədilə dövlətimizin başçısının imzaladığı Sərəncamın dinə, dindarlara göstərilən diqqət və qayğının bir nümunəsi olduğunu qeyd edib, həmçinin bu sahədə Dövlət Komitəsinin əldə etdiyi uğurları vurğulayıb.
İyulun 11-də Ağdam rayonu Xındırıstan kənd məscidi dini icmasında da iftar süfrəsi açılıb. Tədbirdə Dini Qurumlarla İş üzrə Dövlət Komitəsinin dini qurumlarla iş üzrə şöbəsinin baş məsləhətçisi Vüqar Hümmətov, Ağcabədi bölgəsi üzrə şöbə müdiri Əlizadə Nəcəfov, rayon İcra Hakimiyyətinin nümayəndələri, dindarlar, ağsaqqallar iştirak ediblər.
İftar süfrəsi ətrafında QMİ-nin səlahiyyətli nümayəndəsi, Ağdam rayonu Xındırıstan kənd məscidi dini icmasının sədri və axundu Hacı Barat Bağırov, DQİDK-nın baş məsləhətçisi V.Hümmətov, Ağdam rayonunun Xındırıstan kənd bələdiyyəsinin sədri Nizami Quliyev və digərləri çıxış edərək Ramazan ayının fəzilət və dəyərlərindən, onun vəhdət və birlik ayı olmasından, “Qurani-Kərim”in məhz bu ayda nazil olmasından, əhya gecələri və İslam dininin başqa dəyərlərindən geniş bəhs ediblər.
Rayon İcra Hakimiyyətinin nümayəndəsi Tahir Abbasov bildirib ki, son dövrlərdə Dini Qurumlarla İş üzrə Dövlət Komitəsi Ağdam rayon İcra Hakimiyyəti ilə birgə bir neçə layihə həyata keçirib.
Bundan başqa, Ağcabədi rayonu Muğanlı kənd məscidi dini icması, Ağcabədi rayon Seyid Mürsəl Ağa məscidi dini icması tərəfindən də iftar süfrələri açılıb. Tədbirlərdə Dini Qurumlarla İş üzrə Dövlət Komitəsinin, rayon İcra Hakimiyyətinin nümayəndələri, dindarlar iştirak ediblər.