YAP regionun ən güclü və mütəşəkkil partiyası kimi öz üzərinə götürdüyü missiyanı uğurla yerinə yetirir

Bakı:

4 °C

75 %

7 m/s

AZ RU EN

Ana səhifə / YAP xəbərləri / YAP regionun ən güclü və mütəşəkkil partiyası kimi öz üzərinə götürdüyü missiyanı uğurla yerinə yetirir

YAP regionun ən güclü və mütəşəkkil partiyası kimi öz üzərinə götürdüyü missiyanı uğurla yerinə yetirir

07.11.2012 [03:00]

Yeni Azərbaycan Partiyasının yaranmasının 20 illik yubileyi münasibətilə Saatlı rayonunda təntənəli tədbir keçirilib
Yeni Azərbaycan Partiyasının (YAP) yaranmasının 20 illik yubileyi Azərbaycanın hər bir bölgəsində silsilə tədbirlərlə qeyd olunur. Belə tədbirlərdən biri də Saatlı rayonunda keçirilib. Tədbir iştirakçıları əvvəlcə Ulu öndər Heydər Əliyevin abidəsinin önünə tər gül-çiçəklər düzüb, Ümummilli liderimizin xatirəsini ehtiramla yad ediblər.
Yubileylə əlaqədar tədbir iştirakçılarının Ümummilli liderin abidəsi önündən rayon Mədəniyyət Sarayına qədər yürüş mitinqi təşkil edilib.
Yeni Azərbaycan Partiyası İdarə Heyətinin üzvü Kərim Kərimov, rayon İcra Hakimiyyətinin başçısı Siraqəddin Cabbarov, Yeni Azərbaycan Partiyası Mərkəzi Aparatının məsul işçisi Ramil Mirzəyev, rayon təşkilatının idarə heyəti, şura üzvləri, partiya fəalları və ictimaiyyət nümayəndələrinin iştirakı ilə keçirilən təntənəli tədbiri YAP Saatlı rayon təşkilatının sədri Lütvəli Şıxəliyev açaraq partiyanın yarandığı tarixdən, keçdiyi şərəfli yoldan, Ulu öndər Heydər Əliyevin xilaskarlıq missiyasından və Yeni Azərbaycan Partiyasının cəmiyyətdə aparıcı rolundan danışıb. Onun sözlərinə görə, Yeni Azərbaycan Partiyası ötən əsrin 80-ci illərin sonu 90-cı illərin əvvəllərində ölkəmizdə meydana çıxan mürəkkəb siyasi situasiyanın daxili məntiqindən, zamanın təxirəsalınmaz tələbindən irəli gələrək, Azərbaycan xalqının arzu və istəklərinin ifadəçisi kimi yaranan partiyadır. Ötən 20 ildə YAP-ın Azərbaycan dövlətçiliyinin inkişafı və xalqımızın rifahı naminə yorulmaz fəaliyyət göstərdiyini söyləyən L.Şıxəliyev əlavə edib ki, bu gün də YAP Azərbaycanın və regionun ən güclü və mütəşəkkil partiyası kimi öz üzərinə götürdüyü missiyanı uğurla yerinə yetirir.
Daha sonra çıxış edən Saatlı rayon İcra Hakimiyyətinin başçısı Siraqəddin Cabbarov deyib ki, yarandığı gündən Yeni Azərbaycan Partiyasının Ümummilli lider Heydər Əliyev tərəfindən müəyyənləşdirilən və uğurla tətbiq edilən əsas proqram məramı Azərbaycanın dövlət müstəqilliyinin qorunub möhkəmləndirilməsindən, ərazi bütövlüyünün təmin edilməsindən ibarət olub və YAP bu 20 ildə öz proqram məqsədlərinə uyğun uğurlu fəaliyyət göstərib. Məhz Ümummilli lider Heydər Əliyevin uzaqgörən və məqsədyönlü siyasəti nəticəsində Azərbaycan böyük inkişaf yoluna daxil olub, böhran və xaos mərhələsini arxada qoyub. 2003-cü ildə Ulu öndərin çağırışına səs verən, Azərbaycan xalqının Heydər Əliyev ideyalarını, Onun əsasını qoyduğu ənənələri uğurla davam etdirən möhtərəm Prezidentimiz İlham Əliyevə etimad göstərməsinin nə qədər doğru seçim olduğu bu gün inkişaf edən Azərbaycan dövlətinin timsalında öz təsdiqini tapmaqdadır. Təbii ki, bu inkişaf prosesində Azərbaycanın hakim və ən güclü siyasi partiyası olan Yeni Azərbaycan Partiyası daim ön sıralarda yer alır.
Daha sonra Yeni Azərbaycan Partiyası İdarə Heyətinin üzvü Kərim Kərimov çıxış edib və 20 illik yubiley münasibəti ilə tədbir iştirakçılarını təbrik edib. YAP-ın yaranmasını şərtləndirən o dövrün mühüm ictimai-siyasi mənzərəsini təhlil edən Kərim Kərimov deyib ki, 1988-ci ildən başlanan iqtisadi, siyasi, xüsusilə dövlət hakimiyyəti böhranı ölkəmizdə vəziyyəti daha da gərginləşdirmişdi. Məhz belə bir ərəfədə xalqın sağlam qüvvələri, həmçinin, ziyalılar böyük tarixi şəxsiyyət Heydər Əliyevə müraciət etdilər. Beləliklə, 1992-ci il noyabrın 21-də Naxçıvanda Yeni Azərbaycan Partiyası təsis edildi: “Xalqın arzularının təcəssümü, yekdil iradəsinin ifadəsi kimi tarixi reallıqdan irəli gələrək, vətənpərvərlik, əqidə birliyi, dövlət müstəqilliyi və azərbaycançılıq ideyalarının möhkəm təməli üzərində yaranan Yeni Azərbaycan Partiyası ölkəmizin siyasi həyatına yeni nəfəs verməklə, qurtuluş və tərəqqinin, inkişafın simvoluna çevrilib. İnanıram ki, Yeni Azərbaycan Partiyası bundan sonra da Azərbaycanın siyasi həyatında öz mütərəqqi missiyasına sadiq qalaraq, dövlətimizin və xalqımızın inkişafı naminə vəzifələrini şərəflə yerinə yetirəcək”.
Digər çıxışçılar da YAP-ın keçdiyi inkişaf yoluna nəzər salaraq, bu əlamətdar gün münasibətilə təbriklərini çatdırıblar. Tədbirin sonunda bir qrup partiya üzvünə YAP rayon təşkilatının Fəxri Fərmanları təqdim edilib, Azərbaycan Respublikasının Prezdenti, Yeni Azərbaycan Partiyasının sədri cənab İlham Əliyevə müraciət qəbul olunub. Tədbir rayon Mədəniyyət və Turizm Şöbəsinin hazırladığı təntənəli bayram konserti ilə davam etdirilib.

Paylaş:

Baxılıb: 1309 dəfə