Xaçmaz “Multikultural dəyərləri yaşadaq” adlı beynəlxalq festivala ev sahibliyi edib

Bakı:

12 °C

82 %

5 m/s

Əlaqə

AZ RU EN

Ana səhifə / Sosial / Xaçmaz “Multikultural dəyərləri yaşadaq” adlı beynəlxalq festivala ev sahibliyi edib

Xaçmaz “Multikultural dəyərləri yaşadaq” adlı beynəlxalq festivala ev sahibliyi edib

25.06.2016 [13:16]

İyunun 24-də Xaçmaz şəhərində Mədəniyyət və Turizm Nazirliyinin Mədəniyyətşünaslıq üzrə Elmi-Metodiki Mərkəzi və Xaçmaz rayon İcra Hakimiyyətinin təşkilatçılığı ilə “Multikultural dəyərləri yaşadaq” adlı beynəlxalq festival keçirilib.
AZƏRTAC xəbər verir ki, 2016-cı ilin “Multikulturalizm ili” elan edilməsi çərçivəsində “Multikulturalizmin alternativi yoxdur” şüarı altında təşkil olunan festivalın iştirakçıları əvvəlcə Ümummilli lider Heydər Əliyevin Xaçmaz şəhərində ucaldılan abidəsini ziyarət edib, xatirəsini ehtiramla anıblar.
Mədəniyyət və turizm naziri Əbülfəs Qarayevin, ölkəmizdə akkreditə olunmuş səfirliklərin nümayəndələri və xarici qonaqların qatıldığı festivalın məqsədi Azərbaycanda tarixən mövcud olan multikultural dəyərlərin qorunması, yaşadılması və təbliğidir.
Festival iştirakçıları Azərbaycanın 37 rayonundan 400 nəfərə yaxın qonağın qatıldığı, multikultural dəyərləri tərənnüm edən müxtəlif tədbirlərdə iştirak ediblər.
Qonaqlar əvvəlcə Fəvvarələr Bağında müxtəlif səpkili sərgi və stendləri izləyiblər. Ölkəmizdə yaşayan milli azlıqların mədəniyyətlərinə aid tətbiqi sənət əsərləri, həmçinin kulinariya, folklor, musiqi, xalçaçılıq, dulusçuluq və digər sənət əsərlərinin nümunələri maraqla qarşılanıb. Festival çərçivəsində folklor musiqisindən ibarət “Bizim vətənimiz Azərbaycandır” konsert proqramı təqdim olunub. Uşaq musiqi və incəsənət məktəblərinin şagirdləri yerli və xarici ölkələrin bəstəkarlarına məxsus klassik musiqilər ifa ediblər. “Azərbaycan - dünya multikulturalizminin ünvanlarından biridir” adlı rəsm sərgisi də festivalın diqqətçəkən məqamlarından olub.
Açıq səma altında yaradılmış Şəxsiyyətlər muzeyi ərazisində zorxana, eləcə də güləşçilər, pəhləvanlar və kəndirbazların çıxışları maraqla izlənilib.
Sonra Xaçmaz Tarix-Diyarşünaslıq Muzeyində media nümayəndələri üçün brifinq təşkil olunub, jurnalistlərin sualları cavablandırılıb.
Mədəniyyət və turizm naziri Əbülfəs Qarayev Azərbaycanda milli və dini azlıqlarla bağlı aparılan dövlət siyasətinin hər zaman yüksək qiymətləndirildiyini diqqətə çatdırıb. Bildirilib ki, ölkəmizin bu sahədə həyata keçirdiyi siyasət və əldə etdiyi təcrübə başqa dövlətlər üçün də nümunə göstərilir. Multikultural dəyərlərin qorunması, yaşadılması və təbliği məqsədilə ölkəmizdə bir sıra beynəlxalq tədbirlər keçirilir. 2016-cı ilin “Multikulturalizm ili” elan edilməsi ilə əlaqədar Xaçmazda təşkil olunan bu festival da olduqca əhəmiyyətlidir.
Xaçmaz rayon İcra Hakimiyyətinin başçısı Şəmsəddin Xanbabayev Azərbaycanın hər yerində, o cümlədən Xaçmazda çox sayda milli azlıqların firavan yaşadığını vurğulayıb. Rayonda 20-dən çox etnik qrupun üzvləri yaşasa da, heç vaxt milli zəmində münaqişə və ya hər hansı problem yaşanmayıb. Xalqımızın Ümummilli lideri Heydər Əliyevin siyasi iradəsi nəticəsində Azərbaycan tarixən sahib olduğu tolerantlıq və multikulturalizm ənənələrini hüquqi və siyasi müstəvidə yenidən bərpa etməyi bacarıb.
Brifinqdə bir sıra media nümayəndələri multikultural dəyərlərin təbliği və qorunmasında göstərilən dəstəyə görə diplomla təltif olunub. Təltif olunanlar arasında AZƏRTAC-ın əməkdaşı Zərəngiz Mansurova da var. Festivalın kuboku isə Xaçmaz rayon İcra Hakimiyyətinin başçısına təqdim edilib.
Beynəlxalq festival çərçivəsində Mədəniyyət və Turizm Nazirliyinin Mədəniyyətşünaslıq üzrə Elmi-Metodiki Mərkəzi və Belarus Respublikası xalq sənətləri və mədəni maarifləndirmə işləri üzrə metodiki mərkəz, eləcə də İstanbul Böyük şəhər Bələdiyyəsinin mədəniyyət dərnəyi ilə Xaçmaz rayon Mədəniyyət Mərkəzi arasında Əməkdaşlıq Memorandumu imzalanıb.
Festival zamanı “Gənc mədəniyyət işçilərinin kreativ koordinasiya qrupu”nun üzvləri və Yeni Azərbaycan Partiyası Gənclər Birliyinin nümayəndələrinin birgə iştirakı ilə “Multikulturalizmin alternativi yoxdur” adlı elmi-praktiki konfrans keçirilib.
“Multikultural dəyərləri yaşadaq” adlı beynəlxalq festival gələn il Qubada təşkil olunacaq. Bu münasibətlə beynəlxalq festivalın rəmzi açarı Quba rayonun təmsil edən nümayəndələrə təqdim olunub.

Paylaş:

Baxılıb: 691 dəfə